Yerimia 38 - Ngudradreadrekadhane Ka Sisiu 魯凱語聖經

Ku Yerimia yakai ki meameale ka dralremedreme

¹ Ku Sepatia ka lalake ki Matange, Gidalria ka lalake ki Pasehure, Yehucale ka lalake ki Selemia, Pasure ka lalake ki Malekia kialalra ku tapapianeli kawriva ki mapapangale pacungulu

² ku vaga ki Tamatama, “Ku aneane ku asuru ikai kai ki cekele, lrika aneeane kulri pacai ikai ki lrabu, ki silravane, ki swalrubu. Ai, ku aneane ku wakusange ki swa Babilunia, aneeane ku kai lri kipapacai, lri udripi ku niake.”

³ La pela naku pelaela liniane amia kai ku Tamatama, “Kai cekele kai lri tara baadhaku ki kwapingi ki swa Babilunia; kwi lalasu lri kela drikisi.”

⁴ Ku latabebelenge ala katwase mwa kikawriva ki talialalai, amia kai iniane, “Kiatubi nai muswane papacadha kai ki umawmase; asi lwiyane kai lasu pakalrupi kai ki yakai ki cekele ka kwapingi si laumawmase ku akusangane, la amalremenga. Kai lasu kai kiadremedremedreme ku akaesadhane ki mapapangale, kiasanu papacapacai sikakathane liniane.”

⁵ Ku talialalai ka Zidikia la tubalre, “Imianga, kwi lasu yakai ki alrima numi, ku nau tumane iya numi iniane, kainaku lri pakaicilri.”

⁶ Kwini lalasu ala ruthuku nakwane, la arakai ku calrisi surusuru puadringi nakwane ki dralremedreme Malekia. Kikai dralremedreme yakai taememengane ki daane ki talialalai, ka kadrwa ku acilai, dulraki sikakathane, la mutheneaku ikai ki dulraki.

⁷ Sakamani kwidra, ku talialalai yakai ki Biniyamingi ka lrawlrawdru saibange. Ku taraikaikai ki daane ki talialalai ka kiatinumwalranga, Ibedemileke ka swa Kuse kialalra kwini ki lalasu sa kipuadringaku ki dralremedreme,

⁸ La katwase mwa ki daane ki talialalai si pelaela ki talialalai,

⁹ “Talialalai, kikai laumawmase lu pia kai ki yuginsia ka Yerimia matiavalracevace. Kwi lalasu wamalra iniane si cilri pwadringi ki dralremedreme, kwi lasu lri tara ikaai kwini pacai kiara silravane, asi lwiyane kai ki cekele kadrwanga ku taleke”

¹⁰ Ku talialalai ala drekase ki Ibedemileke mailuku ku tamatulrulu ku umawmase kainganai, sa kainaku pacaiyana la malra nakwane palribulu.

¹¹ Ku Ibedemileke la iluku ki laumawmase mwa ki talawbubulane ki daane ki talialalai silape ku lamapapuricinga ku laimai, si arakai ku calrisi surusuru pulebe ki dralremedreme.

¹² Malra kikai lapuripurici ka laimai pwa ki tathisu la iya nakwane, pakai ku kaika akugisagisaneli ki calrisi si kadula. La pangimiaku ku taiyaneini,

¹³ kwi lalasu la malra nakwane patwalai adringi ki dralremedreme bilibili pubelenge. Twalainga kikai, kwi lalasu taemenganeana nakwane pikai ki taememengane.

Ku talialalai ka zidikia kiabubuli kivavaga ki Yerimia

¹⁴ Sakabilrilanenga, ku Zidikia ka talialalai pamalramalra ki umawmase nakwane si mwa ki sakatulru ka samamudaane ki daane ki Tamatama kikawriva nakwane. Kwi lasu amia kai nakwane, “Nau kivaga ku taingeane muswane; pudriadringaadha tubalre nakwane.”

