Yerimia 21 - Ngudradreadrekadhane Ka Sisiu 魯凱語聖經

Wasakalai ku akamudane ki swa Yerusalrime

¹ Ku talialalai ka Zidikia siakawlu ki Pasehure ka lalake ki Malekia si barakalai ka Zipania ka lalake ki Masia pakainganai kikawriva nakwane. Kwi lalasu kiatubi:

² “Ala atalingikaiyana naiane kitubi ki Tamatama, asi lwiyane ku Nibukadenezere ka talialalai ki swa Babilunia waililuku ki lakwapingi si lringulu kai ki cekele. Kwi lasu alau lri pasikai naiane pia ku pinangu Twaumasane ka puku, vutha pasiwlri ki Nibukadenezere.”

³ Ngwalai kikai, ku kipelaelali ki Tamatama la papiaku liniane pelaela, ku lrika apelaelane lini

⁴ ki Zidikia, ku Tamatama ka Twaumase ki swa Iseraylri amia kikai, “Zidikia, kwi lakwapingisu yacengecenge makakaruburuburu ki talialalai ka Nibukadenezere si ililukuini ka lakwapingi; lri pamakiaku ki kwapingisu, si sarubu tuabate ku sakikaruburane ka adreme pikai kabicelrakane ki cekele.

⁵ Lri pakaelreaku ku puku, ikai ki lisiane, ki elathane, si girimucane kikaruburu numiane.

⁶ Lri papacadhaku patuelre ki yakai ki cekele ka laumawmase; ku umawmase si lawaudriwdripi lri kiara swalrubu pacai.

⁷ Ala kusu, ku latabebelengesu ki kunkwane si laabalu ki tamakakaruburane, ki silravane, ki swalrubu, lri baadhaku patueelre ki talialalai ka Nibukadenezere si kiasanu papacapacai liniane ka badha. Ku talialalai ka Nibukadenezere kai lri kakuru numiane, kai lri kisapalra numiane; kwi lasu lri pusiraanau numiane pikai ki apacadhane. Tamatamaku; ka amia kikai pelaela.”

⁸ La pacungulu, ku Tamatama sikawlu nakwane papia ki laumawmase iya kai, “Drela! Kwaku ka Tamatama pia cucubungaku numiane kai apanianiakane ka kadalranane si apacadhane ka kadalranane, lanu ngipapilri.

⁹ Ku asuru ikai kai ki cekele ku laumawmase lu kaika wapacai ki takikaruburane, wapacai ki silravane ki caemane. Ai kudra papia ki walringulu numiane ka swa Babilunia kusange, kai lri pacai, lai lri ikai ku adulrwane mubere.

¹⁰ Malrithethenga naku ku apathavungane kai ki cekele, la amudu kai ki cekele. Lri malraku kai ki cekele si baai ki talialalai ki swa Babilunia; kwi lasu lri lama kai ki cekele. Tamatamaku; ka amia kikai pelaela.”

Wasaibange ki daane ki talialalai ki swa Yuda

^11-12 Ku Tamatama wacunu nakwane iya kai pelaela ki daane ki talialalai ki swa Yuda ka mwabaibalrithi ki Davidi, “Kunumi kicacaligira kilalra kai vaga ki Tamatamali. Kunumi pivaiya arakai ku aparamaramavane saibange, la patwalai ki tara tusinalremelreme dredrepete palribulu ki kiadredredrepete ka umawmase. Lu kaika miyaiya kwini, kwi ngangane ki kakwakudhane numi lri pangiracuku ki lisianeli; kwini yai kadrwanga ku umawmase ku lri dulru edrepe.

¹³ Yerusalrime, lri kiecebaku muswane! Yakaisu belenge ki abeelenge ka lregelrege mia ki maadrau ka lrenege ka acegecege ikai dratatane. Ngiakalrilrigusu kadrwa ku umawmase ku lri dulru kikaruburu muswane, si buruku kwi saravadrane ka kepale;

¹⁴ Ai lri ngwaladhaku ki kakwakudhanesu si pathavungu muswane. Lri lamaku ki daanesu ka talialalai; ku kelrabe lri utu patuelre ki ngiathalringulu. Tamatamaku; ka amia kikai pelaela.”