Yerimia 19 - Ngudradreadrekadhane Ka Sisiu 魯凱語聖經

Matuthiri ka didilrungu

¹ Ku Tamatama siakawlu nakwane katwase langai ku vaeva ka didilrungu, la paililuku nakwane ku lamarudrange ki cekele si latarudrawdrangenga ka barakalai,

² la ngukakai lribate ki “Tacwacwakane ki ladilrungu ka lrawlrawdru” si mwa valrwalru Hinume. Ku Twaumase ani ikai kwini pelaela kai sudralruli kai vaga amia nakwane.

³ Ku Tamatama iya kai amia nakwane, “Latalialalai ki swa Yuda si swa Yerusalrime ka laumawmase, kunumi kicacaligira kilalra; kunumi kilalra kai vagali ka Tamatama ka abebeelengenga ki sanaka kwapingi, ka Twaumase ki swa Iseraylri. Lri pulebeaku ku amatikurwane pikai kikai, ku kialalra kikai lani tukinkingi ku calringa lini makanaelre ki akwadravane.

⁴ Kwidra piali kikai amani sa cilringa katwase nakwane kai kawkawluli; kai lalasu yakai kikai si papia ki drumane ka latwaumase patarumara, la kudrulrunga kai ki kadaengane. Kwidra sukubu lini ku latwaumase kaika thingale lini kaika thingale ki cucungulane lini, ku latalialalai ki swa Yuda la mialri kai thingale, kwi lalasu wamalra ku erai ki kadrwa ku capili si gugu pikai kikai,

⁵ pasiakai ki Baale pia ku tapatarumaramarane, la pikai belenge ki lalalake lini lama tusapatarumarane ka waudriwdripi. Kainaku wadrekaseana liniane pia kai iya; adravane ka akidredremane kainaku pakelana kai kidremedreme ku miyaiya kikai.

⁶ Lakamani, yakai ku akelane ku vai ikai kai kailri kipasi Tupithenga kai lri kipasi vaalrunga ka Hinume, lri kipasi ‘Tapapacapacadhane ka valrwalru’.

⁷ Lri ikaiyaku kai kabebetethe ku nau pia kwini iyaiya lini makanaelre ki laumawmase ki swa Yuda si swa Yerusalrime. Lri paakaciaku ki badha liniane, si lri papacai liniane. Lri pakanaku ki laadhadhame si waudriwdripi ku wapacai ka kinawmasane lini.

⁸ Lri pakipadradresengaku kai ki cekele ku matiukuludru ka akamudane; sanaka umawmase ku walribate si drele lri mukuludru si katwase.

⁹ Ku badha lri lringulu kai ki cekele, si papacai ki yakai kwini ka laumawmase. Kwini yakai adringi ki cekele ku laumawmase ngwalai ku takilringulane lini sa kakadrwa ku akaneane, la kaanenga ku beate ki pasiagiagisi lini, adravane ka lalalake lini wakaane!”

¹⁰ La pacungulu, ku Tamatama siakawlu nakwane ikai ki redelaneli ki laumawmase cucubungu cwake kwini didilrungu,

¹¹ si papia liniane pelaela ku taiyane ki Tamatama ka abebeelengenga ki sanaka kwapingi. Amia kai, “Lri amudaku kai ki laumawmase, si baburuku kai ki cekele, mia ki umawmase lu tatithiri ki didilrungu, kai dulrunga cakupu. Ku laumawmase lri dralreke liniane pikai Tupithe, asi lwiyane kadrwanga ku talidrumane ku apikaiyane dralreke liniane.

¹² Lri tuthadaalranaku tungimiyaiya kai kiecebe kai ki cekele si yakai kaika laumawmase, lai lri a Tupithe kai cekele kai.

¹³ Ku ladaane Yerusalrime, ku daane ki latalialalai ki swa Yuda, si nayakai ki talrugulrugane papia ki latariau lama ku sapasangulrelremane, ka papia ki latwaumase paralikiliki ku bava ka daane, lri mia ki Tupithe patuelre, amakudrulrunga.”

¹⁴ La katwasaku Tupithe, ka amani kudra sikawlu nakwane ki Tamatama mwa pelaela kikai vaga. Wakelaku kai ki daane ki Tamatama, si acegecege ikai kalatadrane la papia ki laumawmase pelaela.

¹⁵ Ku taiyane kawriva ki Tamatama ka abebeelengenga ki sanaka kwapingi, ka Twaumase ki swa Iseraylri. Ku Twaumase amia kai, “Lri singikaiyaku ku taiyanengali pulebe ku amatikurwane pikai kai ki cekele si ngiathalringulu ka lacekele, asi lwiyane makelrathe numi si kai kilalra paluludu kai vagali.”