Yerimia 30 - Ngudradreadrekadhane Ka Sisiu 魯凱語聖經

Tapukawnane ki Tamatama ki kawkawluini

¹ Ku Tamatama ka Twaumase ki swa Iseraylri

² amia kai nakwane, “Pacasa pwa ki hungu kudra kawrivangali muswane patuelre,

³ asi lwiyane lri kelanga kudra vai, lri pasiwlriaku pamubalriu ki kawkawluli ka swa Yuda si swa Iseraylri si tupudriadringai ku daane. Lri ililukaku liniane siwlri mwa kudra patarumarali baai ki cucungulane lini ka kadaengane; kwi lalasu lri siwlriwlriane malra kikai kadaengane. Tamatamaku; ka amia kikai pelaela.”

⁴ Ku Tamatama amia kai ki swa Iseraylri si swa Yuda:

⁵ Kialalraku ku lingau ku tamanugiligilane, ka makiwcu, kaika masulivate!

⁶ Ala kidremedreema, ku sawvalai twalalake? Anau drele ki sanaka sawvalai ngiakakebere ki barange, mia ki ababai ka kiangeangeange ku atulalakane? Kai lalringau ki lasawvalai makanaelre ani kasaleese?

⁷ Lri matikuru! Kudra matiukukuludru ka vai lri padaalrunga si kela. Kikai vai kadrwana ku miyaiya; kikai yai akwalriane ki kawkawluli ka vai. Ai kwi lalasu lri kipadradresenge ku amatikurwane, ai kai lri pacai.

⁸ Ku Tamatama ka abebeelengenga ki sanaka kwapingi amia kai: Kwini ki vai, lri ngetelaku kudra pikai ki lre lini ku tikungu, lai ngetelaku kudra walrepelrepe liniane ku kicikici, kwi lalasu kai lri aduringa ki maelane ka kuni.

⁹ Kwi lalasu lrika patengatengane pasikai nakwane ka Tamatama, ka Twaumase lini, lri pasikai ki pilrili si cegecege ka talialalai kamani ku mwacungulu ki Davidi.

¹⁰ Kawkawluli, madha kakiwcu; swa Iseraylri, madha mukuludru. Lri twaladhaku ki adaidaidaaili, kudra tamwane numi acaicali ka kuni malra palribulu numiane. Lri siwlri numi mubalriu, si suteelrainga cekecekecekele, kadrwanga ku amukuludrane.

¹¹ Asi lwiyane yakaiyaku tapalra numiane, kalri palribulu numiane. Lri amudaku kudra tapakatwasaneli numiane si pamwa kudra ki kuni; ai kainaku lri amudu numiane. Lri singikaaiyaku ku amalrane numi si bulru numiane, si kai amudu numiane. Tamatamaku ka amia kikai pelaela.

¹² Ku Tamatama amia kai ki kawkawluini: Kwi takadulane numi kai lri maka mudringai, kwi dula kai lri maka kipawdringai.

¹³ Kadrwa ku umawmase kulri kicapili numiane, si cabu kwi dula numi; kadrwa ku sasulravane kulri dulru pawdringai numiane.

¹⁴ Ku siasilangane numi lri kariimurunga numiane makanaelre; kwi lalasu kai lri mupapalangenga numiane. Lri miaku ki kiakaruburu ki badha kikaruburu numiane, ka matiangeange ku tapathavungane numiane. Asi lwiyane kwi pasalrivane numi maadrau turamuru; makaalra ku tapasalrivane numi.

¹⁵ Madha ngwalainga ki takadulane numi tubi; kwi dula numi kai lri maka sulrawnga si pawdringai. Asi lwiyane kwi pasalrivane numi maadrau turamuru si kakalra ku tapasalrivane, ala kamani ku piali kai pathavungu numiane.

¹⁶ Ai, ku wakane numiane, lri kikaane; ku badha numi makanaelre lri kiravase. Ku wadredrepete numiane lri kidredrepete; ku waribici numiane, lri kiribici.

¹⁷ Adravane iya kai ku badha numi: Ku Ziyungu kiacilri ki umawmase, kadrwa ku umawmase ku makalithi; ai lri sulravaku si pawdringai kwi takadulane numi, ku lrika audringadhane numi. Tamatamaku ka amia kikai pelaela.

¹⁸ Ku Tamatama amia kai: Drela! Lri pasiwlriaku pubalriu ki kawkawluli si tupudriadringai ki cekele; lri arakaiyaku ku sakialibake marasikai ki wacekecekele ki Yakubu. Lri pasiwlriwlrianaku liniane tucekele Yerusalrime, ikai ki sakwa ka taikaiyane tupela pudriadringai ku daane ki talialalai.

¹⁹ Kwini yakai kwini kwi laumawmase lri avavaga drengedrengere; kwi lalasu lri kiraragai senasenai. Lri pangiradhekanaku liniane si padrima ku umawmase; lri pasiwlriwlriaku ku akiwsakenane lini, lai kai lri kitusinalremenga.

²⁰ Lri pangiradhekanaku ki kuni lini, pasiwlriwlriane ku angisasingikaiyane lini ku puku; lri pathavungaku makanaelre ku wadredredrepete liniane ku umawmase.

^21-22 Lai lrika umawmase lini ku warathudu liniane; ku tarasangililuku lri twalai liniane. Lu dawlaku iniane, lri kisudaalru nakwane; ku kai kiadawlu nakwane, aneane ku lri thuru deethe nakwane? Kwi lalasu lri akawkawlu nakwane; lai lri a Twaumasaku liniane. Tamatamaku; ka amia kikai pelaela.

²³ Drela, ku lisiane ki Tamatama mia ki sapukuane ka alrilrawgu ka yakai belenge ki awlru ki manganga ka umawmase ngipalrivaevaevange kai idrengedrengere.

²⁴ Ku lisiane ki Tamatama lri padrumudrumulru, pakela ku atulrepeengane ku nau pia iyaiyaini patuelre. Lukamaninga kwidra, ku kawkawluini ala lri thingale kikai.