Yerimia 28 - Ngudradreadrekadhane Ka Sisiu 魯凱語聖經

Yerimia si kaika patengane ka yuginsia ka Hanania

¹ Thadalrane ka caili, ka amani kudra sa tara supatenga ka caili si lrima ka dramare ku taatalialaladhane ki Zidikia, ku swa Gibiungu ka yuginsia Hanania ka lalake ki Azure, yakai ki daane ki Tamatama kikawriva nakwane.

² Kwini lasu yakai cucubungu ki labarakalai si mapapangale pelaela nakwane, ku Tamatama ka abebeelengenga ki sanaka kwapingi, ka Twaumase ki swa Iseraylri amia kai, “Watuthiringa naku ku taruthukane ki talialalai ki swa Babilunia.

³ Ikai kai ki nitara drwadrusane ka caili, lri malraku kudra ravase ki talialalai ka Nibukadenezere si pwa ka Babilunia kudra latakaiyane ki daane ki Tamatama la sawlri salri pwa kikai.

⁴ Lai lri mialriaku ililuku pasiwlri makanaelre ki talialalai ki swa Yuda ka Yehuiacingi ka lalake ki Yehuiakime si redelaneini kiravase pwa kavai Babilunia ka swa Yuda. Unu, tengatenganeli ka lri tatithiri ku taruthukane ki talialalai ki swa Babilunia. Tamatamaku; ka amiaku kikai pelaela.”

⁵ La pacungulu, icucubungu ki labarakalai si yakai ki daane ki Tamatama acegecege ka laumawmase, amiaku kai ki yuginsia ka Hanania,

⁶ “Anatumane la ngimia kikai! Ani singikai ki vagasu si pangimia ku Tamatama! Siadramaku ku apangimiane ki Tamatama ku yugingisu, patwalai Babilunia sawlri iluku pwa kai ku takuciacingalre ku lawbubulu ki daane ki Tamatama si kiaravase makanaelre.

⁷ Ai kusu dradrela kilalra ku papiali kawriva muswane si mapapangale ku vaga.

⁸ Twalai kunadruma, ku aswalalala mitane ku layuginsia wasakalainga ka lri ikai ku amakaruruburane, ku silravane si ku swalrubu mulebe mwa ki takaalra ka laminzuku si latagagarange ka kuni.

⁹ Ai ku wasakalai ki rathudane ka yuginsia, lu ngimianga ku nisakaladhane, ku palrapalra lri thingale iniane ala ka patengane ka sikawlu ki Tamatama ka yuginsia.”

¹⁰ Ku yuginsia ka Hanania ala mwalra ku yakai ki lreli ku tikungu si celra,

¹¹ la ikai cucubungu ki mapapangale iya kai, “Ku Tamatama amianga kai, lri tuthadaalranaku celra ku baai ki talialalai ka Nibukadenezere ki lakuni ku tikungu; ikai kai ki nitara drusane ka caili lri pangimia kikai.” Kwi lasu sa maka kawrivanga, la katwasaku kwini.

¹² Sangilribatenga kikai, ku Tamatama wacunu nakwane

¹³ pelaela ki yuginsia ka Hanania, “Ku Tamatama amia kai, adravane ka wadulrusu celra ku angatu ka tikungu, ai kwi lasu lri piya pawbalrithi ku maelane ku vaeva ka adreme ka tikungu.

¹⁴ Ku Tamatama ka abebeelengenga ki sanaka kwapingi ka Twaumase ki swa amianga kai, kwi lasu lri tutikungu ku adreme si drima baai ki lakuni; kwi lalasu lri asalelebe pasalaladha ki talialalai ki swa Babilunia ka Nibukadenezere. Ku Tamatama amia kai, lri pakeela ku wamalra ki waudriwdripi si baai ki Nibukadenezere pamarasikai.”

¹⁵ La peelanga naku papia ki yuginsia ka Hanania iya kai, “Hanania! Kilalra! Ku Tamatama kai siakawlu pakatwase muswane, kasalrwaili la iyalringasu ku tavuvulrucusu kikai ki laumawmase.

¹⁶ Lakamani ku Tamatama amia kai, lri amudaku muswane. Lri pacaisu ikai ki caili kai, asi lwiyane pasapukwanesu ki umawmase baebalre ki Tamatama.”

¹⁷ Saka caili kwini ki sakapitu ki dramare, ku yuginsia ka Hanania wapacai.