Yerimia 16 - Ngudradreadrekadhane Ka Sisiu 魯凱語聖經

Sepelane ki Yerimia ku tapanianianiakane

¹ Ku Tamatama amiyanga kai nakwane,

² “Ikai ki miyaiya kai ku taikaiyane, kusu madha karudrarudrange, la madha tulalalake.

³ Lri pelaelaku muswane ku ngwakai ki yakai kai kitulalake si marudrawdrange ku laakipadradresengane.

⁴ Kwi lalasu lri ngwalai ki swalrubu si pacai makanaelre; kadrwa ku lri tubi liniane, ku lri dralreke liniane. Kudra kinawmasane lini lri mia ki lrange ka mabate ikai cakena. Kwi lalasu lu kaika kiara silravane, kiakaruburu si pacai; ku la wapacai ku kinawmasane lri aakaneane ki laadhadhame si lawaudriwdripi.

⁵ “Kusu madha mudadane ki matiathalithi, madha tubitubi ki naaneanenga. Kainaku lri patarumaranga baai ku sulivatane ki kawkawluli, lai kainaku arakainga ku thalradhane kakalithi liniane.

⁶ Ku maesaesaesai ku matiakukuru thadaalrane ka lri pacai ikai kai; kadrwa ku umawmase ku lri dralreke liniane, lai lri ka kadrwa ku lri tubi liniane. Kadrwa ku umawmase ku lri kalreme liniane si ngidadula ngikakiriti ku isiu.

⁷ Kadrwa ku umawmase ku lri ikai ki daane ki matiathalithi si taelre kanekane ungungulu, sasasa ku tamatithalithiane lini, adravane ka wapacai ku tama ku tina, mialri ka kadrwa ku umawmase ku kiasapalra.

⁸ “Kusu la mialri madha mudadane ku wararukurukudrane ku daane, si taelre liniane kanekane ungungulu.

⁹ Amiaku kaika Tamatama, ka abebeelengenga ki sanaka kwapingi, ka Twaumase ki swa Iseraylri: Lri paturaamurunga naku kai dulrunga ngivelevele kai ki kadaengane, kai lri ikainga ku mwalrakalrakai, lai kai lri ikainga ku lingau ki marudrarudrange kapeaperau. Kwi lalasu ku taikawmasanane lini lri kipadradresenge kilakikai.

¹⁰ “Lu pelaelasu liniane kikai vaga kai, kwi lalasu lri kivaga muswane, ‘Ku Tamatama ani pakilringawnga pia kai pathavungu naiane? Manemane ku pasalriu nai? Pangiatumane nai pasalriu ki Tamatama ka Twaumase nai?’

¹¹ Peaelaela madu liniane, ku Tamatama amia kai, ‘Ku cucungulane numi wabaebalre nakwane si katwase sukubu pasikaikai ki drumane ka latwaumase. Kwi lalasu wacilri si katwasenga nakwane, kai kialalra pasalaladha ku sabulrwaneli.

¹² Ai manganganga numi liniane. Takisangililukane numi ki ngilisianane ki kidremedreme numi, si kai kilalra pasalaladha nakwane.

¹³ Lakamani lri cilriaku numiane pakatwase kai, si pamwa kudra kaika thingale numi si cucungulane numi ku kadaengane. Ikai kwini, lri pivai numi pimaungu sukubu ki drumane ka latwaumase; kainaku lri kakalithinga numiane.’ ”

Twalai ki taacaicaliane siwlri mubalriu

¹⁴ Ku Tamatama amia kai, “Drela, lri kelanga kwini vai, lu kiketekete ku umawmase, kai lri iyanga kai, ‘Lri papiaku kudra waililuku ki swa Iseraylri katwase Izipiti ka palralrawthu panianiake ka Tamatama kiketekete’

¹⁵ Lri iyalringa kai, ‘Lri papiaku kudra waililuku ki swa Iseraylri katwase kudra kadaengane ki swa tali dradha, ililuku liniane patwalai ki tamwane lini ka lakuni siwlriwlri ka palralrawthu panianiake ka Tamatama kiketekete.’ Asi lwiyane lri ililukaku liniane siwlri mucekele, mwa kwidra patarumarali baai ki cucungulane lini ka kadaengane. Tamatamaku; ka amiaku kai pelaela.”

Lri kelanga ka sapathavungane

¹⁶ Ku Tamatama amia kai, “Lri sikawlaku pakainganai ki takaalra ka taratukakange si pwalra kai ki laumawmase, lai lri sikawlaku ki taraalwalupu pamwa kavai ki maadrau si tikiane ka lregelrege si libi ka alrisapesape si pana liniane.

¹⁷ Wadrelaku ku tapiane lini patuelre; ku pasalrivane lini yakai cucubungu nakwane, kai lri maka sekete.

¹⁸ Lri pangwaladhaku ku ngilisianane si tapasalrivane si aru drima pathavungu; asi lwiyane kwi lalasu wasukubu kwidra ki kadrwa ku niake, mia ki lawapacai ka samiamiange, wakudrulrunga ki kadaenganeli. Kwi lalasu arakai ku matigiririmucu ka kaika patengane ka latwaumase pasuete ki kikai talikai kai.”

Salrwane si inulri ki Yerimia

¹⁹ Tamatama, kusu yai pukuli si kepaleli; amanisu ku takilakebaneli lu matikurukurwaku. Sanaka kuni lri twalai kai kawmasane kidruanga kainganai mucucubungu muswane, si iya kai, “Ku cucungulane nai wasukubu ki kaika patengane ka latwaumase, si sukubu sikakathane ki kadrwa ku paluludane ka lasamiamiange.

²⁰ Kai umawmase wadulru ngipapasikai tutwaumase? Adravane ka paiyanga, ki lakikwini kaika patengane ka twaumase.”

²¹ Ku Tamatama amia kai, “Lakamani, ki kikai lri tara pathingalaku ki sanaka kuni kai pukuli; kwi lalasu lri thingale ala ka Tamatamaku.”