Yerimia 22 - Ngudradreadrekadhane Ka Sisiu 魯凱語聖經

Pakiapapawlringau ku Yerimia ki daane ki talialalai ki swa Yuda

^1-2 Siakawlu nakwane ku Tamatama pamwa ki daane ki talialalai ki swa Yuda si pelaela ki talialalai ka ngwakai ki Davidi ka talialalai, si latabebelengeini, si laumawmase ki swa Yerusalrime, iya kikai, ku Tamatama amia kai,

³ “Kwaku ka Tamatama lri drekasaku numiane aparamaramava lu saibange numi, putaluvaivai ku dringelresane, patwalai ki alrima ki taradredredrepete palribulu ki kiadredredrepete ka umawmase. Kunumi madha pakiangeange tulilisi ki labadhabadha, ki lapakulrulrulu, ki lawalibakane; la madha ikaikai kikai patueraerai vutha ku kadrwa ku pasalrivane.

⁴ Alaiyasi paluludu numi kai drekaseli, ku mwabaibalrithi ki Davidi lri dulru pacungucungulu atalialalai. Kwini lalasu si latabebelenge kunkwane si laumawmase lri dulru makanaelre ngukaikai ki palridingi, ngurigirigi, lribate kai ki lalrawlrawdru ki cekele, si mudaane ki daane ki talialalai.

⁵ Alaiyasi kai numi pasalaladha ku drekaseli, lri kiketeketaku numiane, kikai daane ki talialalai lri akinaburukane. Tamatamaku; amiaku kikai pelaela.

⁶ “Ikai ki macali, kikai daane ki talialalai ki swa Yuda mia ki Gileade, la mia ki abebeelengenga ka lregelrege Lebanungu kaadrau kathariri; ai lri paubulanaku iniane, ka kadrwanga ku umawmase ku lri ikaikai.

⁷ Lri sikawlaku ki umawmase kabebetethe iniane. Kwini lalasu lri iluku ku kumugu makanaelre, si pulebe ki latathaithariri ka ulrudru ki cedare ka angatu, la verevere puadringi ki apwi.

⁸ “Lukabilrilinga, lai lri takaalra ku lamaelane ka kuni ka umawmase ku walribate kikai, lai lri makivagavaga, ku Tamatama ani tungimiyaiya kai kiecebe kai ki cekele?

⁹ Kwini lalasu ala lri ngitatubalre: Amani sa baebalre ku takiketeketane liniane ki Tamatama ka Twaumase lini kikai laumawmase kai ki cekele, si katwase sukubu pasikaikai ki drumane ka twaumase.”

Patharukai ki Yuahaze

¹⁰ Swa Yuda, madha tubitubi kudra ki wapacainga ku talialalai; madha adiridirivane si sukubu iniane. Pasikaiya ki lalakeini ka Yuahaze tubi; kwi lasu kiaravasenga, palralrawthunga kai lri dulrunga kela siwlri, lai lri kai dulrunga drele ki kadaenganeini.

¹¹ Ki ngwakai ki Yuahaze ka mwacungulu ki tamaini ka Yusia atalialalai ki swa Yuda, ku Tamatama amia kai, “Kwi lasu kiaravase si katwase kai, palralrawthunga kai lri maka siwlri.

¹² Kwi lasu lri pacai ikai ki taikaiyaneini acaicali, lri kai dulrunga drele kai ki kadaengane.”

Patharukai ki Yehuiakime

¹³ Matiisalregesege, kai umawmase kai yakai ku amatikurwane! Kai lasu arakai ku kai madringelrese ku alrima si ngitatudaane ku daane ki talialalai, arakai ku kai madringelrese ku tapiane la aru paswadrau tudaane ku daane ki talialalai. Kwi lasu wavutha ki laumawmase pakaungu, si kai pawlrawlrau.

¹⁴ Matiisalregesege, kai umawmase kai yakai ku amatikurwane! Kwi lasu amia kai, “Lri tudaanaku ku matisalru ku daane ki talialalai, si tuswadrau ku macuculrudu ku daane.” Kwi lasu lri tulribange, lai arakai ku cedare ka angatu tusadringidringane, si paderau ku duduli.

