Yerimia 23 - Ngudradreadrekadhane Ka Sisiu 魯凱語聖經

Sasiadradrama lukabibilrili

¹ Kudra amani ku warathudu si la pathiarakupu apawvagavagai ki kawkawlu ki Tamatama lri matisalregesege!

² Kwini lalasu nai ka amani ku siarapale ki kawkawlu ki Twaumase. Pangukai kai ki lawarathudu, ku Tamatama ka Twaumase ki swa Iseraylri amia kai, “Kai numi siarapale ki lakiuli, pathiaraakupulringa numi liniane. Drela! Lri ngwaladhaku kwi ngilisianane kwi kakwakudhane numi si pathavungu numiane

³ Lri patwaladhaku ku takipamwane lini acaicali ku lakuni si sarubu kudra laabalu ku laumawmase, si ililuku liniane siwlri mubalriu. Kwi lalasu lri takalra ku lalalake lagagane, lri edhale ngiradhekane ku umawmase.

⁴ Lri sikawlaku ku tarasangililuku pasirapale liniane, mia ki taraagwagu ki kiu agwagu liniane. Kwi kawkawluli lri kai ngitulukunga si kakiwcu; lri kainaku pathavungunga liniane. Tamatamaku; ka amia kikai pelaela.”

⁵ Ku Tamatama amia kai, “Lri kelanga kudra vai, lri pasikaiyaku ki Davidi pacebe ku dringelresane ka ‘Ricingi’. Kwi lasu lu rathudu mwalecege la kalrigili; kwi lasu lri ikai kai ki kadaengane arakai ku aparamaramavane dringelresane rathudu ki kuni.

⁶ Ikai ki tarathudaneini, ku swa Yuda lri kapapedrenge piapia ku awngane lini, ku laumawmase ki swa Iseraylri lri kisupisupilri ku rathudane. ‘Ku Twaumase lri kipasudalepe ka, Tamatama ka dringelresaneta.’ ”

⁷ Ku Tamatama amia kai, “Drela! Lri kelanga ku vai, lu kiketekete ku laumawmase, kai lri iyanga kai, ‘Lri papiaku ki amani ku waililuku ki swa Iseraylri pakatwase Izipiti ka palralrawthu panianiake ka Tamatama kiketekete’,

⁸ Lri iya kai, ‘Lri papiaku ki amani kwidra waililuku ki swa Iseraylri katwase ki kadaengane ki swa tali dradha, ililuku liniane patwalai ki tamwane lini ka lakuni siwlriwlri ka palralrawthu panianiake ka Tamatama kiketekete’. Lu kamani kwidra, kwi lalasu lri ikai ki cekele lini kapapeedrenge piapia ku awngane lini.”

Pakiapapawlringau ki layuginsia

⁹ Patharukai kwidra ki kaika patengane ka layuginsia, masuburu kai kidremedremeli, manwagigigili kai kinawmasaneli palraelre. Miaku ki mabusuku ki sakiararagai ki Tamatama si saniange ka vagaini, mararaamavaku kudra ki kiapaungulu si kabusuku ka umawmase.

¹⁰ Kikai yabelenge ki kadaengane ikai kidruanga papia ki Tamatama kaika patengatengane ku kidremedreme ka laumawmase; kai lalasu wacapange arakai ku puku, ngilisiane ku tapanianianiakane lini. Ngwalai ku tapuswane ki Tamatama, lri tubi dange kai kadaengane, ku tapagwagwagwane lai lri karudame.

¹¹ Ku Tamatama amia kai: Kai layuginsia si labarakalai kai mwasakene makanaelre; wadrelaku liniane lu ikai ki daane ki Tamatama piapia ku ngialisiane.

¹² Ku katwatwase lini ku kadalranane mathathulridri si la kadradrimiti; lri pamwadrekaku si pathulridri patubakebake liniane. Kai lalasu ku akipathavungane lini ku vai wakelanga; lri pulebeaku ku amatikurwane pikai ki kinawmasane lini. Tamatamaku; ka amia kikai pelaela.

¹³ Wadrelaku ku tapasalrivane ki layuginsia ki swa Samaria: Kwi lalasu pangwakai ki nagane ki twaumase ka Baale si sakalai, la pamama ku kadalranane ki kawkawluli.

¹⁴ Wadrelaku ki layuginsia ki swa Yerusalrime laka manganganga: Kwi lalasu pasalriu ki ababai, watavuvulrucu, la pakalrumale ki umawmase pia ku ngialisiane; ngwalai kikai kadrwa ku umawmase ku wacilri ki ngialisiane si papia ki pacengecenge. Ikai ki macali kai lalasu mararaamau ki swa Sudume kanganga, la mararaamau ki swa Gumura ngilisiane.

¹⁵ Lakamani, patharukai ki layuginsia ki swa Yerusalrime, kwaku ka Tamatama ka abebeelengenga ki sanaka kwapingi amiaku kai: Lri pakanaku liniane ku mapalili ka madru, lai ungulu ku duku ka acilai, asi lwiyane kwi lalasu yakai ki kuni palraelre pasarasarau ku kai mwasakene ka kakudhane.

¹⁶ Ku Tamatama ka abebeelengenga ki sanaka kwapingi amia kai ki swa Yerusalrime, “Madha kilalralalra si kasalru ku vaga kai ki layuginsia; kai lalasu ku baai lini numiane kaika patengane ka asidramane. Kai lalasu ngiatatu kidremeedreme kawriva sakalai, kaika pacungucungulu kai vagali.

