Yerimia 17 - Ngudradreadrekadhane Ka Sisiu 魯凱語聖經

Pasalrivane si akipathavungane ki swa Yuda

¹ Ku Tamatama amia kai, “Swa Yuda ka laumawmase, ku pasalrivane numi yai niarakaiyane ku adreme ka ingipice pacase, arakai ku daimune ka ceneke pacase pikai ki kidremedreme numi, la papacase pikai ki lapiu ki tapatarumaramarane numi.

^2-3 Ikai ki kadaengane numi sanaka masalese ka angatu tailebeane, sanaka lregelrege ka tikiane si ubulane ka madrau ka lregelrege, pasikai ki ababai ka twaumase ka Asera raedre ku tapatarumaramarane si tinutwaumasane ka angatu ka ulrudru. Asi lwiyane yakai numi kai ki kuni sanaka inunga pasalriu, lri paravasaku ki badha numi kwi lawbubulu numi.

⁴ Lri tara ciilri numi kwi patarumarali baai numiane kwi kadaengane; lri paacaicaliaku numiane pamwa kudra ki kaika thingale numi ka kadaengane si aduri ki badha. Pakagirimucunga numi nakwane, kai lisianeli kwadaladalai, ka kai lri kaedrepenga palralrawthu.”

Pinacasane ku tangitatupelane

⁵ Ku Tamatama amia kai: Ku swadralru ki kawmasane ka umawmase, la satalu ku puku ki lri tara paacai ka umawmase, si baebalre cilri nakwane ka Tamatama ku umawmase, ku miyaiya kai ku umawmase lri kipusu.

⁶ Kwini lasu lri mia ki wacebecebe ka tatitiki ka angatu ikai ki enaenai, ka madrau ikai ki meameale ka calragulragu, madrau ikai ki ububulanenga ka titimwane ka kadaengane; kwi lasu lri kakadrwalringa ku akiragadhaneini.

⁷ Ku saliaka vaeva ku kidremedreme sudralru nakwane ka Tamatama, kudra miyaiya kai ku umawmase lri kaesai turamuru!

⁸ Kwini lasu lri mia ki angatu ka kialredreke pikai ki babiabila ki aciacilai ka vaalru: Ku balace lri mwadringi daruru ki acilai, kai mwakuludru ki cengelrau ki dralrangedrangane, ku vasau takasaleseeane, la kai ateateke ku apumadrwane.

⁹ Kai kidremedreme ki umawmase kadrwa ku walribate ku tavuvulrucane, laka kadrwa ku walribate ku ngilisianane; aneane kulri maka dulru paladeke drele?

¹⁰ Kwaku ka Tamatama wadrelaku mwadringi ki kidremedreme ki umawmase, pwadriadriingadhaku drele ki kidremedreme ki umawmase; la singikaaiyaku ku kakwakudhane ki umawmase pangibilri iniane.

¹¹ Ku kai ngwakai ki pinacengecengane si satacekecekelane ku umawmase mia ki adhadhame ka wakubu ku kaika batukuini. Kwini lasu lu ukagarangane icengecenge lri sakacilri kwini tacekecekelane; lukabilrilinga kwini lasu lri kamani kwidra amamamanga.

¹² Kai daane ki Twaumaseta mia ki thelare ka taetalane, twalai kunadruma acegecege ikai lregelrege.

¹³ Tamatama, amanisu ku sidramadrama ki swa Iseraylri; ku matwase cilri muswane ku umawmase lri kiarubwane makanaelre. Kwini lalasu lri kawlrau, mia ki nipacasane ka nagane pikai ki daedae. Asi lwiyane kwini lalasu matwasenga cilri ki Tamatama ka tacebeane ki mwalwaludru ka acilai.

Ku Yerimia kiatubi ki Tamatama ku akiparalubane

¹⁴ Tamatama, kiatubiaku muswane sulravaili si pawdringai, la nau siwlriwlriane kathariri ku kinawmasane; kiatubiaku muswane palribulaili, la nau kasulivate. Amanisu ku lrika adrengedrengeraneli.

¹⁵ Ku laumawmase amia kai nakwane, “Ku tapakipapawlringavane naiane ki Tamatama matumane? Pangimia iya iniane!”

