Yerimia 25 - Ngudradreadrekadhane Ka Sisiu 魯凱語聖經

Twalai tali dradha kainganai ka badha

¹ Sakasupate ka caili ku tarathudane ki swa Yuda ku taatalialaladhane ki Yehuiakime ka lalake ki Yusia, patwaladhaku ki Tamatama tarumara ku vaga ka abadhaneini ki laumawmase ki swa Yuda. (Kikai yai ku Nibukadenezere taracailinga ku taatalialaladhaneini Babilunia.)

² La pacungulaku pelaela ki kuni palraelre ki swa Yuda si swa Yerusalrime iya kai,

³ “Twalai ku taatalialaladhane ki Yusia ka lalake ki Amune si rathudu ki swa Yuda satara 13 ka caili pakeela kaikameane, tara 23 ka caili, ku Tamatama kai watelrai papia nakwane kawriva, la mialriaku kai telrai papia numiane pelaela ku vagaini, la kai numi kilalralalra.

⁴ Ku Tamatama peaeelana sikawlu ki sasiakawluini ka layuginsia papia numiane patululu ku vaga, la kai numi kilalralalra, kai numi pualringalringau.

⁵ Kwi lalasu pakiapapawlringalringau numiane ku acilriane numi ku piapia numi ku ngialisiane, si akabalrithi kwi pasalrivane ki kakwakudhane numi, lanu dulru pacungucungulu ikai kwini ki kadaengane ka patarumara baai ki Tamatama numiane si cucungulane numi lani ka apalralrawthunga ka numiane.

⁶ Kwi lalasu la mialri pasapukwane numiane ku kaika asukubane si pasikaikai ki drumane ka latwaumase, ku kaika asukubane numi ku pia numi ku samiamiange la pakagirimucu ki Tamatama, ku Twaumase lai kai pathavungu numiane.

⁷ Ai, ku Tamatama amia kai, kai numi kialalra, la pakagirimuculringa numi iniane kwi ngipapia numi kwi samiamiange, la ngidadawlu numi ku akipathavungane.

⁸ “Ngwalai kikai kaika takilalrane numi iniane, lakamani ku Tamatama ka abebeelengenga ki sanaka kwapingi amia kai,

⁹ ‘Drela! Lri dawlaku ki laminzuku ki swa tali dradha si sasiakawluli ka Nibukadenezere ka talialalai ki swa Babilunia lai lri kikaruburu kikai ki kadaengane si yakai kaika laumawmase, lai lri mialri kikaruburu ki ngiathalringulu sanaka kuni. Lri amudaku liniane, lai lrika palralrawthunga aubulane kai kadaengane kai si ngwadadethe ka lakuni, lri acinilrianenga ka kadaengane ka takakikiwcane ki laumawmase. Tamatamaku; ka amia kai pelaela.

¹⁰ Lri kainaku pikainga liniane ku akiraragadhane, lai lri kai ikainga ku lingau ku marudrarudrange kapeapeaperau. Ku tatinakiane lini kadrwa ku tinaki; ku tapasilribulribwane lini ka lrenege kadrwa ku apasilribwane ku taleke.

¹¹ Kikai kadaengane lri acinilriane, lai lri amatikikiwcu ka kadaengane. Sanaka kuni lalri pasalaladha ki talialalai ki swa Babilunia taramapitulu ka caili.

¹² Lu tara mapitulunga ka caili, lai lri ngwaladhaku ku tapasalrivane ki Babilunia si talialalaini si pathavungu liniane. Lri amudaku kai ki kuni, lai lri ka palralrawthunga ka cenilriane.

¹³ Lri arakaiyaku kudra pelaelali ku sarakaiyane kiecebe ki lakuni ka amatikurwane pathavungu ki swa Babilunia. Kilakikai la amatikurwane nipacasanenga nguvavaeeva pikai kai ki hungu ka cunungali ki Yerimia ku apelaelane.

¹⁴ Lri singikaiyaku ku tapiane ki swa Babilunia bilri liniane; kwi lalasu lri aduri ki sapukwane ka kuni si latalialalai lini.’ ”

Ku Twaumase wasaibange ki lakuni

¹⁵ Ku Tamatama ka Twaumase ki swa Iseraylri amia kai pelaela nakwane, “Malra kikai yakai ki alrimali kai swaete ki kupu kai lisiane ka bava si mwa baai kudra pamwali sikawlu muswane ki lakuni. La paungulu liniane.

¹⁶ Kwi lalasu lu ungulunga lri lridralridralriidrunga makanaelre, si amamama kakupungupungu iya, asi lwiyane lri arakaiyaku ku amakakaruburane kiecebe liniane.”

¹⁷ Ala, patwaladhaku ki alrima ki Tamatama tarumara kai yakupwane ka bava, si mwa baai kudra sikawlu nakwane ki Tamatama mwa kwini iyaini ku lakuni, la paungulu liniane.

