Yerimia 34 - Ngudradreadrekadhane Ka Sisiu 魯凱語聖經

Sapelaelane ku vaga ki Zidikia

¹ Ku Nibukadenezere ka talialalai ki swa Babilunia si lakwapingini, si lakwapingi ki rathuduini ka lakuni lazuku sa lringulu kikaruburuburu Yerusalrime si ngiathalringulu ki lacekele, ku Tamatama papia nakwane kawriva.

² Ku Tamatama ka Twaumase ki swa Iseraylri wacunu nakwane mwa pelaela ki Zidikia ka talialalai ki swa Yuda iya kai, “Kwaku ka Tamatama lri baadhaku kai cekele ki talialalai ki swa Babilunia; kwi lasu lri lama kabebetethe.

³ Lutuumane lri kaisu maka mubere; lri kipwalrasu, si pikai ki alrimaini. Lri maicubungu numi si kikawriva iniane, ala lri kiililukusu pwa ka Babilunia.

⁴ Zidikia, kilalra kicacaligiri! Ngukai muswane, amiaku kai: Kaisu ka lri pacai ikai takikaruburane;

⁵ Lri kasuliivatesu pacai. Ku umawmase lai lri dralreke muswane, si pasikai muswane lama ku sangwalreme, mia ki cucungulanesu, ka amani kudra laaswalalala muswane ku talialalai, yakai ku umawmase ku wadralreke liniane, la pasikai liniane lama ku sangwalreme. Ku umawmase lri silringau muswane, si tubi iya kai, ‘Ai, talialalai nai!’ Tamatamaku; ka amia kikai pelaela.”

⁶ Lakamani, yakaiyaku Yerusalrime si padaruru kikai vaga ki Zidikia.

⁷ Sakamani kwidra, ku talialalai ki swa Babilunia wasangiluku ki lakwapingi si icengeecenge lringulu kikaruburuburu ki drwadrusanga ka cekele ka swa Yerusalrime si swa Yuda ka Lakise si Azeka, asi lwiyane kai swa Yuda kathanenga kikai drusa ka cekele ku nikepalane ka cekele.

Wabaebalre ku tamakaketeketane ku akimukerengane ki duri

⁸ Ku Zidikia ka talialalai namakaketeketenga ki laumawmase Yerusalrime, lri mukerenge

⁹ ki swa Hiburu ka laduri, adravane ka sawvalai ka ababai, lri mukerenge makanaelre, ku kaika aikaiyane ku kiatuduri ku sakacekele ka swa Iseraylri.

¹⁰ Makanaelre ku kiaketekete kai ku laumawmase si latabebelenge palraaingi makanaelre mukerenge ki laduri lini, si kai tuduringa liniane. Kikai laumawmase la pangimiya makanaelre kai ki nimakaketeketane, si mukerengenga ki laduri.

¹¹ Ai sakabilrilanenga kai lalasu akabalrithi ku takidremedremane, si malra pasiwlri ki laduri, la peelanga paaduri liniane.

¹² Ngwalai kikai, ku Tamatama papiyanga nakwane kawriva.

¹³ Ku Tamatama ka Twaumase ki swa Iseraylri pakawriva nakwane papia ki laumawmase, iya kai, “Sa twaladhaku Izipiti ka takituduriane ki cucungulane numi alra palribulu liniane yai, kiaketeketaku liniane. Wacunaku liniane,

¹⁴ sana tarapitu ka caili lri mukerenge kudra ngiakakilangai si aduri liniane ku swa Hiburu ka sakacekele. Sana kaungunga tara eneme ka caili atara pangilralrainganenga liniane. Ai kwi cucungulane numi kai twamanemane nakwane, la kai kilalra ku vagali.

¹⁵ Kaiasasane, akabalrithinga kwi tangivelevelane numi, si pia kwi kadalameli ku awngane. Palraingi numi mukerenge ki duri ka swa Iseraylri ka sakacekele, la kainganai mucucubungu nakwane, si ikai ki tasukusukubane nakwane ka daane ki Tamatama kiketekete.

¹⁶ Ai akabaalrithinga kwi takidremedremane numi, tudreadrekasenga nakwane. La malra numi pwalra si pasiwlri ki kimukerengenga, ngialralrainginga ka laduri, si tuduuringa liniane.

¹⁷ Lakamani, kwaku ka Tamatama amiaku kai: Kai numi pasalaladha nakwane, mukerenge ki aduri ka sakacekele ka swa Iseraylri. Kunumi dredrelanga! Lri pakatwasaku numiane, lanu katwase si kipadradresenge ki akikaruburane, ki swalrubu, si silravane la pacai. Lri padredrelaku ki kiacaebe ki belenge sanaka umawmase ku takipadradresengane numi si lai lri kathathiburu mukuludru.

^18-19 Ku latabebelenge ki swa Yuda si Yerusalrime, latabebelenge ikai ki daane ki talialalai si labarakalai, laka tarasangililuku makanaelre kiaketeketenga nakwane; kwi lalasu wamalra ku tikiane ku lwange si cukare paudrusa, la ngukakabicelrakane katwase dadavace, sapelaelane ka ngiamianga ku samakaketeketane. Ai kwi lalasu mabebetethenga kwi samakaketeketane, kai paluludu ku takelretane ki samakaketeketane. Lakamani lri malraku liniane cukare paipai, mia ku tacukarane lini paipai ki lwange.

²⁰ Lri malraku liniane si baai ki pasanu papacapacai liniane ka badha; ku wapacai ka kinawmasane lini lri akaneane ki ngiapalapalai ka laadhadhame si lawaudriwdripi.

²¹ Lri malraku ki Zidikia ka talialalai ki swa Yuda si tabebelengeini makanaelre, la baai ki kiasanu papacapacai liniane ka badha; lri malraku si baai ki siaulriana padawdaalru ka kwapingi ki swa Babilunia.

²² Lri drekasaku ki kwapingi ki swa Babilunia siwlri kainganai mwa kai ki cekele. Kwi lalasu lri kikaruburu, lri drikisi ku kadaengane, lai lama kai ki cekele. Lri paawbulanenga naku ki lacekele ki swa Yuda, kadrwa ku umawmase ku yakaikai. Tamatamaku; ka amia kikai pelaela.”