¹⁵ Bekace sana tudaanesu ku daane ki talialalai si ka mathaithariri ki palrapalra ka niarakaiyane ku cedare ka angatu, ka sapelaelane ka malrigilisu ka mathariri ka talialalai? Ku tamasu makalawtu kisupisupilri ku akaesadhane. Kwi lasu lu ngivelevele taarakaiyane ku dringelresane; ku piapiaini masulialialiivate patuelre.

¹⁶ Pwasakai ki umawmase ki matiakukuru ka kadrwa ku paralubu; kwi lasu masulivalivalivate patuelre. Kikai yai sapelaelane ka wathingale ki Tamatama kai lasu.

¹⁷ Ai kusu kathane ku angipapakaesadhane kararau ku amuesadhane sikakathane; patwaeraeraisu ku erai ki kadrwa ku pasalrivane, la arakaisu ku ngikarakacanane dredrepete ki laumawmase. Tamatamaku ka amia kikai pelaela.

¹⁸ Lakamani, ku patharukai ki talialalai ki swa Yuda ka Yehuiakime ka lalake ki Yusia, amia kai ku Tamatama: Kadrwa ku umawmase kulri pasikai iniane adirivane iya kai: Ala matiasalregesege kai talragili! Kadrua ku umawmase kulri pasikai iniane adirivane: Tamatamali! Talialalaili!

¹⁹ Kwi lasu lri kisaralidri ki umawmase, si kicilri pulatadre ki cekele Yerusalrime, mia ki wadralreke ki ruba.

Patharukai ki angimiane ki laumawmase ki swa Yerusalrime

²⁰ Laumawmase ki swa Yerusalrime, mwa ka lregelrege Lebanungu si tawtau! Mwa ka Basane si tubi! Twaladha ka lregelrege Muabe si karaleale! Asi lwiyane ku la matatutalragi numi kiapamakinga makanaelre.

²¹ Sa ngiradheradhekaneana numi ku Tamatama napakiapapawlringau numiane, la iyalringa numi kai: Kai nai lri kilalranga! Singikalavavaalake numi ka macecelethe; kadrwana ku tapasalaladhane numi ki Tamatama.

²² Ku tarasangililuku numiane lri kiiluku ki valrigi; ku matatutalragi numi lri kiravase; lri kiarubwane numi makanaelre; asi lwiyane makalra kai piapia numi kai ngialisiane.

²³ Yakaikai numi ki daane ki talialalai ka niarakaiyane ku cedare ka angatu Lebanungu tudaane, malakelakebeta la iyaiya numi, ai lu kela ku amatikurwane, lri matiikukuru numi! Lri mia numi ki twalalalake dadange ki sakiangeange.

Ku Twaumase wasaibange ki Yehuiacingi

²⁴ Ku Tamatama amia kai ki Yehuiacingi ka lalake ki Yehuiakime ka talialalai ki swa Yuda, “Kwaku ka palralrawthu panianiake ka Twaumase lri kiketeketaku: Adravane ka ilukuli muswane pikai ki vanaleli ka tara ka hange, lri mialriaku mwalra si cilri muswane,

²⁵ La baai ki kakiwcusu, kalri papacai muswane ka umawmase. Lri alraku muswane si baai ki Nibukadenezere ka talialalai ki swa Babilunia si lakwapingini.

²⁶ Lri malraku muswane si tinasu pakatwase mwa ki maelane ka kuni, mwa kudra ki kaika takitulalakane numi ku kadaengane; lri ikai numi kwini pacai.

²⁷ Lri apisiwlri numi kainganai, ai lri kapalralraauthunga kai dulru kainganai siwlri.”

²⁸ Amiaku kai, “Kwi Yehuiacingi ka talialalai kaika ngimiyaiya ki vaeva ka cwacwake, ka kadrwa ku lri malra ka didilrungu? Lu kaika ngimiyaiya kwini, ani kiciilri makanaelre kwi lasu si lalalakeini, si kipakatwase acaicali mumaelane ka cekele?”

²⁹ Kadaengane! Kadaengane! Kadaengane! Kilalra ku vaga ki Tamatama.

³⁰ Ku Twaumase amia kai, “Kai umawmase kai nikelretaneenga kalri kawlrase ki lalalake, si ka amaninga kudra kadrwa ku namanemanenga ka umawmase! Kai lasu kadrwa ku mwabaibalrithi kulri mucungulu ku taetalane ki talialalai ka Davidi; kadrwa ku natangeeanga kulri rathudu ki swa Yuda. Tamatamaku; ka amia kai pelaela.”