Yerimia 36 - Ngudradreadrekadhane Ka Sisiu 魯凱語聖經

Ku Baruce yakai ki daane ki Tamatama paipai ku Sisiu si silrigu

¹ Sa tara supatenga ku taatalialaladhane ki swa Yuda ki Yehuiakime ka lalake ki Yusia, ku Tamatama amia kai nakwane,

² “Malra ku nibalrulane ka hungu, kudra la pelaelali muswane ku ngwakai ki swa Iseraylri, Yuda, si lakuni patuelre pacaasa. Twalai ki Yusia ka talialalai pakela kaikameane, kudra kawrivangali muswane ku vaga, pacasa patuelre.

³ Ku laumawmase ki swa Yuda sana kilalra ku lrika apapianeli liniane pulebe ku amatikurwane, alau lri cilri ki ngialisiane ka kadalranane. Lukamiyaiya kai lri pacepaku ku tapasalrivane lini.”

⁴ Ala, dawlaku ki Baruke ka lalake ki Niria, si pelaela iniane nguvavaeeva ku papia nakwane kawriva ki Tamatama; kwi lasu la pacase pikai ki nibalrubalrulane ka hungu.

⁵ La cunaku ki Baruke iya kai, “Kiapakaicilraku mwa ki daane ki Tamatama,

⁶ lakamani, ani mwa amiaku muswane ki daane ki Tamatama lu pela ka talailaisane ka vai, si papia ki laumawmase silrigu kwini pacasesu pikai ki nibalrubalrulane ka hungu, lani kilalalra kwi lalasu ku takawrivane nakwane ki Tamatama, la aravagaku pelaela muswane. Ikaiya ki akilalrane makanaelre ki laumawmase silrigu, lani dulru kilalra kudra twalai kidruanga kela ka swa Yuda ka umawmase.

⁷ Kwi lalasu alau lri papia ki Tamatama kitubi, si cilri ki ngialisiane ka kadalranane lini, asi lwiyane ku Tamatamayakai ki girimucaneini pakilriingau pakipapawlringau liniane.”

⁸ Ku lalake ki Niria ka Baruke ala singikai ku tapelaelaneli, ikai ki daane ki Tamatama silrigu ku vaga ki Tamatama.

⁹ Sa taralrimanga ka caili ki sakabangate ki dramare ku taatalialaladhane ikai Yuda ki Yehuiakime, ku laumawmase pakai ku akikiragadhane ki Tamatama, peaelaela palaisi. Makanaelre ku swa Yerusalrime si twalai Yuda kidruanga kainganai ku laumawmase lri paluludu makanaelre ku talailaisane ka vai.

¹⁰ Ku Baruke la icucubungu ki laumawmase silrigu ku taiyaneli, ku nipacasane pikai ki nibalrubalrulane ka hungu kudra vaga; ku taikaiyane yakai ki daane ki Tamatama, ka taikaikaiyane ki Gimaria ka lalake ki Sapange ka amani ku tarapacapacase ikai ki daane ki Tamatama. Kikai daane kai yakai belenge ki kalatadrane, dethe ki samamudaane ki daane ki Tamatama ka “Bavane ka lrawlrawdru”.

Papia ki latabebelenge silrigu

¹¹ Ku agane ki Sapange, ku Mikaia ka lalake ki Gimaria kialalra ki Baruce sa silrigu kwini nipacasane pikai ki nibalrubalrulane ka hungu ka vaga ki Tamatama,

¹² la mwa ki daane ki tarapacapacase ikai ki daane ki talialalai. Sakamani kwidra, ku latabebelenge makanaelre yakai kwini madrekadrekadrekase. Ku tarapacapacase ikai ki daane ki talialalai ka Ilrisama, Dilaia ka lalake ki Simaia, Ilinathange ka lalake ki Akebure, Gimaria ka lalake ki Sapange, Zidikia ka lalake ki Hanania, si drumane ka latabebelenge yakaai makanaelre.

¹³ Ku Mikaia kudra kilaalraini, si tasilrigwane ikai cucubungu ki laumawmase ki Baruke kudra vaga ngwa vavaeeva pelaela liniane.

¹⁴ Kwi lalasu la sikawlu ki Yehudi ka lalake ki Nithania ka agane ki Selemia ka kacwi ki Kusi katwase dawlu ki Baruke, iluka la iya iniane kudra ikaini cucubungu ki laumawmase silrigu kudra hungu ka nibalrubalrulane. Ku Baruke la iluku kwini nibalrubalrulane ka hungu si mwa liniane.

¹⁵ Kwi lalasu la iya kai iniane, “Nenea, si silrigu pakilalalra naiane!” Ku Baruke la silrigu.

