Yerimia 18 - Ngudradreadrekadhane Ka Sisiu 魯凱語聖經

Ku Yerimia yakai ki daane ki taratudilrungu

¹ Ku Tamatama amia kai nakwane,

² “Lu mwa ki daane ki taratudilrungu; ikai kwini yakai ku aiyaneli sudralru muswane.”

³ La katwasaku mwa ki daane ki taratudilrungu. La drelaku kwini ki lasu yacengeecenge velevelevele kwini ki valringatai, ka twadilrudilrungu.

⁴ Kwidra la piapiaini ku dumulu kadrwa ku kiatulrepenge kathariri, kwi lasu laka arakai kwini dumulu pia ku drumane ka lawbubulu.

⁵ Sakabilrilinga, ku Tamatama la peelanga iya kai nakwane,

⁶ “Bekacaku kai maka singikai ku tapangimiane ki taratudilrungu ku tapianeini ki dumulu si marasikai numiane ka swa Iseraylri? Kunumi ikai ki alrimali mia numi ki dumulu ka yakai ki alrima ki taratudilrungu.

⁷ Kai pwasusu lukaigane, lri pelaelaku ku amwalrane, aburukane, ku akabebetethane ki vaeva ka kuni,

⁸ kwini kuni alaiyasi cilri katwase ki pasalrivane, lri ngikusawlri kai kidremedremeli, si kai pulebenga ku amatikurwane.

⁹ Kai pwasusu lukaigane ku apelaelaneli ku alredrekane, si cegecege ku vaeva ka kuni,

¹⁰ kwini kuni alaiyasi kai pasalaladha nakwane, la tuvaevaeva pia ku ngialisiane, lri akabalrithi kai kidremedremeli, si mwalra ku natakidremedremaneli ku nau pia kwini iyaiyali.

¹¹ Lakamani, kusu iya kai pelaela ki laumawmase ki swa Yuda si swa Yerusalrime: Kiadredredremaku ku alrumadhane liniane, si padulrudulru ku apathavungane liniane. Kusu pasapukwana liniane ku aidrengerane pia ku ngialisiane, si akabalrithi ku kakwakudhane.

¹² Kwini lalasu lri tubalre, ‘Ini! Manemane ku atupelane nai? Lri singikaai nai ku nau pia kwini iya ki kidremedreme nai, pasalaladha ku kelrathanane nai pia ku malisi.’ ”

Ku swa Iseraylri wacilri ki Tamatama

¹³ Lakamani, ku Tamatama amia kai: Kunumi kivavaga ki lakuni, aneanenga ku kialalra ku ngimiyaiya kai? Ku laumawmase ki swa Iseraylri paiya ku taingeaane ku ngialisiyane turamuru.

¹⁴ Ku pasabu belenge lregelrege Lebanungu ngiaderenawnga? Ku mangangerece ka acilai vaalru lregelrege madrekare?

¹⁵ Ai kai kawkawluli marimurunga nakwane; kai lalasu papia ki samiamiange lama ku sangwalreme. Kai lalasu twabakebake ikai ki naika angukaiyane lini ka kadalranane, kai ngwakaikainga ki sidrumane ka kadalranane; kai lalasu ngwakakai ki ngwadedethe ka kadrwa ku sapatuthingalane ka kadalranane.

¹⁶ Kai lalasu kai ki kadaengane pakabalrithi amatikiwkiwcunga, si ka palralraauthunga kicilri ki umawmase; ku walribalribate ku laumawmase wavetevete mukuludru makanaelre.

¹⁷ Lri ikaiyaku cucubungu ki badha pathirakupu ki kawkawluli, mia ki singi talrawane ka valrigi palai ki thuvugu. Lu kela ku amatikurwane, lri lrilrikudraku kai thethengete liniane.

Kiadremedreme ku akabebetethane ki Yerimia

¹⁸ Ku laumawmase la iya kai, “Bwala! Bwala takiecebe ki Yerimia! Sana urikaita yakaai kai barakalai kai lri bulru mitane, la ikai kai malrigili kai lri pawlecege mitane, yakai kai layuginsia kulri pelaela ku vaga ki Twaumase. Bwala takukusu ki Yerimia, madha kilalranga ku vagaini.”

¹⁹ Ngwalai kai la inulriaku, “Tamatama, kilalalra kai apelaelaneli, kilalalra kai sakukusuane nakwane ki badhali.

²⁰ Ku mathariri lri kiarakai ku ngialisiane kibilri? Kwi lalasu walrubange lri kabebetethe nakwane. Kiatubiaku muswane ala kidredreema, nayakaiyaku cucubungu muswane si pasikai liniane kitubi; nakiatubiaku muswane ku kaika aikaiyanesu ki lisiane kiecebe liniane.

²¹ Ai kikainga? Tamatama, kiatubiaku muswane: Arakaiya ku silravane papacai ki lalalake lini; kwi lalasu ani pacai ikai ki takikaruburane; kwi laababai lini ani sakapacai ku taelrelre si lalalake; ku layacengecenge ku lasawvalai ani kiara swalrubu pacai, ku lalangukathabarane ani ngisarade itakikaruburane pacai.

²² Sikawla ku tararavaravase lani kela pangitutuluku, si ravase ki cekele lini, kwi lalasu lani ngituluku mukuludru si tubi karaleale; asi lwiyane kwi lalasu walrubange ka lri kabebetethe nakwane, wapaipai ku ami ka lri pwalra nakwane.

²³ Tamatama, wathingalesu kwi madrekadrekadrekase lini ku apapacadhane nakwane. Madha paceacepe kwi ngangane lini, madha paceacepe kwi pasalrivane lini. Kiatubiaku muswane patubakebaka liniane pikai cucubungusu; pikaiya ki elathanesu pathavungu liniane.”