Yerimia 40 - Ngudradreadrekadhane Ka Sisiu 魯凱語聖經

Ku Yerimia tadrusadrusa ki Gidalria

¹ Ku kiacapili ki tarakadrekadrenge ki Nibuzaradange sa ikai Rama pulatadrenga nakwane, ku Tamatama kawariva nakwane. Nakiakerengaku ara kicikici, si tupapalra mu Babilunia ki kiaravase makanaelre ka swa Yerusalrime si swa Yuda la kipakaredele kiiluku mwa ka Rama.

² Ku kiacapili ki tarakadrekadrenge wadawlu nakwane puthili, si iya kai, “Ku Tamatama ka Twaumasesu peaelaela ka lri amudu kikai,

³ kikainga paiyanga singikai ku taiyaneini; kikai yai amani sa pasalriu numi ki Tamatama, kai kilalra pasalaladha ku drekaseini.

⁴ Kikai asasane lri mukerengaku kwi kicikici ki alrimasu, si pangilralraingi muswane. Alaiyasi lri tupapalrasu nakwane mu Babilunia, kai lri katumane karededele katwase, lri pudriadriingadhaku sirapale muswane. Alaiyasi kalrasesu katwase, madha katwatwase. Kai yacucubungu muswane kai sakakadaedaengaanane, sanaka kadalamesu nau mwa iya, mwa papia.”

⁵ Kainaku twabalreana, ku Nibuzaradange la iyanga kai, “Lu siwlria mwa ki Gidalria ka lalake ki Ahikame ka agane ki Sapange! Ku talialalai ki swa Babilunia paasiwciwnga iniane ikai ki lacekele Yuda. Kai lri katumane asuru ikai iniane, si ikai ki sakacekelesu. Alaiyasi kadalamesu mwa talidrumane, ngisasingikaiya ku nau mwa iyasu.” La baai nakwane ku saceacebe si akaneane ikadalranane, ala pakatwase nakwane.

⁶ Wamwaku ka Mizepa silape ki Gidalria, si ikai taelre ki asuru ka lasakacekele.

Ku Gidalria kia paasutu

⁷ Yakai kwidra kai wakusange ku latabebelenge si lakwapingi ki swa Yuda, kialalra ku tapaasutuane ki talialalai ki swa Babilunia ki Gidalria, si marasikaikai ki kai kiaravase pu Babilunia kudra ki lamatiakukurunga ka laumawmase.

⁸ Kilakikai tabebelenge, amani ku Isemaele ka lalake ki Nithania, Yuhanane ka lalake ki Karia, Seraia ka lalake ki Tanumethe, lalalake ki Ipai ka swa Nitupa, si Yezania ka swa Maka waililuku ki papalra lini mwa ka Mizepa si kikawriva ki Gidalria.

⁹ Ku Gidalria kawariva papia liniane ku atara ngimiane iya kai, “Madha mukuludru papia ki swa Babilunia kusange, kunumi asura ikai kikai sikakathane, si pasikaikai ki talialalai ki swa Babilunia, lri kasulivaliivate patuelre.

¹⁰ Lri asuraku ikai Mizepa; lu kela ku swa Babilunia, lri kamaniaku ku atalingikaiyane numiane. Lri malra numi pikai ku bava, ku madru ki angatu, ku abera ka ulrive, suru pikai ki tadrikisane numi ka cekele.”

¹¹ Lu kamani kai kwidra, ku swa Iseraylri ku mwabere mu Muabe, Amune, Idume, si yatali drumane ka swa Iseraylri, lu kilalra ka palraingi ku talialalai ki swa Babilunia ki asuru ki swa Iseraylri ikai Yuda, si la pakamani ki Gidalria asutu liniane,

¹² Lri katwase kwini ki taikaiyane lini acaicali, si siwlri mu Yuda. Kwi lalasu lri mwa Mizepa si kikawriva ki Gidalria, ikai kwini lai lri pikai ku makaalra ku bava si lamadru ki angatu.

Ku Gidalria kiaculrulu

¹³ Kikai sa ngilribatenga, ku Yuhanane si kai wakusange ka mabelenge ka taradrekase ki kwapingi wamwa ka Mizepa kikawriva ki Gidalria,

¹⁴ La iya kai iniane, “Wathingalesu ku talialalai ki swa Amune ka Baalise siakawlu ki Isemaele lri papacai muswane?” Ku Gidalria kai masalru kikai vaga.

¹⁵ Sakabilrilinga, ku Yuhanane la tangeangeea iya kai ki Gidalria, “Palraingaili nau katwase papacai ki Isemaele, kadrwa ku lri thingale ka aneane ku paiya. Lani kai papacai muswane, alaiyasi kipapacaisu, kai ngiathalringulu muswane kai laumawmase lri kipasawvagavagai; ku abalu ki swa Yuda lai lri kiamudu makanaelre.”

¹⁶ Ai, ku Gidalria twabalre, “Kainaku palraingi lu piasu kwini. Wavuthasu iya kwini ki Isemaele!”