Yerimia 15 - Ngudradreadrekadhane Ka Sisiu 魯凱語聖經

Malisi ka angimiane ki laumawmase ki swa Yuda

¹ Ku Tamatama peaelaelanga nakwane, “Adravane ka Musi si Samuile ka acegecege ikai cucubungu nakwane si papia nakwane kitubi, kainaku lri tukurwane kai ki laumawmase. Pakatwasa liniane, patwaladha cucubungu nakwane pakatwase liniane!

² Kwi lalasu alaiyasi kivaga, ku lrika amwane lini, amia madu kai liniane, ku Tamatama amia kai: Ku lri kiara caemane pacai, lri kacaeme si pacai! Ku lri itakikaruburane pacai, lri kikaruburu si pacai! Ku lri kiara silravane pacai, lri kasilrau si pacai! Ku lri kiravase, lri kiravase!

³ Kwaku ka Tamatama malrithethaku ku apakipadradresengane lini ku supate ku amatikurwane: Kiapapacai ki lrabu; kiasaralidri ki tawpungu ku wapacai ku kinawmasane; kiakane ki ngiapalapalai ka adhadhame; kiakane ki waudriwdripi.

⁴ Ngwalai ku ngangane ikai Yerusalrime ki Manase ka lalake ki talialalai ki swa Yuda ka Hezekia, lri pakavalracevacaku ki laumawmase ki lakuni kawmasane sana drele liniane.”

⁵ Ku Tamatama amia kai: Swa Yerusalrime, aneane ku lri kakuru numiane? Aneane ku lri pasikai numiane tubi? Aneane ku lri ngibangulu si kainganai kikawriva numiane?

⁶ Wabaebalrenga numi si katwase nakwane; ngiabangulu numi kai thethengetenga nakwane. Lakamani lri talaku kai alrimali si baburau numiane; kainaku lri ngiraruthukunga kai lisianeli.

⁷ Lri ikaiyaku kai ki lacekele tapusu numiane apasawvagavagai mia ki watapusu ki lrapi. Lakawkawluli, lri amudaku numiane; lri papacadhaku ki lalalake numi, asi lwiyane kainu ngiatatupelaela;

⁸ ikai numiane ku walibakane ku labaibai lrika takakalra ki enai ki laveke. Lri papacadhaku ki sapukwane ka layacengecenge, lai lri tubi turamuru ku latina lini. Lri arakaiyaku ku sakwalrialri si ukuludrane kikaruburu liniane.

⁹ Kwidra wapacai ku tapitu ku lalalake ka tiatina waretese si tubakebake; kai maka manianiake. Ku sidramadramaini mautu patuelre; kiatusinalrelreme, la kasulri kai thingale ku apiane. Lri ara badhaku papacai amudu kwidra ki abalu ka laumawmase. Tamatamaku; ka amia kikai pelaela.

Ku Yerimia papia ki Tamatama sidruru ku sakwalrialri

¹⁰ Matisalregesegaku! Ani tulaalake nakwane ku ina? Lri kidrikisaku ku vaga kai ki kuni kai sanaka umawmase! Kainaku pakiasalru ku paisu ki palrapalra, la kainaku kisalru ku paisu ki palrapalra, ai sanaka umawmase wapusu nakwane.

¹¹ Tamatama, alaiyasi kainaku ka pangiamiamia ku takipuawngananeli pasikai muswane; alaiyasi ku badha lu kipadradresenge ku akwalriane la kainaku pasikai liniane kitubi; ani ngimia ku tapuswane lini!

¹² (Kadrwa ku umawmase ku lri dulru celra ku kanabu, inilringa kudra twalai tali dradha, kudra maelre ki lriwlu ka adreme, maparawramuru ka kadrwa ku umawmase ku lri dulru celra.)

¹³ Ku Tamatama amia kai nakwane, “Ngwalai ku apathavunganeli ki kawkawluli ku tapasalrivane lini ikai kai ki kuni lini palraelre, lri sikawlaku ki badha lai lri kainganai si lri ravase ku lawbubulu lini.

¹⁴ Lri pikaiyaku liniane kudra kaika thingale lini ku kadaengane si kituduri ki badha; asi lwiyane kai lisianeli mia ki madrareange ka apwi ka kwadaladalai, ka kai lri kaedrepenga palralrawthu.”

¹⁵ La iyaku kai, “Tamatama, wathingalesu patuelre. Ngulringalringaavangaili, si paralubu nakwane, la bilri kudra lamabebebetethe nakwane kudra laumawmase! Madha pwadaidailane ku abilrianesu; madha paikai kudra adulrwanane lini papacai nakwane. Pulringava, ku kitusinalremeli yai ngwalai muswane.

¹⁶ Lu kawrivasu nakwane, kiacacaligiraku kilalalra patuelre. Tamatama ka abebeelengenga ki sanaka kwapingi ka Twaumase, kwaku swakaiyaku muswane; ku vagasu paswaete ku sakiaragai ki kidremedremeli.

¹⁷ Kainaku pasawlrawlra kai vai, ku ataelreaneli ki palrapalra kiraragai, tarumaramara kisupilri ku akiragadhane ikai ki tapanianianiakane. Pakai ku apaluludane ku drekasesu, tangeangeeaku, si suete kai ki kidremedremeli ku lisiane.

¹⁸ Anau kai telrai kipakwalri? Kai takadulaneli ani kai maka kipawdringai? Miasu ki meameale ka tikiyane ka vaalru ka kaika amakasudralrwalrwane, ka tapakasulriyanesu nakwane.”

¹⁹ Ku Tamatama la iya kai tubalre nakwane, “Lwiyasi siwlrisu kainganai, lri tarumaraku pasuru muswane, si pasiwlriwlri muswane ka sasiakawluli muswane. Lwiyasi kaisu kawriariariva capange la pelaelaelasu ku aiyane ku vaga, lri dulrusu peelanga ka amani ku tarasarusaruru ku vagali. Ku laumawmase lri ngikakamani kainganai papia muswane; kaisu lri singikainga liniane.

²⁰ Lu ikaisu cucubungu ki tayelrelreane ki laumawmase lri pangimiaku muswane ki balingibingi ka lriwlu ku kecengane. Kwi lalasu lu kikaruburu muswane, kai lri maka pamalebe muswane. Lri ikaiyaku tapalra muswane, si palribulu ku akasulivaatanesu.

²¹ Lri patwaladhaku ki alrima ki manganga ka malilisi ka umawmase palribulu muswane. Tamatamaku; ka amia kikai pelaela.”