Yerimia 26 - Ngudradreadrekadhane Ka Sisiu 魯凱語聖經

Ku Yerimia kiasaibange

¹ Ku Yehuiakime ka lalake ki Yusia sa pathagili atalialalai ki swa Yuda,

² Ku Tamatama amia kai nakwane, “Lri acegecegesu ikai ki kalatadrane ki daane ki Tamatama, la papia kudra ki wakela drihai ku twalai ki lacekele ki swa Yuda ka laumawmase pelaela kudra drekaseli muswane pelaela iya kudra vaga, madha kivalavala ku naniaku vaalanenga.

³ Kwi lalasu alaiyasi ubangalre kilalra, la ubangalre cilri si katwase ki ngialisiane ka kadalranane, lri ulravaku ku naika akamudane lini ngwalai ki ngilisianane ku tangivelevelane lini.”

^4-5 Ku Tamatama wacunu nakwane ku apatululaneli pelaela ki laumawmase, “Kwaku ka Tamatama amiaku kai: Kunumi paluluda kudra patarumarali baai numiane ku padradrekase, la kilalra pasalaladha ku vaga ki sasiakawluli ka layuginsia, si pasalaladha nakwane. Kainaku watelrai sikawlu ki sasiakawluli ka layuginsia papia numiane patululu ku vaga, la kai numi maka kilalra.

⁶ Alaiyasi pacungulu numi kai kilalra, lri amudaku kai daane ki Tamatama, mia kunadruma sa amudaku Selu. Kai kawmasane sanaka kuni lri arakai makanaelre kai nagane kai ki cekele tusapuswane.”

⁷ Kwi labarakalai, layuginsia, si laumawmase kialalra makanaelre ku takawrivaneli kikai vaga ikai ki daane ki Tamatama.

⁸ Sa makakawrivanga naku, kwi lalasu pwalra nakwane, si giringi nakwane iya kai, “Pacadha!

⁹ Asu papia ki nagane ki Tamatama pelaela kai daane ki Tamatama lri mia Selu kamudu iya? La iyanasu, kai cekele lri atawlrakavanenga ka kadrwa ku umawmase ku lri ikai?” La ngithalringulu nakwane ku laumawmase.

¹⁰ Ku latabebelenge ki swa Yuda sa kilalra kikai twalai ki daane ki talialalai kainganai mwa ki daane ki Tamatama, la ikai ki “Bavane ka lrawlrawdru” saibange.

¹¹ Ku labarakalai si layuginsia la papia ki latabebelenge si laumawmase kukusu nakwane; kai lalasu amia kai, “Kai umawmase kai apapacadhane, asi lwiyane kai lasu wasakalai tulilisi kai ki cekele; kialalranga numi makanaelre.”

¹² La pelaelaku ku tapacengecenganeli iya kai, “Ku Tamatama siakawlu nakwane kainganai pelaela kilakikai sapuswane ki daane ki Tamatama si kikai ki cekele ka vaga, kialalra numi patuelre.

¹³ Kunumi yai ngitatupela si pasalaladha ki Tamatama ka Twaumase numi. Luka ngimiyaiya kai, ku Twaumase lri mwalra kudra naika amudane numiane.

¹⁴ Pangukai nakwane, yakaiyaku ki alrima numi! Kudra mathariri iya numi ku apangimiane numi nakwane, singikaiya pangimia.

¹⁵ Ai ku athingalane numi, alaiyasi papacai numi nakwane, kunumi si kai cekele si laumawmase kai ki cekele, lri kibalrithi makanaelre ku erai ku tapapacadhane ki kadrwa ku pasalrivane, asi lwiyane amaniaku ku kiasikawlu ki Tamatama kainganai pakipapawlringau numiane.”

¹⁶ Ku tabebelenge si laumawmase ala iya kai ki labarakalai si layuginsia, “Kai umawmase kai pangwakai ku nagane ki Tamatama papia mitane kawriva, kai lri kipapacai.”

¹⁷ La pacungulu, kwini ki laciwru la ikai ku umawmase ku acegecege si iya kai ki mapapangale:

¹⁸ “Kunadruma, saka Hezekia ka talialalai ku warathudu ki swa Yuda, ku swa Murisethe ka yuginsia ka Mika papia ki laumawmase ki swa Yuda pelaela ku Tamatama ka abebeelengenga ki sanaka kwapingi amia kai: Ku Ziyungu lregelrege lri ngimia ki takauawngane ka kialruku si balre; ku cekele Yerusalrime lri atawlrakavane ka cinilrianenga; ku lrelrelrege ka taikaiyane ki daane ki Tamatama lri akabalrithi aangatungatu.

¹⁹ Sakamani kwidra, ku talialalai ka Hezekia si laumawmase ki swa Yuda kai papacai ki Mika. Ku Hezekia mwasakenelringa mukuludru ki Tamatama, la kikiragai ki Tamatama. Ku Tamatama ala ngukusawlri ku takidremedremane, ku nikelretanenga ka amatikurwane la kai pulebenga pwa ki kinawmasane lini. Ai kaiasasane lri ngidadawluta ku amatikurwane.”

²⁰ Sakamani kwidra, yakai ku tangeea ka swa Kiriathe Yerime ka Uria ka lalake ki Simaia; kai umawmase kai mararamau ki Yerimia ka pangwakai ku nagane ki Tamatama yugingi, tulisi kai ki cekele si kai ki kuni.

²¹ Ku talialalai ka Yehuiakime paelre ki lakwapingini si latabebelenge, sa kilalra ku vaga ki Uria, kiasanu papacai iniane. Ku Uria sa kilalra kikai nimadrekadrekasane, la mukuludru si mubere mu Izipiti.

²² Ku talialalai ka Yehuiakime la sikawlu ki Ilinathange ka lalake ki Akebure mailuku ki laumawmase mwa Izipiti, si pwalra ki Uria,

²³ la ililuku kwini ki lasu pucucubungu ki talialalai ka Yehuiakime. Ku talialalai la papacai iniane, ku kinawmasaneini la cilri pwa ki tadralredralrekane ki lakawkawlu.

²⁴ Ai kiapalribulaku ki Ahikame ka lalake ki Sapange, kadrwa ku umawmase ku wamalra nakwane si baai ki mapapangale papacai.