¹⁵ La iyaku kai, “Alaiyasi tukapatengatenganaku kawriva, lri tara papaacaisu nakwane; alaiyasi pia kwini iyaku, lai kaisu kilalra.”

¹⁶ Ku Zidikia ala kibubuli kiketekete nakwane, “Lri papiaku ki palralrawthu panianiake ka Tamatama ka wabekace ki niaketa ka Twaumase kiketekete, lri kainaku papacai muswane lutumane, lai kainaku malra muswane si baai ki kiasanu papacapacai muswane ka umawmase.”

¹⁷ Ala pelaelaku ki Zidikia, ku Tamatama ka abebeelengenga ki sanaka kwapingi, ka Twaumase ki swa Iseraylri amia kai, “Alaiyasi papiasu ki abebeelengenga ki kwapingi ki swa Babilunia kusange, kaisu lri pacai; kikai cekele lai lri mialri kai kilama. Kusu si wacekecekelesu makanaelre kai lri pacai.

¹⁸ Alaiyasi kaisu mubangalre kusange, kikai cekele lri amaki ikai ki alrima ki swa Babilunia. Kwi lalasu lri lama ki cekele; lai kaisu lri maka mubere liniane.”

¹⁹ Ai ku talialalai twabalre, “Makiwcaku kudra lawakusangenga ki swa Babilunia ku swa Yuda. Ku swa Babilunia alau lri malra nakwane si baai liniane, la pakwalrialri pakiangeangeange nakwane.”

²⁰ La iyaku kai, “Ku swa Babilunia kai lri malra muswane si baai liniane. Kiatubiaku muswane ku akilalranesu pasalaladha ku pelaela iya nakwane ki Tamatama muswane, lasu kasulivaliivate, si kai pacai.

²¹ Ku Tamatama peaelaelanga nakwane, alaiyasi kaisu kusange,

²² kwi yakai ki daane ki talialalai ki swa Yuda kwi lalabaibai lri kiiluku pucucubungu ki abebeelengenga ki kwapingi ki swa Babilunia. Kwi lalisu lai takukatwatwase si takukawrivariva iya kai: Ku talialalai kiatavuvulrucu ki twapapapalra iniane; kwi lalasu amaninga ka wakelrekelrete iniane. Kikai, kwi drapale ki lasu mwathene ki beneke; ku natwapapapalra iniane matwasenga.”

²³ La iya naku kai, “Ku lataelrelresu, lalalakesu lri kiiluku mu Babilunia makanaelre; lai mialrisu kai maka mubere. Lrika amaningasu ku niravasane ki swa Babilunia ka talialalai; kikai cekele lri kilama.”

²⁴ Ku Zidikia ka talialalai la tubalre, “Madha pathingathingale kikai tamakakawrivaneta, lasu udripi.

²⁵ Alaiyasi ikai ku wathingale kai takawrivaneli muswane ku latabebelenge, kwi lalasu lri tara kaingaanai silape muswane, si kivavaga ku tamakakawrivaneta. Kwi lalasu lri iya kai muswane, ‘Alaiyasi ka patengatenganesu pelaela naiane ku tangimiamiane, kai nai lri papacai muswane.’

²⁶ Ai, peaelaela madu liniane, ‘Kiatubitubiaku ki talialalai ku kaika asawlrianenga nakwane putaememengane, si pacai ikai kwini.’ ”

²⁷ Sakabilrilinga, ku latabebelenge makanaelre patengane ka wakela si kivavaga nakwane, la singikaaiyaku ku tadrekasane nakwane iya kwini iya ki talialalai tubalre liniane. Kwi lalasu la nguvagaanenga, asi lwiyane kadrwa ku umawmase ku kialalra ku tamakakawrivane nai ki talialalai.

²⁸ Laka miyaiya kai, kiaemengaku ikai ki taememengane ikai ki daane ki talialalai, pakeela ku takiwcekelane Yerusalrime kwini ki vai.