Yerimia 37 - Ngudradreadrekadhane Ka Sisiu 魯凱語聖經

Ku Zidikia kiatubi ki Yerimia ku apasikaiyane inulri

¹ Ku Nibukadenezere ka talialalai ki swa Babilunia wacegecege ki Zidikia ka lalake ki Yusia pawbalrithi ki Yehuiacingi ka lalake ki Yehuiakime atalialalai ki swa Yuda.

² Ai, ku Zidikia si latabebelengeini si laumawmase makanaelre kai kialalra pasalaladha ku tacunane nakwane ki Tamatama ku vaga.

³ Ku Zidikia ka talialalai siakawlu ki Yehucale ka lalake ki Selemia si barakalai ka Zipania ka lalake ki Masia kaiyanganai kikawriva nakwane, ku lrika apasikaiyaneli ki kuni papia ki Tamatama ka Twaumaseta inulri.

⁴ Sakamani kwidra, kainaku kiaemengeana pwa ki taememengane, adulruaneana ngilralraingi dadadavace ikai ki laumawmase.

⁵ Sakamani kwidra ku kwapingi ki swa Babilunia walringulunga Yerusalrime, ai kwi lalasu sa kilalra ka kaiyangananganainga ku kwapingi ki talialalai ki swa Izipiti, siaulri katwase.

⁶ Ku Tamatama ka Twaumase ki swa Iseraylri wacunu nakwane

⁷ iya kai ki Zidikia ka talialalai ki swa Yuda, “Kudra twalai Izipiti kainganai lri paralubu muswane ku lakwapingi lri alikadadalraanane si siwlri.

⁸ Ku kwapingi ki swa Babilunia lri kainganai siwlri kikaruburu kai ki cekele; kwi lalasu lri malra kai ki cekele, si lama kabebetethe.

⁹ Kwaku ka Tamatama lri pakipapawlringavaku muswane, madha ngitatavuvulrucu, kai lri siwlringa kela ku swa Babilunia iya; ku tengatengane kwini lalasu lri tara keela siwlri.

¹⁰ Adravane ka pamalebesu ki kwapingi ki swa Babilunia, la kai tathainunga ku tedrane ku lamadadula ku kwapingi ku wapece ikai ki tasuladhane lini, kwini lalasu lri ngidrakaaleana, si lama kai ki cekele.”

Ku Yerimia kiapwalra si kiputaememengane

¹¹ Amani sa dethenga ku kwapingi ki swa Izipiti, la katwase Yerusalrime ku kwapingi ki swa Babilunia,

¹² lakamani padulrwaku ku akatwasane Yerusalrime si mutali Biniyamingi ki laretesane, lri mucungulaku ku kipawcungululi ku tacekecekelane.

¹³ Ai, sa kelaku cekele ki Biniyamingi ka lrawlrawdru, ku kiacapili ki tarakadrekadrenge ka Ilriya, ka lalake ki Selemia, ka agane ki Hanania pwalranga nakwane. Kwi lasu wakukusu nakwane, “Pasana papiapiasu ki swa Babilunia kusange!”

¹⁴ La tubalreaku, “Ini, kainaku lri katwase kusange!” Ai ku Ilriya kai kialalra, la ruthuku nakwane, si baai ki tabebelenge.

¹⁵ Kwi lalasu la kalisi turamuru, si dawlu ki umawmase lrumai nakwane, la malra nakwane emenge pikai ki daane ki Yunathange ka tarapacapacase ikai ki daane ki talialalai; kikai daane twataememenganenga.

¹⁶ Ku takiemenganeli ikai adringi taememengane maulai turamuru.

¹⁷ Sakabilrilinga, ku talialalai ka Zidikia la sikawlu ki umawmase malra nakwane mwa iniane. Kwi lasu patangeangeea nakwane ikai ki daane ki talialalai si kivavaga, “Yakai ku vaga ki Tamatama?” La tubalreaku, “Yakai! Lri kipikaisu ki alrima ki talialalai ki swa Babilunia.”

¹⁸ La pacungulu, kiavagaku iniane, “Yainwaku pasalriu muswane, pasalriu ki tabebelengesu ki laumawmase, anu emenge nakwane pitaememengane.

¹⁹ Kudra kai lri kela ku talialalai ki swa Babilunia kikaruburu numiane, kai lri kela ravase kai ki cekele lutumane amiamia ku layuginsia yainunga kikai?

²⁰ Talialalai, kilalra kai kitubili muswane, madha satesatedre nakwane sawlri pwa ki taememengane ki daane ki Yunathange, amani lu pacadhaku ikai kwini.”

²¹ Ku talialalai ka Zidikia ala drekase malra nakwane emenge pikai ki taememengane ikai ki daane ki talialalai. La asuraku ikai kwini, lukakaiya la kitudrulru ku vaeva ka pange ku twalai ki tatupangepangeane, pakeela ku takaneane eleme ku pange ki cekele.