Yerimia 29 - Ngudradreadrekadhane Ka Sisiu 魯凱語聖經

Ku Yerimia pakatwase ku tigami baai ki acaicaicali ka swa Yuda

¹ Watigamiaku si baai ki latwalai Yerusalrime kiravase ki Nibukadenezere ka talialalai pwa ka Babilunia ka labarakalai, yuginsia, ciwru si ladrumane ka laumawmase.

² Ku tapacasane kai ki tigami amani sa kipakatwasenga makanaelre Yerusalrime ku talialalai ka Yehuiacingi, tina ki talialalai, yakaikai ki daane ki talialalai ka latabebelenge, latabebelenge ki swa Yuda si Yerusalrime, la sialrima si sialrima ka tarakawaungu.

³ Sakamani kwidra, ku talialalai ki swa Yuda ka Zidikia siakawlu ki Iliasa ka lalake ki Sapange si Gimaria ka lalake ki Hilekia mwa ka Babilunia kikawriva ki talialalai ka Nibukadenezere. Kikai tigami yai swadralru pailuku liniane ka tadrusa katwase. Ku taiyane kai ki tigami:

⁴ “Ku Tamatama ka abebeelengenga ki sanaka kwapingi, ka Twaumase ki swa Iseraylri amia kai ki sanaka twalai Yerusalrime kiravase si kipamwa ka Babilunia,

⁵ ‘Lri tudaane numi si sutelrai ikai, kaunga, la kane ku taleke ki umawma.

⁶ Kunumi karudranga, la tulalake; ku lalalake numi lai lri mialri karudrange si tulalalake, lanu ikai kwini edhale ngiradhekane si aru takaalra ku umawmase, ani kai asakivalane.

⁷ Kunumi pasikaiya pakaesai kudra ki pakatwaseli numiane mwa kudra ki lacekele, pasikaiya ku angiradhekanane lini kitubi nakwane; ki laswakai kwini lu ngiradheekane, lri dulru numi ngiradhekane.

⁸ Kwaku ka Tamatama, ka abebeelengenga ki sanaka kwapingi, ka Twaumase ki swa Iseraylri lri pakipapawlringavaku numiane; madha kitavuvuvulrucu kwini ki yakai numiane ka layuginsia, ki la ngiatatu taradredrele ku angimiane lukabibilrili ka umawmase; la madha kipawtengatenga ku tasipiane lini.

⁹ Kwini lalasu arakaikai ku naganeli si tavuvulrucu numiane; kainaku siakawlu liniane. Tamatamaku; ka amia kikai pelaela.’

¹⁰ “Ku Tamatama amia kai, ‘Ku tarathudane ki Babilunia lu tara mapitulunga ka caili, lri kakalithaku numiane si pangimia ku pukawnungali, ililuku numiane siwlri mwa kikai.

¹¹ Kathaanaku ka wathingale ku nau pia kwini iyaiyali numiane: Ku nau pia kwini iyaiyali numiane kaika amatikurwane, angiradhekanane; lri paikaiyaku ku ledra ki kadalranane cucubungu numi.

¹² Luka amani kwidra, lri kitubi numi nakwane si papia nakwane inulri, lai lri tubalreaku numiane.

¹³ Lu silape numi nakwane, lri tara kidringai numi; alaiyasi savaeva numi ku kidremedreme kisilape nakwane,

¹⁴ lri tara pakidringadhaku numiane. Lri pasiwlriaku numiane mubalriu si pasiwlriwlri ku tacekecekelane numi. Lri patwaladhaku numiane ki takipakatwasane numi mwa kudra ki lakuni si lakadaengane sarubu numiane, la ililuku numiane siwlri mubalriu twalai ki takiravasane numi. Tamatamaku; ka amia ki kikai pelaela.’

¹⁵ “Asi lwiyane ngiaiya numi kai, ku Tamatama ikai Babilunia pasiakai numiane pacegecege ku yuginsia.

¹⁶ Ku ngwakai ki daane ki talialalai ka Davidi ku talialalai si kudra sakacekele ka asuru ikai kai ki cekele, ka kai kiapakaredele kiravase,

¹⁷ ku Tamatama ka abebeelengenga ki sanaka kwapingi amia kai, ‘Lri pakipadradresengaku liniane ku amakaruruburane, ku silravane, si swalrubu. Lri pangimiaku liniane ki maburau ka icizike ka madru ka kaika adulrwanenga kane.