¹⁸ Wabaadhaku ki caceekele Yerusalrime, ki lacaceekele ki swa Yuda, adravane ka latalialalai si tabebelenge lini waungulu makanaelre kai ki bava, si kamaninga kwidra kiatulililisi, kiacilri, kiapusu ki palrapalra. (Kaikameane thadalraneana ku tangimiamiane.)

^19-26 Kai lebenga mialri ka lri ungulu makanaelre kai ki bava: Talialalai ki swa Izipiti, latabebelengeini si tarasangililuku; umawmase ki swa Izipiti makanaelre si badhabadha ka yakaikai Izipiti; latalialalai ki Uze makanaelre; lacekele ki Pelisitine ka: Latalialalai makanaelre ki swa Asekelungu, Gaza, Ikerungu si Asedude ka laabalu panianiake ka laumawmase; swa Idume, swa Muabe, si swa Amune; latalialalai makanaelre ki Tayre si Sidune; ngwakakai Miditerania ka latalialalai; laumawmase ki cekele ki Didane, Tima, Buze; makanaelre ku twa edrekane ku isiu ka laminzuku; talialalai makanaelre ki Arabia; latalialalai ki ngwakakai aenaenai ka lacekele; latalialalai makanaelre ki Zimeri, Ilame, si Media; ki swa tali dradha ki ngwadadethe ki ngwadadaili ka latalialalai makanaelre. Kai kawmasane sanaka kuni lri ungulu makanaelre kai ki bava. Ku bibilrilinga, ku talialalai ki swa Babilunia lri mialri ungulu kai ki bava.

²⁷ Pacungulu, ku Tamatama la iya kai nakwane, “Lri pelaelasu liniane, kwaku ka Tamatama ka abebeelengenga ki sanaka kwapingi, ka Twaumase ki swa Iseraylri lri drekasaku liniane paungulu kikai yakupwane ka bava, kwi lalasu lani kabusuku, puta, ngwadreke si kai maka ngidrakalenga, asi lwiyane pakiapadradresengaku liniane ku amakaruruburane.

²⁸ Kwi lalasu alaiyasi kai mubangalre tarumara kwi ecengesu kwi yakupwane, peaelaela madu liniane: Ku Tamatama ka abebeelengenga ki sanaka kwapingi amia kai: Kwi lalasu kai lri dulru kai ungulu kikai bava.

²⁹ Lri paswalaku amudu ki cekeleli, kwi lalasu lri dulrwana mubere? Kai lri maka mubere, lri tara kipathavungu, asi lwiyane lri arakaiyaku ku amakaruruburane amudu kai kawmasane sanaka umawmase. Tamatamaku, ka abebeelengenga ki sanaka kwapingi ka amia kikai pelaela.

^30-31 “Yerimia, tara pelaela liniane patuelre ku pelaelali muswane: Ku Tamatama lri twalai belenge putaluvaivai ku lisiane ka lingau, lri twalai ki saniange ka taikaiyaneini akwadrau kalisi. Lri papia ki kawkawluini karaleale kaelaela, mia ki taavavagane ka lingau ki wapepe ki budu ka laumawmase. Ku lingauini lri daruru sanaka inininunga; kai kawmasane sanaka umawmase lri dulru kilalra makanaelre. Ku Tamatama lri kukusu ki lakuni. Lri saibange ki sanaka umawmase, si papacai ki manganga ka umawmase. Ku Tamatama amia kikai pelaela.

³² “Ku Tamatama ka abebeelengenga ki sanaka kwapingi amia kai, ku amatikurwane lri kelanga, lri twalai ki vaeva ka kuni mwa ki vaeva ka kuni, lri twalai ki talikaiyane ki kadaengane valrigi ku madradradrau ka valrigi.

³³ Kudra vai kwini, twalai kai ki kadaengane pakeela kavai ki kadaengane, ikai kidruanga yai lakiapapacai ki Tamatama ka lakinawmasane. Kadrwa ku umawmase ku watubitubi liniane, laka kadrwa ku umawmase ku wasaruburubu si dralreke liniane. Kwi lalasu lri mia ki lrange ka nirubwane pidaedae.

³⁴ “Tarasangililuku ki laumawmase, taraagwagu ki kawkawluli, kunumi karaleala tubi, si ikai ki thuvugu ngibalrwalrutai, tubia kiangeange kwi kidremedreme. Ku akipapacadhane numi wakelanga; lri mia numi ki balase ka kiu ka kiaculu,

³⁵ kadrwa ku natangeeanga kulri dulru mubere.

^36-37 Kunumi karaleala tubi, asi lwiyane ku Tamatama lri ikai ki lisiane amudu ki kuni numi, lai atawlrakavanenga kwi nataikaiyane numi kirararagai ka kuni.

³⁸ Ku Tamatama wacilringa ki kawkawluini, mia ki raiyungu ka matwase ki barungulu. Ku matiukuludrane ki makakaruburu si lisiane ki Tamatama paubulane kai ki kuni.”