Yerimia 32 - Ngudradreadrekadhane Ka Sisiu 魯凱語聖經

Ku Yerimia walangai ku takauawngane ka kadaengane

¹ Ki sakamangeale ka caili ku tarathudane ki swa Yuda ki Zidikia, mialri ka saka taramangeale si valru ka caili ku tarathudane Babilunia ki talialalai ka Nibukadenezere, ku Tamatama papia nakwane kawriva.

² Sakamani kwidra, ku kwapingi ki talialalai ki swa Babilunia yacengeecenge lringulu Yerusalrime, kiaemengaku ikai taememengane ki daane ki talialalai.

³ Ku talialalai ka Zidikia waemenge nakwane, maelaela nakwane ku tasakaladhaneli. Napeaelaelanga naku ku Tamatama amia kai, “Lri malraku kikai ki cekele si baai pikai ki alrima ki talialalai ki swa Babilunia, kwi lasu ani drikisi ku kadaengane.

⁴ Ku Zidikia ka talialalai kai lri maka mubere; malra iniane si baai ki talialalai ki swa Babilunia, lani maicubungu makakawriva ki Nibukadenezere.

⁵ Kwi lasu lri kiluku mwa ka Babilunia, lai asuru ikai kwini, ukalavalava nakwane ku apathavunganeli iniane. Adravane makakaruburu ki swa Babilunia, kwi lasu kai lri maka dulru akaci lutumane. Tamatamaku; ka amia kikai pelaela.”

⁶ Ku Tamatama peaelaela nakwane,

⁷ Lri kela drele nakwane ku Hanamele ka lalake ki Salume ka betakane ki ama. Kwi lasu langadha amia nakwane kudra takauawngane ka kadaengane ka yakai ki swa Biniyamingi ki cekele Anatute; asi lwiyane amaniaku ku sadedeethenga ka retesaneini, yakai ku avuthaneli pasikai langai sawlri si dulru ka aswalalanga langai.

⁸ Lakamani, miyaiya ku taiyane ki Tamatama, kwi kadralrali ka Hanamele wakela taememengane drele nakwane, si langadha ku kadaenganeli iya kitubi nakwane. Kikai miyaiya kai, wathingalaku patengatengane ka taiyaneenga nakwane ki Tamatama.

⁹ La langadhaku ku kadaengane ki Hanamele, si tintingi la baai iniane ku 17 ku gingi.

¹⁰ La pasiwmiaku ki umawmase, si pacase ku nagane ki samakaketeketane ki kadaengane, la pwa caebe si punulri, la tintingi ku gingi.

¹¹ Ala, singikaiyaku ku takelretane ki hulrice, malraku kudra taidrusane ku samakaketeketane ki kadaengane, ku taingeane nicaebane, ku taingeane nimucaebane,

¹² la baai ki Baruke ka lalake ki Niria ka agane ki Mahesia, ikai cucubungu ki Hanamele si wasiwmi pacase ku nagane pikai ki samakaketeketane ki kadaengane si yakai ki taememengane ka swa Yuda ka laumawmase makanaelre.

¹³ Amiaku kai ki Baruke ikai cucubungu liniane,

¹⁴ “Ku Tamatama ka abebeelengenga ki sanaka kwapingi, ka Twaumase ki swa Iseraylri wadrekase muswane ku amalranesu kikai taidrusane ka samakaketeketane ki kadaengane, ka nicaebane si nimucaebane tara pudringai sekete pwa ki dilrungu, apakawladhane pudringai.

¹⁵ Asi lwiyane ku Tamatama ka abebeelengenga ki sanaka kwapingi ka Twaumase ki swa Iseraylri nakawarivanga, ku umawmase lri tupela ikai kai langai ku ladaane lakadaengane, si babudubudu.”

Inulri ki Yerimia

¹⁶ Sa baainga naku ki Baruke ku samakaketeketane ki kadaengane, papiaku ki Tamatama inulri,

¹⁷ “Abebeelengenga ka Tamatama, arakaisu ku maadrau ka pukusu bekace belenge si kawmasane; ikai muswane, kadrwa ku kaika adulrwanesu sanaka maneemane.

¹⁸ Naarakaisu ku kai akabalribalrithi ku sakialibake pasikai ki sanaka umawmase, ai ngwalaisu ku tapasalrivane ki marudrawdrange si paucugu ki lalalake. Saniangesu ka yakai ku maadrau ku puku ka Twaumase; ku naganesu yai Tamatama ka abebeelengenga ki sanaka kwapingi.

¹⁹ Ku kikakesu saniange, ku tangivelevelanesu mwakalrivili; maka wadrelesu ku tangivelevelane ki umawmase, si singikai ku kakwakudhane ki sanaka umawmase bilri iniane.

²⁰ Nayakaisu Izipiti pia ku pinangu Twaumasane ka puku ka matisamaimali; la mialrisu ikai Iseraylri si lakuni pia ku pinangu Twaumasane ka puku ka matisamaimali. Lakamani, kaikameane yakaisu ki laumawmase kimatikaikai.

²¹ Arakaisu ku pinangu Twaumasane ka puku ka matisamaimali si pakathathiburu ki badha nai, la arakaisu ku madrau ku puku ililuku ki kawkawlusu ka swa Iseraylri katwase Izipiti.

²² Pangiamiasu kudra pukawnungasu ki cucungulane lini, si patarumara baai liniane kudra mwalwalwaludru ku mireke si valu ka malrange ka kadaengane.

²³ Ai kwi lalasu sa kainganai mudaane, si malranga kikai kadaengane, kai pasalaladhanga ku drekasesu, kai pangiamianga ku sabulwanesu. Ku drekasesu pia kwini iya liniane, kwi lalasu kai paiya patuelre, lakamani ku pakipadradresengesu liniane ku maadrau ku amatikurwane.

