Yerimia 4 - Ngudradreadrekadhane Ka Sisiu 魯凱語聖經

Wadawlu ki swa Iseraylri pangitatupela

¹ Ku Tamatama amia kai kawriva, “Swa Iseraylri ka laumawmase, alaiyasi lri siwlriwlri numi, bwala mwaili kai! Alaiyasi mwalra numi kwidra kalraseli ka samiamiange, si kai kavangavangenga,

² lai lri dulru numi arakai ku patengatengane, ku ulecegane, ku aparamaramavane si papia ki naganeli kiketekete. Lukamiyaiya kikai sanaka kuni lri papia nakwane kitubi ku akaesadhane, lai lri drengedrengere nakwane makanaelre.”

³ Ku Tamatama amia kai pelaela ki swa Yuda si swa Yerusalrime, “Lri tukarawmane numi ku kaiyana ka nipavilringane ka kadaengane, madha sabwabulu ku sapaivai ikai ki cecenekane ka angatungatu.

⁴ Swa Yuda si swa Yerusalrime, kunumi pikaiya ki kidremedreme numi kigelregelre tulrisi, ngipapatarumara baai nakwane ka Tamatama numi. Lu kai mia kwini, kwi ngangacane numi lri pakagirimucu nakwane, lai kudalai kai lisianeli, kadrwa ku umawmase ku lri maka edrepe.”

Singi latadre ku twasinalreme ki swa Yuda

⁵ Papia ki sakatukuniane ngirapa, pakipapawlringava, akwadrava tawtau ki swa Yuda si swa Yerusalrime: Lailadha, kirarimwa mudaane ki niravadrane ka cekele!

⁶ Cegecega si padrukange ku papia kavai Ziyungu ku kadadalranane! Madha ngiabalai, kirarimwa mubere! Ku Tamatama lri pulebe ku amatikurwane; kulri pakamudu lri twalai tali dradha kela.

⁷ Kwidra lri pakamudu ki sanaka kuni matwasenga, mia ki raiyungu ka ngiabwale twalai ki angatungatu. Kwini lasu lri pakamudu ki swa Yuda. Ku kadaengane Yuda lri aubulane, ku cekele kadrwa kulri ikai ku umawmase.

⁸ Lakamani, sipalimemelra ku kaimadhane, si tubi tungawngau, asi lwiyane ku lisiane ki Tamatama papia ki swa Yuda kai maedrepe.

⁹ Ku Tamatama amia kai, “Lu kamani kwidra, ku latalialalai si latabebelenge lri kawlrau ku galremegemane; ku labarakalai lai lri tirereenganenga; ku layuginsia lai lri mialri kasamali.”

¹⁰ La kiecebaku iya kai, “Abebeelengenga ka Tamatama, tengatenganesu ka watavuvulrucu ki swa Yerusalrime! Lri ngiesaesaesadhane amiasu, ku patengatengane taukudrane ki lrulrungu lini ku dramu.”

¹¹ Lu kelanga kwidra, yakai ku umawmase kulri pelaela ki swa Yerusalrime: Yakai ku maculu ka saseverane ka twalai calragulragu papia liniane valrigi, kaika amani kwidra lri palai ki lrapi ka vaivalrigi iya,

¹² amani kwidra dawlu ki Tamatama ka sapupukwanenga ka valrigi! Tamatama ka ngiakakamani saibange ki kawkawluini.

Kialringulu ki badha ku swa Yuda

¹³ Drela! Ka badha mia ki ngiapalrici ka icecelrenge ka ememe kaingananganai; ku sakikaruburuburane ka palridingini mia ki alrilrawgu ngipalapalai, ku sakikaruburuburane ka rigi mariaridare ki takanga! Lri pacaita! Kiasalrungata!

¹⁴ Swa Yerusalrime, sinava kwi pasalrivane ki kidremedreme, lri dulrusu kipalribulu. Lri pakelasu lwigane ka takavalringiviingane ki pasalrivane?

¹⁵ Kilalra, yakai ku kiasikawlu twalai tali kai Dange si tali kai lregelrege Iparaime ka zuku kainganai; kwi lalasu wakela pelaela ku kai mathariri ka vaga.

