Yerimia 31 - Ngudradreadrekadhane Ka Sisiu 魯凱語聖經

Ku swa Iseraylri siaulri mubalriu

¹ Ku Tamatama amia kai, “Kudra vai lri kelanga, lri a Twaumasaku ki lazuku ki swa Iseraylri; kwi lalasu lri akawkawlu nakwane.

² Ikai calragulragu, makalithaku kwidra ki laabalu ka umawmase. Sa urikaikai ku aisadrane ku swa Iseraylri yai,

³ twaladhaku adaaili adrelane liniane. Swa Iseraylri, takathalraadhaneli numiane, lai lri arakaaiyana naku ku takapatengatengananeli ka kai akabalribalrithi ka sakialibake kilibake numiane.

⁴ Lri tupelaku cegecege numiane. Lri pelana numi malra ku kilrikilringi, si takudralradralrai kirararagai.

⁵ Lri siwlriwlri numi ikai lregelrege Samaria lredreke ku budu; ku walredreke lri kane ku twalai ki babudubudu.

⁶ Lri ikai ku minaka vaalane, ku taradrangalrungalru ku umawmase lri ikai lregelrege Iparaime tawtau, ‘Bwala! Lri mwata Ziyungu kikawriva ki Tamatama ka Twaumaseta.’ ”

⁷ Ku Tamatama amia kai: Kunumi pasikaiya ki swa Iseraylri senai kiraragai, pasikaiya ki sanianiiangenga ka kuni akwadrau karaleale, kunumi senadha ku sadrengedrengerane ka senai: Ku Tamatama palribulunga ki kawkawluini; ku Twaumase paralubu palribulu ki abalu ka laumawmase ki swa Iseraylri.

⁸ Drela, lri patwaladhaku tali dradha malra liniane ililuku kainganai, patwalai inukidruanga sarubu liniane. Ku ngumamacane, pilapilai, tawbaliri, tautulalalake, makanaelre lri turededele si karedele liniane kainganai.

⁹ Drela! Kai kawkawluli lri tarakadadalranane takutubitubi kainganai; kwi lalasu lri tupapalra nakwane katwase, lai tarakadalranane inulri. Lri ilukaku liniane lribate ki lavaalru, ililuku liniane ngukakai ki masadrarate ka kadalranane, ku kaika angwadrekane lini. Tamaku ki swa Iseraylri; Ku Iparaime amani ku eapeli ka lalake.

¹⁰ Ku Tamatama amia kai: Sanaka kuni, kunumi kiraraketa kilalra ku vagali, kunumi lri ikai numi adaaili ki kabicelrakane ki laveke ka kadaengane pelaela kai vagali. Pakatwasaku pasarau ki kawkawluli, ai lri pelanaku sarubu liniane; lri palakebaku liniane, mia ki taraagwagu lu palakebe ki lakiu.

¹¹ Mwakerengengaku ki swa Iseraylri, patwalai ki alrima ki magarange ka kuni palribulu liniane.

¹² Kwi lalasu lri kainganai, si lri ikai Ziyungu lregelrege senai kiraragai; kwi lalasu lri kalrungulrungu kainganai, si kisupilri ku makalra ka acebeli ka lataleke, bavane ka bava, ulrive ka lawlau, lwange si kiu. Kwi lalasu lri mia ki aciacilai ka umawma; kwi lalasu kadrwanga ku akawramane lini.

¹³ Lu kamani kwidra, ku la pathagili ngitawvaileketane lri kiraragai si dralradralrai; ku latarudrawdrange si yacengecenge lai lri masiasilange kiraragai. Lri paasakiaragadhaku ku tubi lini, lri saasa liniane, ku kwalrialri ki kidremedreme lini lai asakiaragai.

¹⁴ Lri pakakalraku pangwalwadhane ku akaneane ki labarakalai; lri kai kawramenga ku kawkawluli. Tamatamaku; ka amia kikai pelaela.

Ku Tamatama makalithi ki swa Iseraylri

¹⁵ Ku Tamatama amia kai: Ikai Rama kialalraku ku lingau ku watubitubi; ku Rakile watubitubi ki lalalake, kai mubangalre kisasa; asi lwiyane wapacainga makanaelre.

¹⁶ Madha tubinga! Sakidra kwi lrese! Kwi takwalrianesu ki lalalake kai lrika alavutha; kwi lalasu lri twalai ki kuni ki badha kainganai.

¹⁷ Kwi lrika angimianesu swaete ku sidramane; ku lalalakesu lri siwlringa mubalriu. Tamatamaku; ka amia kikai pelaela.

¹⁸ Kialalraku ku takwalriane ki swa Iseraylri si iya kai: Tamatama, mia nai ki kai kiabulru ka tikiyane ka lwange, ai wabulrusu naiane, ala kilalra nai. Kiatubi nai ililuka naiane kainganai, lri papia nai muswane; asi lwiyane amanisu ku Tamatama ka Twaumase nai.

¹⁹ Adravane ka wabaebalrenga nai muswane, apia makakaai nai ngibangulu. Lu bulrusu naiane, lri ngitatupela nai; ngwalai ku tapasalrivane nai saka lavavalakeana nai la kiarubwane nai kitusinalreme.

²⁰ Iseraylri, kadalameli muswane ka lalake; ka kathalralraingali muswane ka lalake. Sana matikaiyaku ku naganesu, kai kidremedremeli mavalringiivingaku muswane. Madalamaku muswane turamuru; lri tara kakaalithaku muswane.

