Yerimia 35 - Ngudradreadrekadhane Ka Sisiu 魯凱語聖經

Yerimia si Rikabe ka zuku

¹ Sa atalialalai ki swa Yuda ku Yehuiakime ka lalake ki Yusia, ku Tamatama amia kai nakwane,

² “Lu silapa ki swa Rikabe, si pelaela ku amakakawrivane numi ku vai, ala ililuku liniane mudaane ki daane ki Tamatama ki taluvale ka daane, la paungulu liniane ku bava.”

³ Ala malraku ki Rikabe ka zuku makanaelre ka lagagane ki Habazinia, Yazania ka lalake ki Yerimia si labetakane si lalalake makanaelre

⁴ ililuku pudaane ki daane ki Tamatama makanaelre. Waililukaku liniane mwa ki daane ki situ ki yuginsia ka Hanange ka lalake ki Izidalia. Kikai daane yakai belenge ki daane ki mabelenge ikai ki daane ki Tamatama ka Masia ka lalake ki Salume, wadethe ki daane ki drumane ka latabebelenge.

⁵ Ala malraku ku kupu si swaete ku bava ka dilrungu pikai cucubungu ki Rikabe ka zuku, si iya kai liniane, “Ala ungula!”

⁶ Ai kwi lalasu amia kai, “Kai nai lri ungulu kai bava. Ku cucungulane nai ka Yunadabe ka lalake ki Rikabe wadrekase naiane si mwabaibalrithi naiane, madha ungungulu ku bava,

⁷ madha tudadaane, madha kauawngu, la madha lredrelredreke ku budu madha ikaikai ku babududu iya. Wadrekase naiane ku amakalawtwane nai ikaikai ki daane ka balrawbau, ku lrika adulrwane nai kawlai ikai ki taikaiyane ki badhabadha.

⁸ Paluludu nai patuelre ku pelaela naiane ki cucungulane nai ka Yunadabe ka lalake ki Rikabe, si kai ungungulu ku bava; ku taelrelre nai lalalake nai la mialri kai ungulwana ku bava.

^9-10 Kai nai twadaane, la ka kadrwa ku babududu ku umawma, la kai kauawngu. Pasalaladha nai ku drekase ki cucungulane nai ka Yunadabe, pangimia ku taiyaneini patuelre, ka taikaiyane ki balrawbau ka daane.

¹¹ Ai, sa kela kikaruburu kai ku talialalai ka Nibukadenezere, malrithethe nai ku wamwa Yerusalrime, mubere ki kwapingi ki swa Babilunia si Siria. Miyaiya kai, ala kamani ku ikai nai kai Yerusalrime.”

^12-13 La pacungulu, ku Tamatama ka abebeelengenga ki sanaka kwapingi, ka Twaumase ki swa Iseraylri wacunu nakwane papia ki laumawmase ki swa Yuda si swa Yerusalrime iya kai, “Kwaku ka Tamatama lri kivagaku numiane, anu kai kilalra ku vagali, anu kai pasalaladha ku tapelaelaneli?

¹⁴ Ku agagane ki Yunadabe ka lalake ki Rikabe tapaluludane ku drekase ki Yunadabe, pakeela kaikameane kadrwana ku umawmase ku waungulu ku bava.

¹⁵ Ai apapelaelaku sikawlu ki sasiakawluli ka yuginsia padaruru numiane ku vaga, pasapukwane numiane cilri ku ngialisiane, si pia ku mapapedrenge ku awngane. Kwi lalasu pakiapapawlringau numiane ku kaika asukubane pasikai ki drumane ka latwaumase, ku lrika adulrwane numi pacungulu ikai kai ki patarumarali baai numiane si cucungulane numi kikai kadaengane. Ai kai numi maka kilalra, la kai numi pulrialrialringau.

¹⁶ Ku agagane ki Yunadabe ka lalake ki Rikabe paluludu ku drekase ki cucungulane lini, la kai numi kilalra pasalaladha nakwane.

¹⁷ Lakamani, kwaku ka Tamatama, ka abebeelengenga ki sanaka kwapingi ka Twaumase ki swa Iseraylri lri singikaiyaku ku taiyaneli pulebe ku maadrau ku amatikurwane pikai ki kinawmasane ki laumawmase ki swa Yuda si Yerusalrime. Asi lwiyane ku kawrivarivali numiane, kai numi maka kialalra; lu dawlaku numiane la kai numi tubalrebalre.”

¹⁸ Sakabilrilinga peaelaelaku ki Rikabe ka zuku, ku Tamatama ka abebeelengenga ki sanaka kwapingi, ka Twaumase ki swa Iseraylri amia kai, “Kialalra numi pasalaladha ku drekase ki cucungulane numi ka Yunadabe, si paluludu ku pelaelaini patuelre, la pangimia ku vagaini.

¹⁹ Lakamani, amiaku kai pukawnu ka Tamatama, ka abebeelengenga ki sanaka kwapingi, ka Twaumase ki swa Iseraylri: Ku daane ki Yunadabe ka lalake ki Rikabe lrika taikaiyane ku sawvalai ku pasiakaikai nakwane.”