¹⁷ Kai lalasu kai watelrai papia kudra ki kai mwabangalre kilalra pasalaladha nakwane ku umawmase iya kai, ‘Sanaka maneemane masulivaliivate!’ La iya kai kudra ki la makelrathe ku umawmase, ‘Kai numi lri kipadradresenge ku amatikurwane.’ ”

¹⁸ Amiaku kai, “Ku patengatengane, kilakikai yuginsia kadrwa ku natangeeanga ku naacegecege ikai belenge ki daane ki Tamatama, si ngikakamani kilalalra ku vaga ki Twaumase! Kadrwa ku natangeeanga ku umawmase ku kialalra pasalaladha ku vagaini.

¹⁹ Drela! Ka lisiane ki Tamatama mia ki makecenge ka alrilrawgu, ka yakai ki belenge ki awlru ki manganga ka umawmase ngipalrivaevaevange.

²⁰ Ku lisiane ki Tamatama lri pacungulu, pakeela ku angimiane patulrepenge ku nau pia iyaiyaini patuelre; lukamaninga kwidra, ala lri pulringalringawnga numi kilakikai.”

²¹ Ku Tamatama amia kai, “Kainaku siakawlu kikai ki layuginsia, ai kai lalasu matwatwase mwa kidruanga; kainaku wabaai ku vaga ku akawrivane, ai kai lalasu ngiakakamani sakalakalai.

²² Kai lalasu alaiyasi ka naacegecegenga ikai daane belenge, si tarumara ku vagali, nai papia ki kawkawluli kai lalasu padaruru ku vagali, kwi lalasu la nai cilri ki ngialisiane.

²³ “Kadrwa ku kaika taikaiyaneli ka Twaumase.

²⁴ Si kai maka drele iniane. Bekacesu kai thingale adravane ka belenge kai lebe inukidruanga kadrwa ku kaika taikaiyaneli?

²⁵ Kialalraku kwidra ki layuginsia lu arakaikai ku naganeli si tavuvuvulrucu ki laumawmase, kai lalasu yakai nai ki sipi tarumara ku vagali amiamia.

²⁶ Kwini layuginsia watavuvuvulrucu, la ililuku ki kawkawluli pathivalrau ki kadalranane; kai lalasu lri tavuvulrucu ki umawmase pakela lwigane?

²⁷ Kai lalasu lu kidremedreme lri dulruta tubeabekace ku sipi si pakarimuru nakwane amia kai ki kawkawluli, mia ki nacucungulane lini ka namarimuru nakwane, si ngibangulu papia ki Baale.

²⁸ Ku wasipi ku yuginsia wasipiaku nai iya; ku kialalra kai vagali ku yuginsia naika patengatengane pelaela ku vagali. Ku laubulu si mugi watumane madu si dulru patadrusa si apararamau mapelaela?

²⁹ Kai vagali mia ki kelrabe ka apwi, mia ki adreme ka pangulru ka wapangulru ki tarugutugu pakatatithiri.

³⁰ Lakamani, amiaku kai pelaela ka Tamatama: Kilalra! Lri kiecebaku kai ki layuginsia. Kai lalasu maarakaikaai ku vaga lini, vagaini la iya nakwane si pelaelaela.

³¹ Kilalra! Lri kiecebaku kai ki layuginsia, kai lalasu ku vaga lini vagaini amia nakwane.

³² Kilalra! Lri kiecebaku kai ki layuginsia. Kwi sipi lini patuelre watavuvuvulrucu ki laumawmase. Kwi lalasu lu pelaelaela kilakikai sipi, arakai ku tavuvulrucane busabusu ka vaga si pathivalrau ku kadalranane ki kawkawluli. Kainaku siakawlu liniane, la kainaku drekase liniane. Kai lalasu kadrwa ku apakaesadhane ki kawkawluli. Tamatamaku; ka amia kikai pelaela.”

Amece ki Tamatama

³³ Ku Tamatama amia kai nakwane, “Yerimia! Alaiyasi kai kawkawluli, kai yuginsia, kai barakalai lu kivaga muswane, ‘Yakai ku vaga ki Tamatama?’ Pelaela iniane, ‘Amani numi ku amece ki Tamatama; lri mwalra lrabuthu numiane.’

³⁴ Alaiyasi ikai ku yuginsia, ku barakalai ku kawkawluli ku arakai kai ‘Amece ki Tamatama’ amia ka vaga, lri pathavungaku iniane si wacekecekeleini makanaelre.

³⁵ Sanaka aneeane nai kivaga ki talragilragi ki pasiagiagisini, ‘Ku Tamatama manemane ku tubalreini? Tumana amia ku Tamatama?’

³⁶ Kwi lalasu kai lri maka arakainga ku ‘Amece ki Tamatama’ amia ka vaga; sanaka aneane ku arakai, lri malraku kikai vagali tuamece ka mateelrege iniane. Kwi lalasu wacapangenga arakai ku vaga ki Twaumase lini ka abebeelengenga ki sanaka kwapingi ka Tamatama, ka palralrawthu panianiake ka Twaumase.

³⁷ Yerimia, kivaga kwidra ki layuginsia, ‘Manemane ku tatubalreane numiane ki Tamatama? Ku Tamatama tumana amia numiane?’

³⁸ Alaiyasi baebalre ki drekaseli kwi lalasu, la arakai ku ‘Amece ki Tamatama’ amia ka vaga, pelaelanga liniane,

³⁹ lri tara tumateelregaku ka amece liniane si takilili, si patwalai ki cucubunguli cilri liniane paelre ku patarumarali ku cekele liniane si cucungulane lini.

⁴⁰ Lri pakawladhaku pakiarubwane liniane, ku takiarubwanane lini lai ka palralrawthunga kai mubangalre karimuru.”