¹⁶ Tamatama, kainaku kiatubiana muswane ku apulebeanesu pikai ki kinawmasane lini ku amatikurwane, la kainaku kiragai ku akipadradresengane lini ku akwalriane ka vai. Tamatama, kikai wathingalesu patuelre; la pulringalringawsu kai taiyaneli kai vaga.

¹⁷ Kiatubiaku muswane madha pakakiwkiwcu nakwane, asi lwiyane kathaanesu ku takilakebaneli lu kipadradresengaku ku akwalriane.

¹⁸ Kiatubiaku muswane pakiarubwana kwidra twalililisi nakwane, nau kai kamani ku kiarubwane, kiatubiaku muswane pakakiwca liniane, nau kaika amani ku makiwcu. Kiatubiaku muswane pakipadradresenga liniane ku amatikurwane, si pakitulreepenge amudu liniane.

Ngwakai ki apaluludane ku Taisadrasadrane ka vai

¹⁹ Ku Tamatama amia kai nakwane, “Yerimia, lu mwa kudra atara ngukaiane ki talialalai ki swa Yuda lu mu Yerusalrime ka ‘Lrawlrawdru ki laumawmase’. La mialria mwa ki lalrawlrawdru ki cekele, si ikai kwini pelaela ku vagali.

²⁰ Pelaela ki latalialalai ki swa Yuda si laumawmase, si sanaka masasawlriwlri mu Yerusalrime ngukai kai ki lalrawlrawdru ka laumawmase, ku lrika akiraraketane kilalalra ku vagali.

²¹ Kusu iya kai pelaela liniane: Kwi lalasu alaiyasi taulra ki niake lini, lri kai maka ikai ki Taisadrasadrane ka vai salrisalri ku lawbubulu, kai lri maka salri ku lawbubulu pudaane ki lrawlrawdru Yerusalrime.

²² Kai lri maka salri ku lawbubulu pakatwase ki daaneini, kai lri maka pia sanaka awngane. Kwi lalasu lri paluludu ku baaili ki cucungulane lini ku padradrekase, si pangimia ku Taisadrasadrane ka vai ka saniange ka vai.

²³ Ku cucungulane lini kai twathengete sikakathane, makeelrathelringa, si kai mubangalre kilalra pasalaladha, la kai mubangalre kibulru.

²⁴ “Pelaela liniane, ku apaluludane ku padradrekaseli patuelre. Kai lri maka ikai ki Taisadrasadrane ka vai salri ku lawbubulu mudaane cekele. Lri tara pangimiya ku Taisadrasadrane ka vai si tusaniange ka vai; kai lri maka pia sanaka awngane.

²⁵ Lukamiyaiya kai, ku talialalai lini lri dulru mudaane ki lrawlrawdru cekele Yerusalrime, si kisupisupilri ku takatalialaladhane ki Davidi ku puku. Kwi lalasu lri ngukaikai ki sakikaruburuburane ka palridingi, lri ngurigirigi, ku latabebelenge ki kunkwane, si la swa Yuda, si la swa Yerusalrime lri madrikidrikisi pudaane liniane ki cekele. Kikai cekele lrika palralrawthunga suete ikaikai ku laumawmase.

²⁶ Ku laumawmase lri twalai ki lacekele ki swa Yuda, ki ngiathalringulu ki Yerusalrime ka lacekele, ki swa talikai Biniyamingi, ki yakai ki lalrelrelrege, ki la yakai lregelrege, si yakai tali lrawdru ki Yuda, lri kalrungulrungu mudaane Yerusalrime. Kwi lalasu lri iluku mwa ki daaneli ku Lama ka lrisi si sapatarumarane ka lawaudriwdripi, Taleke ka lrisi si sapasangulrelremane, laka Sakiaseasenane ka lrisi patarumara.

²⁷ Ai kwi lalasu lri tara kilalra paluludu ku drekaseli, si pangimia ku Taisadrasadrane ka vai ka saniange ka vai; kai lri maka ikai ki Taisadrasadrane ka vai salri ku lawbubulu pudaane ki lrawlrawdru Yerusalrime. Kwi lalasu alaiyasi pathaele, lri lamaku ki lrawlrawdru cekele Yerusalrime; ku apwi lri daruru lama ki daane ki talialalai, kadrwa ku umawmase ku lri maka edrepe.”