¹⁶ Kwi lalasu wakela pakipapawlringau ki lakuni, ki swa Yerusalrime: La ikai ku badha ku twalai adaaili kainganai. Kwi lalasu lri karaleale, si kikaruburu ki lacekele ki swa Yuda,

¹⁷ lai lri lringulu Yerusalrime, mia ki tarakawaungu ki umawma ka wakadrekadrenge ki umawma. Kikai yai amani sa baebalrenga ki Tamatama ku laumawmase ki swa Yuda. Tamatamaku; ka amia kikai pelaela.

¹⁸ Swa Yuda, kwini kakwakudhanesu la tapiapianesu wadawlu kikai ki amatikurwane. Pasalrivanesu kwi pakwalri muswane, ka warakadre ki kidremedremesu.

Ku Yerimia ngwalai ki sakacekele kwalri ku kidremedreme

¹⁹ Kainaku walremenga ki sakiangeange! Mia ki kwalamalama kai kidremedremeli, kai maka swatelrainga nene. Kialalraku ku waelraelrange ku rapa ki kwapingi, makakaraleale ku papacadha amiamia ku lingau.

²⁰ Ku amatikurwane makakabibibilrili kainganai; kai kuni palraelre atawlrakavanenga. Kai balrawbawli kiariimu mukadrulu, ku make ki balrawbau la kapurici.

²¹ Lri tarathainwana naku kipadradresenge ki amakaruruburane? Lri kingipialeana naku kilalra ki rapa ki kwapingi?

²² Ku Tamatama amia kai, “Kai kawkawluli makulrungu; kwi lalasu kai wathingale nakwane. Kwi lalasu mia ki amani kudra takalavavalaakane ku kidremedreme, kadrwa ku natikianenga ku tathingalane. Kwi lalasu apiaane ku ngialisiane sikakathane, kai wathingale pia ku mathariri.”

Ku Yerimia wadrele ku akamudane lukabibilrili

²³ Paswalebeaku drele ki kadaengane, la matiseepele; la paswabelengaku, la kadradriimiti ka kadrwa ku ledra.

²⁴ La masiasiraraku papia ki tadradrau ka lregelrege, si drele ki latatitiki ka lregelrege; ku maadrau ku lregelrege walingilingi, ku tikiane ka lalregelrege ngiavelevele.

²⁵ Kainaku maka wadrele ku umawmase; adravane ka laadhadhame ngiapalainga katwase.

²⁶ Ku mathariri ka umawma aubulane; ku cekele maru daenga ka nirubwane, asi lwiyane ku Tamatama wagugu ku lisianeini.

²⁷ Ku Tamatama amianga kai, kai kadaengane palraelre lri aubulane, ai kai lri pakisalru amudu.

²⁸ Kai kadaengane lri adirivane, kai belenge lai kadradrimiti. Ku taiyane ki Tamatama ku vaga kai lri akabalrithi lutumane; ku kalrithethengaini kai lri tupelanga.

²⁹ Ku yakai ki cekele ku laumawmase sana kilalra ku takaralealane ki tarangurigirigi ka kwapingi si taralrailraili, lri mubere liniane makanaelre. Yakai ku mwabere mwa ki angatungatu; yakai ku mwabere mwa ki lalibi ki alrisapesape. Matwasenga ku laumawmase, kadrwanga ku umawmase ki cekele!

³⁰ Swa Yerusalrime, kiasalrungasu! Asingithanga silaimai kwini takuciacingalre ka laimai? Asingithanga ngiragelane sisisilu? Asingithanga papacase ki sakelrepe? Manemane ku paluludane lu ngidademelesu si ngiragelane? Ku siasilanganesu wacilringa muswane, lri papacai muswane.

³¹ Kialalraku ku lingau ku mia ki kiangeangeange ka lri tulalake. Kialalraku ku maralealeale mia ki ababai ka lri tau tulaalake. Kwini yai swa Yerusalrime ka watubitubi; tara wataale ku alrimaini, si iya kai, “Lri matikurwaku, lri matikurwaku! Kwi lalasu lri kela si papacai nakwane!”