¹⁸ Lri arakaiyaku ku amakaruruburane, ku silravane, si swalrubu amudu liniane. Adravane pakatwasaku liniane pamwa kidruanga, kai kawmasane sanaka kuni ka laumawmase akipuswane lri iya makanaelre liniane si kamaninga kudra tara kikakiwcu, kicilri, kitumeamelrace kaelaela.

¹⁹ Asi lwiyane kwi lalasu kai kialalra pasalaladha ku vagali. Kainaku watelrai sikawlu ki lasasiakawluli ka yuginsia papia liniane patululu ku vaga, ai kai lalasu kai kialalra.

²⁰ Lakamani, kunumi ka patwalaili Yerusalrime pakatwase pu Babilunia ka la niravasane! Dradrela kilalra kai vagali ka Tamatama.’

²¹ “Patharukai ki arakai ku naganeli ka Tamatama si tavuvulrucu numiane ka Ahabe ka lalake ki Kulaia si Zidikia ka lalake ki Masia, ku Tamatama ka abebeelengenga ki sanaka kwapingi, ka Twaumase ki swa Iseraylri amia kai, Kwi lasu lri malra kai ki tadrusa si baai ki talialalai ki swa Babilunia ka Nibukadenezere. Ku Nibukadenezere lri ikai cucubungu numiane papacai liniane.

²² Kunumi ka kiaravase twalai Yuda mu Babilunia ka laumawmase lulri pusu numi ki palrapalra, lri iya numi kai, ‘Ku Tamatama ani kiecebe numiane, mia ku takiecebaneini ki Zidikia si Ahabe patakunianiake kilama ki talialalai ki swa Babilunia!’

²³ Kikai yai lri kamani ku angimiane lini; asi lwiyane kai lalasu pasalriu ku ngialisiane turamuru ka padralra ki taelrelre ki pasiagisi, la arakai ku nagane ki Twaumase si tavuvuvulrucu. Kwi lasu wathingale ku kakwakudhane lini, lai lri ngikakamani ka wakukusu liniane. Ku Tamatama amia kai pelaela.”

Tigami ki Semaia

^24-25 Ku Tamatama ka abebeelengenga ki sanaka kwapingi, ka Twaumase ki swa Iseraylri papatuluru nakwane ku vaga baai ki Semaia ka swa Nihilame. Ku Simaia naarakai ku naganeini tigami ki barakalai ka Zipania ka lalake ki Masia, ki drumane ka barakalai makanaelre, si swa Yerusalrime makanaelre. Kwi lasu ikai ki tigami amia kai,

²⁶ “Ku Tamatama pakamaninga muswane paabarakalai pawbalrithi ki Yehuiada; kikai amaningasu ku mabelenge ki daane ki Tamatama. Ku awnganesu yai apathavungane sanaka aneanenga ku ngiatatu yuginsia ku umawmase, arakaiya ku kicikici ruthuku iniane, arakaiya ku adreme ka saruthukane pwa ki lreini.

²⁷ Kaiasasane, yakai numiane ku tangea kudra ngiatatu yuginsia ka Yerimia ka swa Anatute; asu kai pangimia ku awnganesu si pathavungu iniane?

²⁸ Kwi lasu nawatigami pelaela ki sakacekele nai ka yakai Babilunia, lri kalragi ku vai ku acaicaliane lini, lakamani ku pelaela naiane patudaane, pasutelrai ikai si pakaungu, kane ku taleke ku twalai ki takauawngane.”

²⁹ Ku barakalai ka Zipania sialrigu pakilalra nakwane kikai tigami.

³⁰ Ku Tamatama wacunu nakwane

^31-32 tigami si baai ki acaicali ikai Babilunia makanaelre ka lasakacekele, matiakai ki ngwakai ki Simaia ka swa Nihilame, iya kai: “Kwaku ka Tamatama lri pathavungaku ki Semaia si agaganeini. Kainaku siakawlu iniane, la ngitatu yuginsia si papiapia numiane kawriva, ku akilalrane numi iniane si kipawtenga ku tavuvulrucuini. Kwi lasu kai lri ikai ku agaganeini ku lri ikai numiane, lu panianianiyakeana kai lri drele ku patarumarali si baai ki kawkawluli ku akaesadhane akiragadhane, asi lwiyane kwi lasu pasapukwane liniane baebalre nakwane. Tamatamaku; ka amia kikai pelaela.”