Yerimia 41 - Ngudradreadrekadhane Ka Sisiu 魯凱語聖經

¹ Kwini ki caili ki sakapitu ki dramare, yakai ku tangeea ku swakai ki talialalai, la mialri ka tabebelenge ki talialalai, agane ki Ilrisama, Isemaele ka lalake ki Nithania, wailuku ku tamangeale ku umawmase mwa Mizepa kikawriva ki sutu ka Gidalria. Kwi lalasu sa taelre kanekane,

² ku Isemaele si twapapalra iniane kainganai kudra tamangeale ku umawmase la sudru ku dramu, si papacai ki Gidalria.

³ Ku Isemaele la mialri papacai ki papalra ki Gidalria asuru ikai Mizepa ka swa Iseraylri, si yacengecenge ikai kwini ka lakwapingi ki swa Babilunia.

⁴ Sakakaiyane, saka kadruana ku wathingale ala ka kiapapacai ku Gidalria.

⁵ Yakai ku tamavalrulu ku umawmase ku twalai Sekeme, Selu, si Samaria kainganai. Kwi lalasu wakiriti ku ngisingisi, la purici ku lalaimai, si gelregelre ki lakinawmasane, la iluku ku Taleke ka lrisi si sangwalreme, lri mwa ki daane ki Tamatama patarumara.

⁶ Ku Isemaele twalai Mizepa kainganai, la takudadadavace si takutubitubi katwase kidredresenge liniane. Kwi lasu sa drele liniane, la dawlu si iya kai, “Bwala drela ki Gidalria!”

⁷ Kwi lalasu sa mudaane ki cekele, ku Isemaele si papalraini la pwalrima papacai liniane, si cilri pwa ki valrulrange kwini kinawmasane ki lawapacai.

⁸ Ikai kwini ki lalasu yakai ku tamangeale ku kiatubi ki Isemaele, “Madha papacapacai naiane! Yakai ku makaalra ku madradrau ka mugi, titikiane ka mugi, lawlau ka ulrive, si valu, niseketane pikai umawma.” Ku Isemaele la pacepe liniane si kai papacai.

⁹ Ku tacilriane ki wapacai ki Isemaele kwini valrulrange madrau turamuru. Kwini yai nalruku ki Asa ka talialalai pakai ku atelengane lu kela kikaruburu ku Basa ka talialalai ki swa Iseraylri. Ku Isemaele arakai ku kinawmasane kwini ki lawapacai pasuete ki valrulrange.

¹⁰ La pacungulu, ku Isemaele pwalra ki ababai ka lalake ki talialalai si asuru ikai Mizepa ka laumawmase, la papia Amune mubere. Kikai laumawmase kai, baai ki kiacapili ki tarakadrekadrenge ka Nibuzaradange pamarasikai ki Gidalria.

¹¹ Ku Yuhanane si twapapapalra iniane ka latabebelenge ki kwapingi kialalra ku tapasalrivane ki Isemaele,

¹² La mailuku ki lakwapingini si katwase kurisi ki Isemaele, la padali iniane ikai thili ki baibaiyu dethe ka Gibiungu.

¹³ Ku lakiaravase ki Isemaele sa drele ki Yuhanane si twapapalra iniane ka latabebelenge ki kwapingi, la kiraraagai turamuru,

¹⁴ si ngibangulu lailai papia liniane.

¹⁵ Ai ku Isemaele si tavalru ka ililukuini, mwabere makanaelre, la mwa aswakaainga ki swa Amune.

¹⁶ Ku Yuhanane si twapapalra iniane ka latabebelenge ki kwapingi marasiakai sirapale ki nipalribulane patwalai ki Isemaele ka laumawmase. Kikai laumawmase yai amani sa papacainga ku Isemaele ki Gidalria, patwalai Mizepa ravase, ikai kwini yakai ku lakwapingi, lalabaibai, lalavavalake, si lataraikaikai ki daane ki talialalai.

^17-18 Kwi lalasu mwakuludru ki swa Babilunia, asi lwiyane ku Isemaele papacai ki Gidalria ka pasutu ki talialalai ki swa Babilunia ikai kai. Pakai ku amuberane ki swa Babilunia, kwi lalasu la mubere mwa Izipiti. Sa ikadalranane, kwi lalasu yadrengere ikai Kimehame dethe Bithelrihime.