Yerimia 24 - Ngudradreadrekadhane Ka Sisiu 魯凱語聖經

Akudrusa ki karadrare ka icizike ka madru

¹ Ku Nibukadenezere ka talialalai ki swa Babilunia twalai Yerusalrime ravase si iluku mwa ka Babilunia ki Yehuiacingi ka talialalai ki swa Yuda ka lalake ki Yehuiakime, ki latabebelenge ki cekele Yuda, ki lasialrima, si latarakauawngu. Sangilribatenga, ku Tamatama padrele nakwane ikai cucubungu ki daane ki Tamatama piakai ku akudrusa ki karadrare ku icizike ka madru.

² Ku akuvaeva swaete ku aswalalanga kalreme si ka mathariri ka icizike ka madru; ku maelane ka akuvaeva la suete ku kaika akanekaneane ka malisi ka icizike ka madru.

³ Ku Tamatama la kivaga nakwane, “Yerimia, wadrelesu ku manemane?” La tubalreaku, “Icizike ka madru. Ku mathariri mathaariri turamuru, ku malisi maliisi turamuru ka kaika akanekaneane.”

⁴ Ku Tamatama ala iya kai nakwane,

⁵ “Kwaku ka Tamatama, ka Twaumase ki swa Iseraylri lri malraku kwidra ki lakiaravase mu Babilunia ka laumawmase tumathariri ka icizike ka madru, si tuthariri liniane.

⁶ Lri paukalriivilaku sirapale liniane, lai lri ililukaku liniane siwlri mwa kikai ki kadaengane kai. Lri cegecegaku liniane, si kai buruku liniane; lri twadravaku marasikai liniane, si kai akucu liniane.

⁷ Lri paikaiyaku ku salrwane liniane, lri thingale nakwane ka Tamatama. Kwi lalasu lri akawkawlu nakwane, lai lri a Twaumasaku liniane, asi lwiyane kwi lalasu lri savaevanga ku kidremedreme papia nakwane.

⁸ “Kai ngwakai ki Zidikia ka talialalai ki swa Yuda, si layathili iniane ka latabebelenge si abalu ka laswa Yerusalrime, ku asuru ikai kikai, ku mwabere mu Izipiti, kwaku ka Tamatama lri malraku liniane tumalisi ka kaika akanekaneane ka madru ki icizike.

⁹ Lri pakipadradresengaku liniane ku maadrau ka amatikurwane, kai yakawmasane kai umawmase lu drele lani ngituluku si mukuludru. Ikai kwini ki tapaacaicalianeli liniane ku laumawmase lri ulralrakai liniane, pakiangeange, tumeamelrace, pusu liniane.

¹⁰ Lri arakaiyaku ku amakaruruburane, ku silravane, si swalrubu amudu liniane; lai lri ka kadrwa ku natangeeanga ku asuru ikai kai ki patarumarali baai liniane si cucungulane lini ka kadaengane.”