¹⁶ Kwi lalasu sa kilalranga, mathathiburu si madredrele, la iya kai ki Baruke, “Lri tara pelaela nai kilakikai ki talialalai.”

¹⁷ Kwi lalasu la kivavaga iniane, “Ala pelaela naiane, watumanesu pacase kikai lavaga? Yerimia ka peaelaela muswane?”

¹⁸ Ku Baruke la tubalre, “Yerimia ka ngwavavaeva pelaela nakwane; la arakaiyaku ku icecelrenge ka sapacapacasane pacasaku pikai kai ki nibalrubalrulane ka hungu.”

¹⁹ Kwi lalasu la pelaela liniane, “Kusu si Yerimia tarakilepenga, madha pathingathingale ki palrapalra ku taikaiyane numi kilepenge.”

Ku talialalai walama ku nibalrubalrulane ka hungu

²⁰ Ku latabebelenge wasuru kwini nibalrubalrulane ka hungu pikai ki taikaikaiyane ki Ilrisama ka tarapacapacase ikai ki daane ki talialalai, ala katwase mwa ki daane ki talialalai. Si pelaela ki talialalai kikai patuelre.

²¹ Ku talialalai la sikawlu ki Yehudi katwase malra kwini nibalrubalrulane ka hungu. Ku Yehudi la mwa ki taikaikaiyane ki Ilrisama ka tarapacapacase ikai ki daane ki talialalai malra si kainganai, la silrigu pakilalalra ki talialalai si yakai maecebe ki talialalai ka tabebelenge.

²² Sakamani kwidra kalakecelrane, ku talialalai yakai ki taikaikaiyaneini luka kalakecelrane si nene icucubungu ki talabwane idididiu.

²³ Ku Yehudi sa asi tulru, asi supatenga silrigu, ku talialalai la arakai ku bakale purici kwini ki nibalrubalrulane ka hungu, si cilri pwa ki talabwane. Kwi lasu wagelregelre pakeela ku takawtuane kulama.

²⁴ Ku talialalai si tabebelengeini sa kilalra kwini vaga ka pacase ikai ki nibalrubalrulane ka hungu, kadrwa ku natikiyanenga ku kiwcane, la kai thirace ku laimai tusatubiane.

²⁵ Adravane sa ruthuku madha lamalama kwini nibalrubalrulane ka hungu iya ku Ilinathange, Dilaia, si Gimaria, ku talialalai kai twamanemane,

²⁶ wadreekaselringa kamani ki lalakeini ka Yerahemele si Seraia ka lalake ki Azeriele, Selemia ka lalake ki Abedile kainganai pwalra nakwane si yakai nakwane ka tarapacapacase ka Baruke. Ai ku Tamatama wamalraanga nakwane sekete.

Ku Yerimia twapela pacase ku nibalrubalrulane ka hungu

²⁷ Kudra pakawriva nakwane ki talialalai ka Yehuiakime, laka Baruke ku wapacase kudra nibalrubalrulane ka hungu sa kilamanga, Ku Tamatama peaelaela nakwane

²⁸ Kudra vaga ku yakai ki lama ki talialalai ka Yehuiakime ka nibalrubalrulane ka hungu tupela pacase pikai ki drumane ka nibalrubalrulane ka hungu.

²⁹ Ku Tamatamawacunu nakwane iya kai ki talialalai ka Yehuiakime, “Walamasu kudra nibalrubalrulane ka hungu, la kivavagasu ku Yerimia ani pacase pikai ki nibalrubalrulane ka hungu ku lrika akabebetethane kai ki kadaengane, amudane ki laumawmase si lanilapulapwane ki talialalai ki Babilunia ka vaga.

³⁰ Ngwalai kikai, Yehuiakime ka talialalai, kwaku ka Tamatama nau pelaela muswane, ku mwabaibalrithi muswane kadrwa ku lri mucungulu ki Davidi ku atalialaladhane. Lu pacaisu lri kicilri kwi kinawmasanesu pikai ubulane, lai lri kucengelrawsu lukavaiyane, lri kupasabusu lukamaungu.

³¹ Ngwalai ku tapasalrivane numi patueelre, lri pathavungaku muswane, si agaganesu si latabebelengesu. Kusu si laumawmase ki swa Yerusalrime si Yuda kai twathengete makanaelre ku pakipapawlringawli, lakamani lri singikaiyaku ku taiyaneli pulebe ku amatikurwane pikai ki kinawmasane numi.”

³² Lakamani, la maalranga naku ku nibalrubalrulane ka hungu si baai ki tarapacapacase ka Baruke, kwi lasu la pacase patueelre ku taiyaaneli. Kwi lasu la tupela pacase patueelre kudra vaga ku yakai ki lama ki talialalai ka Yehuiakime ka nibalrubalrulane ka hungu, la driima naku ku thadalrane ka vaga.