Yerimia 33 - Ngudradreadrekadhane Ka Sisiu 魯凱語聖經

Peaeelanga pukawnu ku asiwlriwlriane ka kuni

¹ Sa ikaiyana naku taememengane ki daane ki talialalai, ku Tamatama peaeelanga kawriva nakwane.

² Kudra amani ku wadarepe ki kadaengane, si pasutelrai ku taikaiyane ki kadaengane, ka wabekace ka sia Tamatama kawariva nakwane, amia kai,

³ “Lu kitubisu nakwane, lri tubalreaku; lri pelaelaku kudra kaika thingalesu ku saniange matisamali ka laawngane.

⁴ Amiaku kaika Tamatama, ka Twaumase ki swa Iseraylri: Ku ladaane Yerusalrime si daane ki talialalai ki swa Yuda lri kimalringilringulu makanaelre, si kikabebetethe.

⁵ Yakai ku laumawmase ku mwalatadre ki cekele si kiecebe ki swa Babilunia; ku swa Babilunia lri malra kudra kinawmasane ki wapacai pasuete ki cekele ka amani kudra sa icengecengaku kalisilisi si papacai ka laumawmase. Ngwalai ku tapiane ku ngialisiane kai ki laumawmase kai ki cekele, wacilringa naku kai ki cekele.

⁶ Ai lri sulravaku pawdringai kai ki laumawmase ki cekele, ku lrika asiwlriwlriane mudringai. Lri pangulwadhanaku liniane pakisupilri ku rathudane, asutelradhane.

⁷ Lri pasiwlriaku mubalriu ki swa Yuda si swa Iseraylri, si tupela tucekele.

⁸ Lri sinavaku bula kudra tapasalrivane lini nakwane ku pasalrivane patuelre, la pacepe patuelre ku pasalrivane lini ku tabaebalreane nakwane.

⁹ Ku swa Yerusalrime lri pakiragai nakwane, pakiwsakene si kisupilri ku lrigu. Kai kawmasane ku lakuni lu kilalra ka swabulrubulrwaku ki laumawmase ki swa Yerusalrime, si ngipelanenga ngiradhekane kikai cekele, lri kathathiburu manugiligili.”

¹⁰ Ku Tamatama amia kai: “Lri aubulane kikai kadaengane kai, ka kadrwa ku umawmase, la ka kadrwa ku waudriwdripi lri iya sanaka umawmase. Unu, matiasepelenga ku lacekele ki swa Yuda si lakadadalranane cekele Yerusalrime, kadrwa ku waudriwdripi, la ka kadrwa ku umawmase ku yakaikai. Ai lri ikaai numi kilakikai pela kilalra

¹¹ Ku lingau ki kiarararagai mawlrakalrakalrakai si marudrarudrange ngiakanekaneane. Lai lri kilalra numi ku patarwamaramara ku Sakiaseasenane ka lrisi ka senai ikai ki daane ki Tamatama; kwi lalasu lri senai: Akiaseasenane ki Tamatama ka abebeelengenga ki sanaka kwapingi! Asi lwiyane kwi lasu masulrapele; ku sakialibakeini lri ikai palralrawthu. Lri pasiwlriaku numiane mubalriu, si tupela tucekele. Tamatamaku; ka amia kikai pelaela.”

¹² Ku Tamatama ka abebeelengenga ki sanaka kwapingi amia kai pelaela, “Kikai aubulane, ka kadrwa ku umawmase si waudriwdripi ku yakaikai ka kadaengane lri ngipelane adrelane ku tapagwagwagwane, ku tarapagwagu lai lri ikai kwini pagwagwagu ki kiu.

¹³ Ku yakai lregelrege ku lacekele, ku ngwadadethe dratane ku lacekele, tali lrawdru ki swa Yuda ku laswakai kwini, ku laswakai kwini ki Biniyamingi, lacekele ngithalringulu Yerusalrime, si lacekele Yuda, ku lataraagu lri ikai kwini pela asipi ki lakiu lini. Tamatamaku; ka amia kikai pelaela.”

¹⁴ Ku Tamatama amia kai, “Lri kelanga ku vai, lri pangimiaku ku pukawnungali ki umawmase ki swa Iseraylri si swa Yuda.

¹⁵ Lukamaninga kwidra, lri pasikaiyaku ki Davidi pangiradhekane ku ‘Ricingi’ ka dringelresane; kwi lasu lri ikai kai ki kadaengane si arakai ku aparamaramavane dringelresane rathudu ki kuni.

¹⁶ Ikai ki tarathudaneini, ku laumawmase ki swa Yuda lri kapapedrepeedrenge ku tacekecekelane, ku swa Yerusalrime lai lri kisupisupilri ku sulivatane. Kikai cekele lri kipasudalepe ka ‘Ku Tamatama amani ku dringelresane nai’.

¹⁷ Tamatamaku ka paiya kai pukawnu: Ku mwabaibalrithi ki Davidi lri palralrawthu rathudu ki swa Iseraylri;

¹⁸ ku swa Lrivi ka zuku lrika palralrawthu abarakalai, si kamani ku marasiakaikai patarumara nakwane ku Lama ka lrisi, Taleke ka lrisi, si sapatarumarane ka waudriwdripi.”

¹⁹ Ku Tamatama amia kai nakwane,

²⁰ “Kiaketeketenga naku ki vaiyane si dradrimitane, ku lrika atara pasalaladhane lini ki tangimiamiane ngivelevele; kikai samakaketeketane kai lri maka dulru cilri.

²¹ Laka thadalrane, kiaketeketenga naku ki sasiakawluli ka Davidi, ku ngwakai iniane ku atalialaladhane lai lri kapalralrawthu pacungulu. La mialriaku kiketeketenga ki swa Lrivi ka zuku, ku lrika apalralrawthane abarakalai si pasikaikai nakwane; kilakikai samakaketeketane lri mialri kaika adulrwane cilri.

²² Lri paedhalaku ku umawmase ki mwabaibalrithi ki sasiakawluli ka Davidi si barakalai ka swa Lrivi ka zuku, mia ki tariau subelebelenge, ki enai babiabila ki laveke, ka kaika amakaasiasipane.”

²³ Ku Tamatama amia kai nakwane,

²⁴ “Wathingalesu? Wacilringa amiamia nakwane makanaelre sanaka umawmase ki pilrili ka drusa ka kuni ka swa Iseraylri si swa Yuda. Kwi lalasu siadreadrekase ki kawkawluli, la kai malra tukuni liniane.

²⁵ Ai kwaku ka Tamatama kiaketeketenga naku ki vaiyane si dradrimitane; wakelretaku ki sakwa ka tangimiamiane ka amani ku marasiakaikai belenge si kawmasane.

²⁶ Ku tamakaketeketane nai ki sakwaka tangimiamiane kaika adulrwane cilri; lai lri tungimiyaiyaku pangimia ku tamakaketeketane nai ki mwabaibalrithi ki Yakubu si sasiakawluli ka Davidi. Lri patwaladhaku ki mwabaibalrithi ki Davidi pilri ku tangeea ka talialalai ku lri rathudu ki agagane ki Aberahame, ki Isake, ki Yakubu. Lri arakaiyaku ku thalradhane marasikai liniane, si pasiwlri mubalriu liniane, la tupela tucekele.”