²⁴ “Ku swa Babilunia walrukunga ku tasakaiyane kikaruburu, si pathagilinga kikaruburu. Kikai cekele lri ngwalai ki makaruruburu, ki silravane, ki swalrubu si kimalra ki badha. Kudra iyaiyasu ku amatikurwane mwataluvaivainga; patakamacamacangasu drele.

²⁵ Abebeelengenga ka Tamatama, adravane ka lri padalrunga si lri mucekele ku swa Babilunia, wadreekaseananasu nakwane ikai cucubungu ki wasiwmi ka umawmase palangai kavai ki takauawngane ka kadaengane.”

²⁶ Ku Tamatama la iya kai nakwane,

²⁷ “Tamatamaku, ka Twaumase ki sanaka umawmase. Yakai ku kaika adulrwaneli piya?

²⁸ Kai cekele kai lri badhaku ki Nibukadenezere ka talialalai ki swa Babilunia si ililukuini ka lakwapingi, kai lalasu lani drikisi liniane.

²⁹ Ku lri kikaruburu ki cekele ka swa Babilunia lri mudaanenga ki cekele, si lri lama patuelre, adravane kudra taikaiyane ki swa Iseraylri talrugulrugane si papia ki Baale lama ku sangwalreme, la papia ki latwaumase paralikiliki ku bava pakagirimucu nakwane kwini la daane, lri kilama patuelre.

³⁰ Kai laumawmase ki swa Iseraylri si swa Yuda twalai satau tukuni pakeela kai pasalrisaalriu pakagirimirimucu nakwane.

³¹ Twalai satau tucekele Yerusalrime pakeela kai, kai laumawmase la mialri kai ateateke pakagirimucu nakwane. Wakelretenga naku ku amudane kai ki cekele;

³² asi lwiyane kai laumawmase ki swa Yuda si Yerusalrime, adravane ka latalialalai lini, latarasangililuku, labarakalai, layuginsia paiya ku ngialisiane makanaelre.

³³ Kai lalasu walrilrikudru nakwane si kai thingale; kainaku watelrai bulru liniane, kai lalasu kai maka kialalra, la kai mubangalre kicawcakwane.

³⁴ Kwi lalasu yakai ki tasukusukubane ka daane ki Twaumase patarumara ki mativalracevace ka samiamiange, wakudrulrunga ki daane ki Twaumase.

³⁵ Kwi lalasu yakai Hinume valrwalru tutapatarumaramarane ki Baale, la malra ki lalalake lini si lama patarumara ki Muleke. Kainaku wadrekase liniane pia kikai miyaiya kai iya, la kainaku pakelana kidremedreme ki lalasu kalri pia kikai miyaiya kai si papasalriu ki umawmase ki swa Yuda.”

Pinukawnanenga ku asiwlriwlriane ku kuni

³⁶ Ku Tamatama ka Twaumase ki swa Iseraylri amia kai nakwane, “Yerimia, amiamia kai kikai laumawmase makanaelre, kai amakaruruburane, silravane, si swalrubu lri kamani ku amakiane lini ikai ki alrima ki talialalai ki swa Babilunia. Kaiasasane, kirarakeeta kilalra kai aiyaneli.

³⁷ Sa icengecengaku kalisilisi pakatwasaku ki kawkawluli pwa ki lakuni. Kikainga lri patwaladhaku ki lakikwini malra sarubu liniane, si ililuku liniane siwlri kainganai, lai lri ikai kai kasulivaliivate cekecekele.

³⁸ Lukamaninga kwidra kwi lalasu lri akawkawlunga nakwane, lai lri a Twaumasaku liniane.

³⁹ Lri patarumaraku baai liniane ku asavaevaane ku kidremedreme, lani musakene mukuludru nakwane makalawtu, ngipapasikai si pasikai ki lagagane ku angiesadhanane.

⁴⁰ Lri kiketeketaku liniane tupalralrawthu, si kai telrai pasikai ku angiesadhanane lini, kwi lalasu lani savaevanga ku kidremedreme lini musakene mukuludru nakwane, si kai baebalrenga nakwane.

⁴¹ Lri savaevanga naku ku kidremedreme pasikaikai ku angiesadhanane lini, kai lalasu lani ikai kai ki kadaengane ikai ku balace ikai ku karwalai.

⁴² “Napakiapadradresengaku liniane ku maadrau ku amatikurwane, lai lri mialriaku singikai ku tapukawnaneli patarumara baai patuelre liniane ku akaesadhane.

⁴³ Kikai kadaengane lri aubulanenga, ka kadrwa ku umawmase, lai kakadrwa ku waudriwdripi amiamia makanaelre sanaka umawmase; lri kibaai pwa ki alrima ki swa Babilunia. Ai amiaku kai, ku umawmase lri nguselaela ikai kai si langai ku takauawngane ku kadaengane.

⁴⁴ Ku umawmase lri malangalangai ku takauawngane ku kadaengane ikai ki swa Biniyamingi inu kidruanga, ki lacekele ki ngiathalringulu Yerusalrime, ki lacekele ki swa Yuda, ki langwlralregelrege ka cekele, ki langwadadethe dratane ka cekele, si tali lrawdru ki swa Yuda ka caceekele, lai pacase ku samalangalangadhane ki kadaengane, si caebe kwini samakaketeketane ki kadaengane, la pasiwmi ki umawmase. Lri pikaiyaku kai ki kadaengane ki kawkawluli tupela tucekele. Tamatamaku; ka amia kikai pelaela.”