Yerimia 27 - Ngudradreadrekadhane Ka Sisiu 魯凱語聖經

Ku Yerimia siatikungu

¹ Sakapathagilane ku tarathudane ki swa Yuda ki talialalai ka Zidikia ka lalake ki Yusia, ku Tamatama wacunu nakwane

² ku arakaiyane ku lrangici ka calrisi si angatu tutikungu, si elrai pikai ki lre.

³ La pacungulu, ku Tamatama wacunu nakwane, ku apangukaiyane ki lasinikawlane mwa Yerusalrime ngulatatadre ki talialalai ka Zidikia, ku amailukane kikai lebenga kai vaga padaruru ki talialalai ki swa Idume, talialalai ki swa Muabe, talialalai ki swa Amune, talialalai ki swa Tayre, si talialalai ki swa Sidune.

⁴ Ku Tamatama ka abebeelengenga ki sanaka kwapingi, ka Twaumase ki swa Iseraylri wacunu nakwane ku adrekasaneli ki lasinikawlane ku apadarurane lini ku vaga ki Twaumase baai ki talialalai ki kuni; ku Twaumase amia kai,

⁵ “Arakaiyaku ku maadrau ka puku bekace kai kawmasane si laumawmase si sanaka waudriwdripi. Ku apibaaili ki aneane kai kadaengane, lri baadhaku ki aneane.

⁶ Kaiasasane lri ngikakamaniaku malra kikai ki lakuni si baai ki sasiakawluli ka Nibukadenezere ka talialalai ki swa Babilunia, ani ka amani ku warathudu, adravane ka lawaudriwdripi lri baadhaku iniane pamarasikai.

⁷ Sanaka kuni lri pasalaladha iniane si lalakeini, aganeini, pakeela ku taturamurane kai ki maadrau ka kuni. Lukamani kwidra, kwi lasu lri kasalelebe pasikaikai ki lamagarange ka kuni si latalialalai ki lamagarange ka kuni.

⁸ “Ai alaiyasi ikai ku minzuku ku kuni ku kai mwabangalre salebe pasikaikai ki Nibukadenezere ka talialalai ki swa Babilunia, la kai mubangalre elrai kwidra pwa ki lre lini ki lasu ku tikungu, lri arakaiyaku ku amakakaruburane, ku silravane si ku swalrubu pathavungu kwini ki kuni, pakeela kudra lrika apamudaneli ki Nibukadenezere kwini ki kuni.

⁹ Ala kunumi, madha kilalralalra si kasalru ki yuginsia numi, ki tarakithingathingale ki angimiane, ki taralalrwalrwai ki sipi, ki tarahandandange, si taraivigi. Kilakikai umawmase maramaramau ku vaga lini ka madha kasalelelebe si pasikai ki talialalai ki swa Babilunia ka lri iya numiane,

¹⁰ kwi lalasu tengatengane ka watavuvuvulrucu numiane, ku lrika akiravasane numi, katwase ki cekele numi. Lri paacaicaliaku numiane; lri kiamudu numi.

¹¹ Ai sanaka aneane ka kuni ku mwabangalre aba ku baai ki talialalai ki swa Babilunia ku tikungu, si mubangalre asalelebe pasikai iniane, lri pasakaesadhaku ki laumawmase kwini ki kuni ikai ki kadaengane lini si kauawngu ki kadaengane lini. Tamatamaku; ka amia kai pelaela.”

¹² Lri mialriaku papia ki Zidikia ka talialalai ki swa Yuda iya ku thadaalrane ka vaga, “Kunumi elradha ku baai numiane ku tikungu ki talialalai ki swa Babilunia, la kasalelebe pasikai iniane si laumawmaseini; luka miyaiya kai, lri dulru numi panianiake.

¹³ Kusu si kawkawlusu asingithanga ngidadawdawlu ku amakaruruburane, ku silravane si ku swalrubu si pacai? Ku Tamatama wacungucungunga kawriva, ku aneane ka kuni ku kai mwabangalre kasalelebe pasikai ki talialalai ki swa Babilunia, kwini kuni lri ngidadawlu kilakikai amatikurwane.

¹⁴ Kunumi madha kilalralalra si kasalru ku pakalrumalrumale numiane ki layuginsia ku kaika apapiane numi ki talialalai ki swa Babilunia kusange. Kwini lalasu watavuvuvulrucu numiane.

¹⁵ Ku Tamatama nangiakakamaninga iya kai, kainaku siakawlu liniane, amani kwi lalasu ka ngiakakisalrwalrwane ku naganeli si tavuvulrucu ki umawmase. Alaiyasi kilalra numi la kasalru liniane, ku Tamatama lri paacaicali numiane; lai lri kamudu numi si watavuvulrucu numiane ka layuginsia makanaelre.”

¹⁶ La papiaku ki labarakalai si laumawmase patululu ku vaga ki Tamatama, “Kunumi madha kilalralalra si kasalru kudra la kawrivariva ki layuginsia, kai lri tarathainunga lai lri salri pakainganai patwalai Babilunia ku takuciacingalre ka lawbubulu ki daane ki Tamatama iya. Kwi lalasu watavuvuvulrucu numiane.

¹⁷ Kunumi madha kasalrusalru ku vaga lini! Kasalelebea la pasikai ki talialalai ki swa Babilunia lanu panianiake! Asingithanga apatawlrakavane kai ki cekele?

¹⁸ Kwini lalasu alaiyasi ka patengane ka yuginsia, ka yakai ku vagali, kwi lalasu nai papia nakwane kitubi ka Tamatama ka abebeelengenga ki sanaka kwapingi, kitubi nakwane ku kaika apamalrane ki umawmase ku yakai ki daane ki Tamatama, daane ki talialalai ki swa Yuda, si Yerusalrime ku takuciacingalre ka lawbubulu si salri pwa ka Babilunia.”

^19-20 Ku Nibukadenezere ka talialalai sa ravase pwa ka Babilunia ki talialalai ka Yehuiacingi ka lalake ki Yehuiakime si la tarasangililuku ki swa Yuda si Yerusalrime, wasuru ku ulrudru ka lriwlu, lriwlu ka laveke, taneneneane ka lriwlu si drumane ka latakuciacingalre ka lawbubulu.

²¹ Kudra ngwakai ki nisurane pikai ki daane ki Tamatama si daane ki talialalai ka Yerusalrime ku takuciacingalre ka lawbubulu, kwaku ka Tamatama ka abebeelengenga ki sanaka kwapingi, ka Twaumase ki swa Iseraylri amiaku kai:

²² “Kilakikai lamanemane lri kisalri patuelre pwa kavai Babilunia, lri pikai kwini, pakeela ku asawlrianeli liniane. Lukamaninga kwidra, lri salriaku pakainganai si pikai ki nataikaiyane. Tamatamaku; ka amia kikai pelaela.”