Yerimia 2 - Ngudradreadrekadhane Ka Sisiu 魯凱語聖經

Ku Twaumase siarapale ki swa Iseraylri

¹ Ku Tamatama wacunu nakwane

² papia ki yakai Yerusalrime ka laumawmase iya kai: Pwalringavaku, sa icengecengeananasu madalamesu nakwane! Sa taukarudrarudrangeta, madalamesu nakwane turamuru! Twapapalrangasu nakwane ngukakai ubulane, si ngukakai ki kaika takauawngane.

³ Swa Iseraylri, kusu yai saniangesu ka kawkawluli, ka canidili muswane, ka aswalalangali kitaleke ka madru; ku mabebetethe muswane, lri pulebeaku baai ku amatikurwane iniane. Tamatamaku; ka amia kikai pelaela.

Pasalrivane ki cucungulane ki swa Iseraylri

⁴ Mwabaibalrithi ki Yakubu, ka matwalalai ki swa Iseraylri, kiraraketa ku vaga ki Tamatama!

⁵ Ku Tamatama amia kai kawriva: Maneemanelringa ku drele ki cucungulane numi ku tapamamaneli, si la katwase cilri nakwane kwi lalasu, si mwa tupapalra ki kadrwa ku paluludane ka samiamiange, la kamaninga kudra kadrwa ku paluludaneini.

⁶ Adravane palribulaku liniane pakidaili ki swa Izipiti, ililuku liniane pangukakai ubulane: Ka matwavalrwalru ka aenaenai, ka meameale matiwkuludru ka ubulane, ka kadrwa ku umawmase ku yakaikai, laka kaika tangukaikaiyane ki umawmase dadavace, kai lalasu laka thadaalraneana kai pulringalringau nakwane.

⁷ Waililukaku liniane mwa ki karawmane ka kadaengane, ku lrika akisupilrane lini ku taleke si mathariri ka lawbubulu. Ai kwi lalasu mabebetethe ki kadaenganeli, si pakakudrulru kwi baaili liniane kwi kadaengane.

⁸ Ku labarakalai kaiyana kiavaga: Ku Tamatama yakai inu? Kwi barakalaili kai wathingale nakwane. Ku amani ku warathudu wabaebalre nakwane; ku yuginsia pangwakai ku nagane ki Baale sakalai, si sukubu ki kadrwa ku paluludane ka samiamiange.

Ku Twaumase wakukusu ki kawkawluini

⁹ Lakamani, kwaku ka Tamatama lri pelaku kukusu ki lakawkawluli; lri kukusaku ki lamwabaibalrithi liniane.

¹⁰ Lu mwa papia tali viri ka Saipuruse drele! Kunumi sikawla ki umawmase papia tali talrawane si mwa ka Kidare drele! Lri thingale numi, kai kawmasane kadrwana ku tangimiane kikai:

¹¹ Adravane ki kai samiamiange ka kaika patengane ka Twaumase, kadrwa ku nakuninga ku pabalribalrithi ku twaumase lini; amaniaku kudra lrigu ka Twaumase; ai kai kawkawluli ala malra nakwane balrithi ki kadrwa ku paluludane ka samiamiange.

¹² Lri paukuludraku manugiligili ki subelebelenge, lai lri mukuludru kai thingale ku apiane.

¹³ Asi lwiyane kai kawkawluli pasalriu ku taidrusane: Kai lalasu matwase cilri nakwane ka panianianiake ka berai ka acilai; kai lalasu walruku ku kai lri maka patubaiyu ku taaciladhane.

Ku tangimiane ki swa Iseraylri ku kaika saliakavaeva ku kidremedreme

¹⁴ Kai swa Iseraylri duri? Sa kitulalake aduri? Ani kurikurisi si pwalralra iniane ku badha?

¹⁵ Ku badha mia ki raiyungu papia iniane manunganga girigiringi; ku badha paubulane ku takawaunganeini, paatawlrakavane ku cekeleini, kadrwa ku umawmase ku yakaikai.

¹⁶ Ku swa Mimepise si swa Tapanese wacwakenga ki awlruini.

¹⁷ Swa Iseraylri, ngiakakamanisu ka pakainganai kikai amatikurwane! Sa ilililukaku muswane, matwasesu si cilri nakwane ka Tamatama ka Twaumasesu.

¹⁸ Kikai asasane ku tamwanesu Izipiti manemane ku akaesadhanesu? Apia ungungulusu ku acilai kadravane Nile? Lu mwasu Asiria manemane ku akaesadhanesu? Apia ungungulusu ku acilai kadravane Iuparate?

¹⁹ Kwi pasalrivanesu lri pathavungu muswane; kwi tabaebalreanesu lri kukusu muswane. Lri thingalesu, ku matwase cilri nakwane ka Tamatama ka Twaumasesu, ku kai mwasakene mukuludru nakwane, maadrau turamuru ka pasalrivane! Kwaku ka abebeelengenga ka Tamatama ka abebeelengenga ki sanaka kwapingi amiaku kikai pelaela.

