Yerimia 14 - Ngudradreadrekadhane Ka Sisiu 魯凱語聖經

Matiaukuludru ka cengelrau

¹ Ku Tamatama peaelaela nakwane patharukai ki cengelrau:

² Ku Yuda watubitubi, ku lacekele amaki si kasuburunga. Ku laumawmase waapece ikai cakena si tubitubi; ku Yerusalrime maralealeale tubi kitubitubi ku akiparalubane.

³ Ku satacekecekelane pamwalru ki duri ka sasiakawlu; kwini lalasu sa mwa thili ki baibaiyu la kai maka kidringai ku acilai, la siwlri iluku ku kadrwa ku acilai ku tamwalrwalrwane. Kwi lalasu wakabungu ku awlru, masulri la kai thingale ku apiane ki sakwalrialri.

⁴ Kai subelebelenge kai waudawdale, la ngibitelranga kai kadaengane; ku tarakawaungu masulri ngikakabungu ku awlru.

⁵ Ku yaubulane ku thadi wacilri ku nitau tulalalakane ka lrulai; asi lwiyane kadrwa ku ubulu.

⁶ Ku yaubulane ka ruba acegecege ikai ki lrelrelrege, mia ki yaubulane ka tawpungu ka twathethe; asi lwiyane kadrwa ku ubulu ku akaneane, kwini lawaudriwdripi twaramurunga lu drele ku maca lini.

⁷ Ku kawkawluli papia nakwane kitubi: Tamatama, adravane ka wakukusu naiane kai pasalrivane nai, ala singikaiya kudra pukawnungasu si paralubu naiane. Kai nai watelrai cilri si katwase muswane; pasalriwnga nai muswane.

⁸ Kathanesu ku sidramadrama ki swa Iseraylri, ka amani ku Takipalribulribulane nai lu kipadradresenge nai ki amatikurwane. Lu ikaisu naiane, asu miakau kaika thingale nai ka umawmase? Mia kau walribalribate ka badhabadha ka sanaka mialrealre matuase?

⁹ Asu miakau amani kudra kadrwa ku tangipapalakebane ka umawmase, mia ki amani kudra kadrwa ku puku ka tarakikaruburuburu? Ai Tamatama! Tengatenganesu ka yakai naiane tapalra! Amani nai ku kawkawlusu; madha cilricilri naiane.

¹⁰ Ku ngwakai kai ki laumawmase, ku Tamatama amia kai, “Kai lalasu madalame baebalre si cilri nakwane, la ngisasingikaai ku kidremedreme lini katwatwatwase. Lakamani, magirimucaku liniane; lri pulriingavaku ku tapasalrivane lini, si pathavungu ku pasalrivane lini.”

¹¹ Ku Tamatama amia kai nakwane, “Madha kitubi nakwane ku aparalubane kai ki laumawmase.

¹² Adravane laisi kai lalasu, lri kainaku kilalra ku kitubi lini; adravane patarumara kai lalasu ku Lama ka lrisi si Taleke ka lrisi, kainaku lri tarumara. Lri arakaailringa naku ku amakaruruburane, ku silravane, si swalrubu amudu liniane.”

¹³ Amiaku kai, “Abebeelengenga ka Tamatama, ku layuginsia kadrwa ku amakaruruburane, ku silravane amia yugingi. Kwi lalasu amia kai, palraingisu naiane ikai ki kadaengane nai kisupisupilri ku sulivatane.”

¹⁴ Ai ku Tamatama amia kai, “Kwini layuginsia arakai kai naganeli si tavuvulrucu. Ku patengatengane, kainaku siakawlu liniane, la kainaku drekase liniane, kadruana ku kawrivali ku naniaku vaalanenga. Ku maburusirusi lini kaika baaili; kudra sakalakalai lini ngitatukidremeedreme lini.

¹⁵ Lakamani kwaku ka Tamatama amiaku kai pelaela muswane: Lri kiecebaku kwidra ki la kaika sikawluli ka kaika patengane ka layuginsia; kwi lalasu arakai ku naganeli si yugingi ki swakai kikai, kai lri ikai ku amakaruruburane, kai lri ikai ku silravane iya. Ai lri arakaiyaku ku amakaruruburane si silravane amudu liniane.

¹⁶ Kwidra la kialalra ku sakalai lini ku umawmase lri mialri kipadradresenge ku thadalrane ku angimiane. Lu pacai ku kinawmasane lini, thadalrane lu pacai ku taelrelre si lalalake lini ku kinawmasane, lri kicilri pikai ki kadalranane cekele Yerusalrime, kadrwa ku umawmase ku lri dralreke. Lri pangwaladhaku ku ngangane lini bilri liniane.”

¹⁷ Ku Tamatama peaelaela nakwane papia ki laumawmase pelaela kai kwalrialri ki kidremedremeli iya: Kai lreseli ani mwaludru pivai pimaungu! Nau tubi kai isadrasadra! Asi lwiyane kai sakacekeleli madula; pakialringau ku takilrumadhane.

¹⁸ Matwasaku mulrilringulu, si drele ku kia aralrabu pacai ku kinawmasane; la mucekelaku, si drele ki laumawmase ku ngwalai ki silravane kacaeme tubakebake. Ku layuginsia si labarakalai pangiamiamiya kauawngu, ai kai wathingale luka manemane kwi kawpupungu lini.

Ku laumawmase kiatubi ki Tamatama

¹⁹ Tamatama! Pakiasaalrungasu cilri ki swa Yuda? Magirimucusu ki laumawmase ki Ziyungu? Asu lrumai naiane, la kai nai maka udringai? Mwakalava nai ku sulivatane, ai kadrwa ku takatharirane; mwakalava nai ku akipawdringadhane, la kikukuludrulringa nai.

²⁰ Tamatama! Pasalriwnga nai muswane. Ngiathathingale nai kai tapasalrivane nai, la thingale nai ku pasalrivane ki cucungulane nai.

²¹ Kiatubi nai muswane pulringava ku tapukawnanesu, madha cilricilri naiane; madha pakiaruburubwane ki Yerusalrime ka taetalanesu; madha tukakadrwadrwa ku cegecegesu ku sakiketeketanesu naiane.

²² Ku samiamiange ki lakuni lri dulru pulebe ku udale? Kai subelebelenge lri dulru ngipapulebe ku udale ka sapacebeane ki lasupungu? Tamatama ka Twaumase nai, ku sidramadrama nai yakai muswane, asi lwiyane kilakikai patuelre amanisu ka magagemegeme.