²¹ Pikaiya ku sapadrukangane ki kadalranane si cegecege ku nagane ki kadalranane; silapa kudra ngukakaingasu kudra maadrau ka kadalranane. Swa Iseraylri, bwala siwlria! Siwlria mwa ki cekelesu!

²² Amulimuli ki kadalranane ka laumawmase, lri tarathainwana numi kalrikilriki? Yakaiyaku kai kawmasane cegecege ku taingeane ka bavane ka awngane: Ku ababai lri palakebe ki sawvalai.

Waledra ka angimiane ki kawkawlu ki Twaumase

²³ Ku Tamatama ka abebeelengenga ki sanaka kwapingi, ka Twaumase ki swa Iseraylri amia kai: “Sa pasiwlriaku pubalriu ki lakawkawluli si tupudriadringai ki cekele, kwi lalasu lri peelana ikai Yuda ki lacekele iya kai: Taikaiyane ki dringelresane, ka Ziyungu ka saniange ka lregelrege, ku Twaumase ani subulrubulru muswane!

²⁴ Lri tapangalenga ku laumawmase ku yakai ki kadaengane ki swa Yuda si yakai adringi ka lacekele; ku tarakawaungu, taraagwagu, si lakiu lini lri taelre ikai kwini.

²⁵ Lri pakagarangaku ki la kiadulru ku laumawmase, la pakabucuku ki masilrau.

²⁶ Ala lri iya kai ku laumawmase: ‘Masipeelrengenga naku, laka thaithaariri kai kidremedreme lu pacunane.’

²⁷ “Amiaku kaika Tamatama, lri kelanga ku vai, lri pakalegemaku ku umawmase, lai paedhalaku ku lanilapulapwane, pikai ki kadaengane ki swa Iseraylri si swa Yuda.

²⁸ Nawadradrelaku papia liniane pia ku akucane, ku aburukane, ku abalreane, ku akabebetethane, si amudane ka awngane; lai lri mialriaku dradrele papia liniane pia ku alredrekane, cegecege ku awngane.

²⁹ Lukamaninga kwidra, ku umawmase kai lri iyanga kai: Ku tama wakane ku maalriu ku budu, ku valisi ki lalalake malisinga ki alrivane.

³⁰ Ngiabalre, ku aneane ku wakanenga ku maalriu ku budu, lrika aneane ku malisi ku valisi ki alrivane; sanaka umawmasenga ka aneane lri ngwalai ki pasalrivaneini si pacai.”

³¹ Ku Tamatama amia kai, “Lri kelanga ku vai, lri makakamaniaku ki swa Iseraylri si swa Yuda cegecege ku bavane ka samakaketeketane.

³² Lri ngikakamaniaku ililuku ki cucungulane lini katwase Izipiti, nakiaketeketaku liniane. Sawvaladhaku ka taelrelre lini, ai kwi lalasu mabebetethe kikai samakaketeketane. Kikai bavane ka samakaketeketane si supilri ka samakaketeketane makakaela.

³³ Ku bavane ka samakaketeketaneli ki swa Iseraylri miyaiya kai: Ku hulriceli lri pikaiyaku ki tuku lini, pacase pikai ki belenge ki kidremedreme lini. Lri a Twaumasaku liniane, kwi lalasu lai lri akawkawlu nakwane.

³⁴ Kwi lalasu kai lri bulrunga ki pasiagiagisi ki sakacekele iya kai, ‘Thingala ki Tamatama’, asi lwiyane ki kunu palraelre wathiingalenga nakwane. Lri pacepaku ku pasalrivane lini, si kai pulringwnga ku tapasalrivane lini. Tamatamaku; ka amia kikai pelaela.”

³⁵ Ku Tamatama paledra arakai ku vai ki vaiyane, la arakai ki dramare si tariau paledra ki maungu. Ku Twaumase wavelevele ki laveke, la mababikabiki ku bikabiki. Ku naganeini yai Tamatama ka abebeelengenga ki sanaka kwapingi.

³⁶ Ku Tamatama pwakawnu: Sana pacungucungulu ku tangimiamiane ki nibekacane, ku mathariri ka angimiane ki swa Iseraylri lri mialri pacungucungulu.

³⁷ Alaiyasi dulru kai umawmase lekete ku talikaiyane kai subelebelenge, la dulru lekete ku tamwadringane kai tangadrane ki kadaengane, ku Tamatama lri ngwalai ku tapasalrivane ki swa Iseraylri si cilri liniane. Tamatamaku; ka amia kikai pelaela.

³⁸ Ku Tamatama amia kai, “Drela! Lri kelanga ku vai, kai cekele Yerusalrime patuelre, twalai ka Hananile ka daane pakeela ka Piyu ka lrawlrawdru, lri tupela si lrika nakuanenga.

³⁹ Ku tangukaiyane ki cekele lri papia sapakalriwgu si papia daruru ka Garebe lregelrege, lai lri ngivalrituku mwa ka Gua.

⁴⁰ Palraelre ki lregelrege ka valrwalru ka tacilricilriane rubu ki wapacai si laubulu, si drakerale Kiderunge mwa ka talrawane ki Rigi ka lrawlrawdru talikaiyane kwini ki ubulane palraelre, lri kielrelrenga mwa ki swa Yerusalrime, ka lri kasaniange ka cekeleli. Kikai cekele kai lri kikabebetethenga, kai lri kiburukunga.”