Yerimia 3 - Ngudradreadrekadhane Ka Sisiu 魯凱語聖經

Kai saliakavaeva ku kidremedreme ka swa Iseraylri

¹ Ku Tamatama amia kai, “Alaiyasi ku taelrelre ka sawvalai la pisadra ki taelrelreini, ku taelrelreini la katwase iniane, si mwa ki drumane karudrange, kwi lasu lri tumaneana dulru malra pasiwlri iniane? Kwi lasu lu pia kikai wakudrulrunga ki kadaengane. Ai swa Iseraylri, padralrasu ki lasawvalai, kikai la pasana kaingananganaianasu silape nakwane.

² Paswabelenga si drele kilakikai lregelrege! Lri dulrwananasu kidringai ku kaika taikaiyananasu pasalriu ki sawvalai? Yakaisu babiabila ki kadalranane mukalavalava ki siasilanganesu, mia ki swa Arabia ka yakai calragulragu lepelepenge, mukalavalava ki bulabulai. Kwini nganganesu ki sawvalai wakudrulrunga ki kadaengane;

³ lakamani ku sapacebeane ki wacebecebe ka udale kai lri mulebe, ku udale ki kalarigarigane kai lri mulebe. Kwi lringawsu athingalane ka tara pasalrisalriu ki sawvalai, la kaisu thingale ka matiainu.

⁴ “Swa Iseraylri! Kaiasasane la iyasu kai nakwane, ‘Tamali muswane, mathalraisu nakwane twalai saka vavalakaku.

⁵ Kaisu lrika takalisiane nakwane, ka taikaiyane ku elathanesu.’ Kikai yai taiyanesu, ai ngiasasingikaikaaisu ku nau tumane iyasu, piapia ku ngialisiane.”

Ku swa Iseraylri si swa Yuda lri tara ngitatupeela

⁶ Ku Yusia saka talialalai ki swa Yuda, ku Tamatama amia kai nakwane, “Wadrelesu kavai kakwakudhane ki kaika mabula ku takaababadhane ka Iseraylri? Kwi alisu wacilri si katwase nakwane, la ikai sanaka lregelrege belenge, ki tailebeane ki sanaka angatu pasalrisalriu ki sawvalai.

⁷ Lu kidremedremaku, lu pianga kilakikai lri siwlriwlri kainganai mwa kai nakwane amiamiaku; ai kwi alisu kai siaulri kainganai; kwidra kaika mabula ku takaababadhane ka takaini ka Yuda la mialri drele kilakikai.

⁸ Ku swa Yuda wadrelenga ku tacilrianeli si katwase ki kaika mabula ku takaababadhane si baebalre nakwane ka Iseraylri, la badhaku ku samakakatwasane ku pacase; ai kwini kaika mabula ku takaababadhane ka Yuda kaika mwakuludru, ngiabaalrelringa aru kanganga, si apairairange,

⁹ kadrwa ku natikianenga ku takainwane. Kwi alisu mialri ka wakudrulru ki kadaengane, kwi alisu wasukubu ki lrenege, ki angatu, pasalriu nakwane.

¹⁰ Sa pianga kikai patuelre, kudra betakane ki Iseraylri ka manganga ku takaababadhane ka Yuda ngiaka siwlriwlriane kainganai, ai kaika pasingiakidremedreme. Tamatamaku; ka amia kikai pelaela.”

¹¹ Ku Tamatama la pelaeelanga nakwane, kai swa Iseraylri adravane cilri si katwase iniane, mathaithaaririana kudra ki manganga ku takaababadhane ka Yuda.

¹² Lakamani, kwi lasu wadrekase nakwane mwa tali dradha, si papia ki Iseraylri iya kai, “Kai saliakavaeva ku kidremedreme ka Iseraylri, bwala siwlria mwa nakwane kikai! Ku sakialibakeli muswane kai maela; kainaku lrika palralrawthu papia muswane kalisi.