Ku swa Iseraylri malrase sukubu ki Tamatama

²⁰ Ku abebeelengenga ka Tamatama amia kai: Swa Iseraylri, malrasengaasu kai lrekemeli; kaisu pasalaladha nakwane, kaisu wasukubu nakwane. Yakaisu ki sanaka lregelrege belenge, sanaka tailebeane ki angatu, pasuru athingalane ku tapidrurane sukubu ki samiamiange.

²¹ Walredrekaku muswane, mia kudra lu pilriane ku ivai si lredreke; ku arakaili mathaithariringa ka salredredreke ka budu. Ai akabalrithisu ka salredredreke! Amanisu kudra malisi ka salredredreke, ka kadrwa ku paluludane ka yaubulane ka budu!

²² Adravane arakaisu ku sapukwane ku sikingi sinau, lri dreleana naku ku udingi ki pasalrivane.

²³ Asu dulru kainaku ngiapakakudrulru, kainaku wasukubwana ki Baale iya? Drela athingaalaneana kwi tapudrapalanesu ikai valrwalru, ngulringava luka watumanesu. Mararamausu ki yaububulane ka lrakeda ka wamwa kidruanga lailailai,

²⁴ mia ki mwarisawvalavaalai ka yaubulane ka ruba, lu kabara kai maka ngiararuthuku. Lu kurisi iniane ku sawvalai ka ruba kai pakakucingalre; luka kalabarane maduai kipadradresenge iniane.

²⁵ Swa Iseraylri, madha silape ki drumane ka twaumase; madha kurisi pakela ku mapilai, madha kurisi pakela ku mameale ku lrulrungu ki kadhamane! Ai amiasu kai: Ini, kainaku lri siwlri! Madalamenga naku ki twaumase ki maelane ka kuni; lri tara tupapaalraku!

Kai swa Iseraylri naika kiapathavungu

²⁶ Ku Tamatama amia kai, “Swa Iseraylri! Kunumi lri mia numi ki tarakupawpa ka kiapwalra kai thingale ku atumanane ki sakwalrialri; kunumi si latalialalai numi, latabebelenge, labarakalai, layuginsia lri kwalri kai thingale ku atumanane makanaelre.

²⁷ Kunumi ka la siatama ki angatu, ina amia ki lrenege, lri kitusinalreme numi makanaelre; asi lwiyane matwasenga numi nakwane, si kai mubangalre siwlri mwa nakwane kai. Ai lu kipadradresenge numi ku amatikurwane, lri kitubi numi nakwane ku akipalribulane.

²⁸ “Kwidra ngipapasikai numi tutwaumase yakai inu? Kwini alaiyasi lri dulru palribulu, lu kipadradresenge numi ku amatikurwane, papalribula liniane! Swa Yuda, ku twaumase numi mia ki cekele numi ku kalrane.

²⁹ Wabaebaebalre numi makanaelre! Anu kidrikidrikisiana ku vaga numi nakwane?

³⁰ Lu pathavungaku numiane kadrwa ku taadilane, asi lwiyane kainu mwabangalre kibulru. Mararamau ki malisilisi ka raiyungu, papacai numi ki yuginsia numi.

³¹ Swa Iseraylri, kicacaligira kilalra kai aiyaneli! Ngiamiaku ki ubulane ki matiaukuludru ka kadradridrimitane? Anu kirimu lri ngisasingikaai nai ku takidremedreemane nai iya, si kai kainganai siwlri mwa nakwane kai?

³² Ku tawvailekete lri dulru karimuru ku siluini? Ku kiarakerakete lri dulru karimuru ku laimai ka sangiragelananeini? Ai kai kawkawluli maulainga karimuru nakwane.

³³ Mathiathingale numi kamani silape ku siasilangane; adravane ka pairairange ka ababai twalralrau numiane.

³⁴ Kwi laimai numi swaete kwi erai ki matiakukuru si kadrwa ku pasalrivane, ai kwi lalasu kai waribici pasalriu ki daanesu. “Adravane ka miyaiya kai,

³⁵ la iyalringa numi kai, ‘Kadrwa ku pasalriuli; ku lisiane ki Tamatama nakwane kadrwanga.’ Ai kwaku ka Tamatama lri pathavungaku numiane, asi lwiyane kai numi ngiathathingale kwi pasalrivane numi.

³⁶ Ngiatatudrekase numi, la papia numi ki twaumase ki maelane ka kuni! Ku swa Izipiti lri pakasalivalrau numiane, mia ki swa Asiria ka napakasalivalrau numiane.

³⁷ Lu bibilrili lri guruthungane numi ki inwane katwase Izipiti. Asi lwiyane kwaku ka Tamatama wacilringa naku kudra satalu numi ku samiamiange; kai numi lri dulru patwalai liniane malra ku akaesadhane.”