Yerimia 20 - Ngudradreadrekadhane Ka Sisiu 魯凱語聖經

Makakalisi ku Yerimia si Pasehure

¹ Ku barakalai ka Pasehure lalake ki Imere amani ku abebeelengenga ki taradrangalrungalru ki daane ki Tamatama sa kilalra ku tapelaelaneli ku vaga,

² walrumai nakwane, si malra nakwane emenge pikai Biniyamingi ka lrawlrawdru ka yakai tali dradha ki daane ki Tamatama.

³ Sakakaiyane ki mialrealre, ku Pasehure la pulatadre nakwane, la iyaku kai iniane, “Ku Tamatama kai swanagane muswane pasi Pasehure. Ku sunagane muswane yai ‘Ngithalringulu matiaukukuludru’ amia.

⁴ Asi lwiyane ku Tamatama amia kai kawriva, ‘Lri pangwaladhaku muswane kusu si talragilragisu lu kidremedreme lai lrika matiaukuludru; lri dredredrelesu ki lalasu lu kipapacapacai ki badha kiara lrabu. Lri malraku ki swa Yuda si baai ki talialalai ki swa Babilunia parathudu

⁵ Lri paravasaku ki badha patuelre ku tacekecekelane ki yakai adringi ki cekele, lai malra ribici ki yakai ki cekele ku ruburubu lini si takuciacingalre ka lawbubulu, adravane ka takuciacingalre ka nipudringadhane ki latalialalai ki swa Yuda lri maalra ribici. Kwini lalasu lri malra sanaka lawbubulu salri pwa ka Babilunia.

⁶ Ala kusu, ka Pasehure, lri makanaelre numi ka wacekecekele kiravase pwa ka Babilunia. Lri pacaisu ikai kavai, si kidralreke ikai kavai; kudra latarakilalalalra lu kadraedraedrangelresu ku latalragilragisu lai lri mialri kipadradresenge ku thadalrane muswane ku tangimiane.’ ”

Ku Yerimia akwaiya ki Tamatama

⁷ Tamatama! Watavuvulrucusu si tumeameamelrace nakwane; la tuvagavaagaku muswane. Sanianiangesu ka madradrau nakwane, pamalebesu nakwane. Sanaka umawmase la twavavava nakwane; kai lalasu twarakerakeraakete tusawlralrakai nakwane.

⁸ Sana kawrivaku, lrika akwadravane karaleale, si tawtau, “Ngiakarakacane! Mamudu!” Tamatama, lu pelaelaku ku vagasu, tara kiaulralrakai, kiatudreadrekase.

⁹ Lu iyaku kai, “Kainaku lri matikainga ki Tamatama, lai kainaku lri pangukainga ku naganeini pelaela”, ku vagasu mia ki apwi ka yakai ki kidremedremeli kudaladalai, si mwa adringi ki culrale ki lusuli. La kainaku maka besere kikai yakai adringi nakwane kikai vagasu; kainaku wadulru kai putaluvaivai kawriva.

¹⁰ Kialalraku ku matetetenge ki laumawmase: Kwidra nipasaravane ka vaga: Lri ngithalringulu ku matiaukukuludru wakelanga; bwala tahukuku iniane! Adravane ka katalragiyaneli mwakalavalava dredrele makanaelre ku akiarubwananeli kai kituumawmasenga. Kwi lalasu amia kai, “Pakikaila ki kaili ki lasu! Lata pwalra iniane, si bilri iniane.”

¹¹ Ai Tamatama, yakaisu tapalra nakwane; magarangesu sapukwane, matisalru matiukuludru, ku twalilisi nakwane ku umawmase lri amaki makanaelre; kwi lalasu kiathingalenga kudra madrekadrekadrekase lini ku ngialisiane. Kwi lalasu lrika palralrawthunga kiarubwane; ku umawmase lri palralrawthunga kai karimuru ku takiarubwanane lini.

¹² Ai ku Tamatama ka abebeelengenga ki sanaka kwapingi, arakaisu ku aparamaramavane turingaringau; wadrelesu puadringi ki kidremedreme ki umawmase. Padrelaili lu kibilri ku badhali, asi lwiyane ku takitupasalrivananeli wabaadhaku muswane.

¹³ Senadha drengedrengere ki Tamatama! Drengedrengera ki Tamatama! Ku Twaumase patwalai ki manganga ka umawmase palribulu ki kiadredredrepete ka laumawmase.

¹⁴ Ku takitulalakaneli ka vai ani kipusu! Kudra takilrabuthaneli twalai ki barange ki ina kwini ki vai nau kikarimuru!

¹⁵ Kwidra peaelaela ki ama ku mathariri ka vaga ani kipusu! Kwini lasu peaelaela ki ama, “Sawvalai, tarwamarasu ku vaeva ka sawvalai ka lalake!”

¹⁶ Kwi lasu ani ngimia ki kiamudu ki Tamatama ka cekele, kai kikakalithi ki Tamatama. Kwi lasu luka mialrealre ani kilalra ku watubitubi karalealeale, luka mwalringedele ani kilalra ku makarururuburu makakaralealeale.

¹⁷ Asi lwiyane kwi lasu kai papacai nakwane sa kainaku kitulalakeana, la nai sitadralredralreekanenga naku ki barange ki ina.

¹⁸ Anau kitulalake mukawmasane? Bekace ka ngwalai ku angilribatane ku akwalriane si atubiane sikakathane, la ikai ki akiarubwanane pasawlrawlra kai tapanianianiakaneli?