¹³ Sana ngithathingalesu ku pasalrivanesu, pelaela ala ka pasalriusu ki Tamatama ka Twaumasesu, ka naiyakaisu ki tailebe ki sanaka angatu mapapasalriu ki twaumase ki maelane ka kuni, baebalrenga ki drekaseli. Tamatamaku; ka amia kikai pelaela.

¹⁴ “Kai saliakavaeva ku kidremedreme ka kawkawlu, bwala siwlria! Amaniaku ku tawki numi. Lri patwaladhaku ki sanaka cekele pilri ku tangea ku umawmase, patwalai ki lamaretetese pilri ku tadrusa ku umawmase, si ililuku siwlri mu Ziyungu lregelrege.

¹⁵ Lri patarumaraku baai numiane ku lri rathudu ka lri pasalaladha ku drekaseli, kwi lalasu lri arakai ku thingalane si lrigilane rathudu numiane.

¹⁶ Lu ikainga numi kai ki kadaengane ngipelane ngiradhekane aru takalra yai, kai laumawmase lri kai matikainga ki Langiane ki Tamatama, kai lri kidredremenga kai lri ngulrialringawnga. Kwi lalasu kai lri murikainga ki Langiane ki Tamatama, lai lri kai pianga ku vaeva ka maelane.

¹⁷ Lu kelanga kwidra, lri pasudalepe ki Yerusalrime pasi ‘Taetalane ki Tamatama’ iya; sanaka kuni sanaka umawmase lri yelrelre ikai kwini sukubu nakwane. Kwi lalasu kai lri kiililukunga ki kudrusulrane si ngialisiane ka kidremedreme si pia ku ngialisiane.

¹⁸ Ku swa Iseraylri si swa Yuda lri ngielre; kwi lalasu lri karededele katwase kudra taacaicaliane lini ka kadaengane kavai tali kai dradha, si lri siwlri mwa kai patarumarali baai ki cucungulane lini ka palralrawthu ka tacekecekelane lini ka kadaengane.”

Ku kawkawlu ki Twaumase wasukubu ki samiamiange

¹⁹ Ku Tamatama amia kai: Iseraylri, kiaragadhaku silalake muswane, la patarumara baai muswane ku mathaithaariringa ku kadaengane, ka makarawmawmanenga, baai muswane. Ama lau lri iyasu nakwane amiaku, si apalralrawthu kai katwatwasenga nakwane.

²⁰ Ai kaisu saliakavaeva kwi kidremedremesu papia nakwane, mia ki amani kwidra manganga ku takaababadhane ka taelrelre ka matwase upadruku ki palrapalra. Tamatamaku ka amia kikai pelaela.

²¹ Kilalra, ikai belenge lregelrege yakai kwi lingau kwi watawtawtau, ka lingau ki swa Iseraylri ka takualralreselrese kitubi; asi lwiyane kwi lalasu kiadailinga ki pacengecenge ka kadalranane, marimurunga ki Tamatama ka Twaumase lini.

²² Kunumi ka wacilri si katwase ki Tamatama ka laumawmase, bwala kainganadha siwlri! Ku Twaumase lri sulrau si pawdringai numiane, lai kai numi baebaebalrenga. La tubalre numi iya kai, “Unu! Lri siwlri nai mwa ki Tamatama, asi lwiyane kwi Tamatama amani ku Twaumase nai.

²³ Sa ikai nai belenge lregelrege sukubu ki samiamiange, kadrwa ku nimalrane ku navaevanga ku akaesadhane. Kathane ku Tamatama ka Twaumaseta ku wadulru palribulu ki swa Iseraylri.

²⁴ Ai wasukubu nai ki Baale ka amani kwidra matialrumale ka samiamiange, lakamani ku kawlrau ki lakiu, lalwange, lalalake, ka amani kwidra cegecege ki cucungulaneta ka tacekecekelane twalai kunadruma.

²⁵ Naika arakaita ku matinwanane tutapeapecane, arakai ku kiarubwanane tucawbu. Kuta si cucungulaneta kaita watelrai pasalriu ki Tamatama ka Twaumaseta; kaita kialalralalra si paluludu ku drekaseini.”