Yerimia 13 - Ngudradreadrekadhane Ka Sisiu 魯凱語聖經

Lakete ka pathalrilriku

¹ Ku Tamatama amia kai cunu nakwane, “Lu katwasa langai ku lalasare ka kaimadhane ka lakete; ai madha tabutaburu pwa ki acilai.”

² La langadhaku ku vaeva ku lakete si silakete.

³ Ku Tamatama la peela pelaela nakwane,

⁴ “Lu mwa ka kadravane Yuparati, la sekete kwi laketesu pikai ki barungulu ki lrenege.”

⁵ La paluludaku ku drekase ki Tamatama mwa kadravane Yuparati, si sekete ku lakete pikai kwini.

⁶ Sangilribatenga kaiyana tarathainu, ku Tamatama la cunu nakwane, “Lu mwa ka kadravane Yuparati malra kudra lakete.”

⁷ La katwasaku siwlri mwa kwini, si kidringai kwini taseketane ki lakete; kwini lakete la kaburawnga, ka kaika arakaikaiyanenga.

⁸ La pacungulu, ku Tamatama la peelanga kawriva nakwane, iya kai,

⁹ “Lri tuthadaalranaku kabebetethe kudra nidrengedrengedrengerane ku tapiane ki Yuda si Yerusalrime.

¹⁰ Kilakikai latanganganga ka laumawmase kai mwabangalre kilalra pasalaladha ku drekaseli. Kai lalasu takasakamiane kakelrathe ki ngialisiane, si sukubu pasikaikai ki drumane ka latwaumase. Ngwalai kikai, kwi lalasu lri mia kikaai ki lakete, ka kadruanga ku paluludane.

¹¹ Ku patengatengane, ani dakipi nakwane amiaku ki swa Iseraylri si swa Yuda. Mia ki lakete dakipi ikai ki kinawmasane ki umawmase. Ani akawkawlu nakwane amiaku liniane, ku lrika akidrengedrengerane kai saniange ka naganeli si kiwsakene; ai kwi lalasu kai kialalra pasalaladha nakwane.”

Tabavane ka dilrungu ka pathalrilriku

¹² Ku Tamatama ka Twaumase ki swa Iseraylri amia kai nakwane, “Yerimia, pelaela ki swa Iseraylri: Sanaka tabavaane ka dilrungu pasutea ku bava. Kwi lalasu lai lri tubalre, ‘Wathingale nai ka apasuteane ku bava sanaka tabavane ka dilrungu.’

¹³ Kusu pelana pelaela liniane: Kwaku ka Tamatama lri arabavaku pakabusuku kai ki yakai kai ki sanaka umawmase; ku yakai ki taetalane ki Davidi ku latalialalai, ku labarakalai, ku layuginsia si laumawmase Yerusalrime lri kabusuku ki taungulane makanaelre.

¹⁴ Lri buravaku liniane, kwi lalasu ku tarudrawdrange ku lavavalake lai lri makalilisi, mia ki tabavane ka dilrungu mapungupungupungu. Kainaku lri kakuru liniane lutuumane, lai kainaku taulra liniane, kainaku lri kisapalra liniane; lri tara pakamudaku liniane.”

Ku Yerimia pakiapapawlringau ki ngiakalrilrigu ku kakudhane

¹⁵ Swa Iseraylri, ku Tamatama amianga kai pelaela. Kunumi yai ngitatwalebea, si kicacaligiri kilalra ku vagaini.

¹⁶ Sa kaiyana kela ku dradrimitane, kunumi sakaiyana ikai ki madradrimiti ka tienaenale mukadrulu, kunumi yai lrigua ki Tamatama ka Twaumase numi. Sa kaiyana baai numiane ku sidramadrama numi ku aledra ku dradrimitane, Kunumi yai lrigua ki Tamatama ka Twaumase numi.

¹⁷ Alaiyasi kai numi kilalra, lri ngwaladhaku ku ngikalrilrigwanane numi si kibubuli tubi; lri kwalriaku tubi alralrese; asi lwiyane ku kawkawlu ki Tamatama kiaravasenga.

¹⁸ Ku Tamatama amia kai nakwane, “Lu katwasa pelaela ki talialalai si tina ki talialalai, dawla liniane patwalai ki taetalane pulebe! Asi lwiyane ku mathariri turamuru ka pagamucu lini mwacilringa.

¹⁹ Tali lrawdru Yuda ku lacekele kialringulu ki badha; kadrwa ku umawmase ku wadulru palribulu liniane. Kiaravase makanaelre ku umawmase ki swa Yuda.”

²⁰ Yerusalrime, drela! Wakelanga ka badha ka twalai tali dradha! Kudra pasiarapale muswane, kudra ngikalrilrilrigusu ku laumawmase yakainu?

²¹ Kudra matatutalragi nai iyaiyasu anika amani ku wakela pamalebe muswane, ku warathudu muswane; yakaiyana ku manemane ku akawrivanesu? Lri miasu ki twalalalake ka ababai ku takiangeangane kiangeange turamuru.

²² Alaiyasi apithingalesu, asu kipadradresenge kikai amatikurwane, ani kipurici ku laimai, ki ngikarakacane tusinalreme, kikai yai ngwalai ki ngilisianane ka pasalrivanesu.

²³ Ku maicelrenge ku umawmase wadulru pakabalrithi ku lrangicini? Ku lrikulau lri dulru mwalra ku kulawini? Alaiyasi dulru, kusu ka twalrawnga pia ku malisi ka umawmase lri mialrisu pia ku mathariri.

²⁴ Ngwalai kikai, ku Tamatama lri pakatwase muswane, mia ki valrigi calragulragu ka wapalai ki sangukimugiane.

²⁵ Kwi lasu amia kai, kikai yai naika akibilrianesu. Kwi lasu malrithethe pia kikai kiecebe muswane, asi lwiyane marimurusu iniane, si katwase satalu ki kaika patengane ka latwaumase.

²⁶ Ku Tamatama lri ngikakamani mulaimai patuelre muswane, si pulrialrivale muswane.

²⁷ Wadrele sa piasu ku kalraseini; wadrele sa ikaisu lregelrege si umawma tupapapalra ki latwaumase ki maelane ka takisuswane, mia ki patara sawvalavalai ka kadrwa ku inwane ka ababai ka wakurikurisi ki siasilangane. Swa Yerusalrime, lri matisalregesege numi! Lri pakela numi lwigane ala lri dulru numi ngibabula?