Yerimia 39 - Ngudradreadrekadhane Ka Sisiu 魯凱語聖經

Takimucekelane Yerusalrime

¹ Sa tara bangatenga ka caili si mangeale ka dramare ku taatalialaladhane ki Zidikia ki swa Yuda, ku talialalai ki swa Babilunia ka Nibukadenezere waililuku ki lakwapingi si mwa kikaruburu Yerusalrime.

² Sa tara mangealenga si vaeva ka caili si supate ka dramare ki samaka bangate ka vai ku taatalialaladhane ki Zidikia, ku raedre ki cekele Yerusalrime kiaburukunga.

³ Sa kiwcekele Yerusalrime, ku latabebelenge ki kwapingi ki talialalai ki swa Babilunia makanaelre wamwa ki Kabicelrakane ka lrawlrawdru, la ikai kwini saibange. Kwini latabebelenge ki kwapingi amani kai: Niregale Sarizire, Samagare Nibu, Saresekime, si tangeea ka Niregale Sarizire.

⁴ Sa drele ka matiaukuludrunga ku talialalai ka Zidikia si latarakadrekadrenge, la takaungane mubere mulatadre ki cekele. Kwi lalasu ngwakakai babengelradhane ki daane ki talialalai, si lribate ki tamacacungulane ka sipusale ka kadalranane ka raedre ki cekele ka tangukaikaiyane, papia tali Yuredange valrwalru mubere.

⁵ Ai, ku kwapingi ki Babilunia wakurisi liniane, la ikai dethe Yeriku dratane padali ki Zidikia. Kwi lalasu waravase liniane, la iluku iniane pwa ki talialalai ka Nibukadenezere; sakamani kwidra ku Nibukadenezere yakai tali Hamathe ka Ribela, kwi lasu la ikai kwini saibange ki Zidikia.

⁶ La picucubungu ki Zidikia, ku talialalai ki swa Babilunia papacai ki lalalake ki Zidikia makanaelre, la mialri papacai makanaelre ki latalialalai ki swa Yuda,

⁷ ala malra garirungu ki maca ki Zidikia, si arakai ku lriwlu ka kicikici kerenge iniane, lri iluku iniane mu Babilunia.

⁸ Ku swa Babilunia walama ki daane ki talialalai si ladaane ki mapapangale, la buruku ku raedre ki cekele Yerusalrime.

⁹ Ku bibiilrilinga, ku abebeelengenga ki kwapingi ka Nibuzaradange la iluku pu Babilunia kudra ki asuru ikai ki cekele si wakusange iniane makanaelre.

¹⁰ Kwi lasu la suru kwidra ki lamatikukurunga, ka kadrwa ku tacekecekelane ku umawmase pikai Yuda, si apavalavala liniane ku babudubudu si latakauawngane.

Ku Yerimia kiapulatadre

¹¹ Ku Nibukadenezere ka talialalai ki swa Babilunia wadrekase ki Nibuzaradange ka abebeelengenga ki kwapingi iya kai,

¹² “Silapa ki Yerimia, si pudriadriingai marasikai iniane, madha duladula iniane. Kwi lasu lu ikai ku kitubini, pasikaiyanga iniane marasikai.”

¹³ Ku Nibuzaradange si latabebelenge ki kwapingi ka Nibusazebange, Niregale Sarizire, si drumane ka tabebelenge,

¹⁴ Ala malra nakwane patwalai ki taememengane ki daane ki talialalai pulatadre, si baai ki Gidalria ka lalake ki Ahikame, ka agane ki Sapange, la cunu iniane ku aputavananane nakwane; ala katwasaku, si ikai ki sakacekeleli.

Ku sidramadrama ki Ibedemileke

¹⁵ Sa kiemengeana naku ikai ki taememengane ki daane ki talialalai, ku Tamatama wacunu nakwane,

¹⁶ pelaela ki Ibedemileke ka swa Kuse, ku Tamatama ka abebeelengenga ki sanaka kwapingi, ka Twaumase ki swa Iseraylri amia kai, “Lri singikaaiyaku kudra pelaelali ku amudane kai ki cekele, si kai pangiradhekane iniane. Lri dredredrelesu lu ngimiamia kikai.

¹⁷ Ai, kwaku ka Tamatama lri palakebaku muswane; kaisu lri kibaai pwa ki alrima ki mukulukuludrusu.

¹⁸ Lri palakebaku ku akasulivaatanesu; kaisu lri pacai ikai ki lrabu. Lri tara kipalakebe kwi niakesu, asi lwiyane masalrusu satalu nakwane. Tamatamaku; ka amia kikai pelaela.”