Yerimia 12 - Ngudradreadrekadhane Ka Sisiu 魯凱語聖經

Ku Yerimia kiavaga ki Tamatama

¹ Tamatama, kudra kithuthunguli ku ngwakai ki pinasalrivane, tapacengeceenganesu patuelre! Ai lri kivagana naku muswane; manemane kikai aparamaramavane? Kai manganga kai umawmase anika takasulivalivaatane ikai kidruanga? Kai taratavuvuvulrucu kai umawmase ani kasulialialiivate sanaka maneemane?

² Walredrekesu liniane, kwi lalasu la balace, si kadrau, la pumadru. Ku ngudwi lini tamatikaikaiyane muswane, ai ku kidremedreme lini kadrwasu.

³ Ai Tamatama, wathingalesu nakwane; wathingalesu kai kakwakudhaneli, la thingalesu ka patengatenganeli kadalame muswane. Kiatubiaku muswane alra saralidri pakatwase ki manganga ka umawmase, mia ki wamalra ki kiu bilibili pwa ki taculuculwane, alra liniane ruvu pakeela kudra ki taculuculwane ka vai.

⁴ Ku kadaengane nai lri tarathainwana cengelrau? Kai laubulu ki laumawma lri pakela lwigane karudame? Kai langiapalapalai ka adhadhame si wadadadavace ka waudriwdripi wapacainga patuelre. Asi lwiyane kai sakacekeleli ngialisiane; kwi lalasu amia kai: Ku Twaumase kai lri maka drele ki kakwakudhaneta.

⁵ Ku Tamatama amia kai: Yerimia! Alaiyasi malalailaisu ki umawmase la kidulrusu, lai lri maka tumanesu dulru malalailai ki rigi? Alaiyasi kaisu maka sutelrai acegecege ikai ki taswadraavane ka kadrwa ku manemane, lai lri maka tumanesu dulru acegecege ikai babiabila ki kadravane Yuredange ki mawangatungatu?

⁶ Ku labetakanesu si retesanesu wabaebalrenga muswane makanaelre; kwi lalasu ngiaelrenga si lri kainganai kikaruburu muswane. Adravane mia ki valu ku limemane lu kawriva, madha kasalrusalru liniane.

Ku Tamatama ngwalai ki kawkawluini kwalri ku kidremedreme

⁷ Ku Tamatama amia kai: Wacilringa naku ki swa Iseraylri, la pisadranga naku ki pilrili ka kuni. Wamalraku ki kadalameli ka kawkawlu si baai ki badha.

⁸ Kai pilrili ka laumawmase wabaebalre nakwane; kai lalasu mia ki yakaai ki angatungatu ka raiyungu papia nakwane giringi, lakamani ku kavalracevaceli liniane.

⁹ Ku pilrili ka laumawmase mia ki adhadhame ka kialringulu ki takanga kipwalralra; ku takanga la tawtau ki waudriwdripi dawlu pakisupilri ku nipanane

¹⁰ Ku waerece ki lakuni mabebetethenga ki babudwaneli; kwi lalasu wadradredrenga ki umawmali, la acinilrianenga kwi kadalameli ka umawma.

¹¹ Kwi lalasu paacalragulragu kwi takauawngane; kai dreleli kai cucubungu matiisepele. Kai lakadaengane aubulanenga, laka kadrwa ku umawmase ku makalithi.

¹² Kulri pakamudu lri ngulralregelrege kainganai. Lri paaruswadravaku ku amakaruruburane; kadrwa ku umawmase kulri kisupilri ku rathudane.

¹³ Ku lredreke ki kawkawluli yai mugi, ku kitaleke lini laka cecenekane ka angatu; ku kwalri lini kaungu, kadrwa ku paluludane. Sana utaluvaivai kai lisianeli, kwi lalasu kadrwa ku akitalekane lini.

Tapukawnane ki Tamatama ki ngwadadethe ki swa Iseraylri ka lakuni

¹⁴ Ku Tamatama amia kai, “Kikwini langwadadethe ka lakuni, ngwalai ku tadrikisane lini ku patarumarali baai ki kawkawluli ka swa Iseraylri ku kadaengane, lri patwaladhaku kai ki kadaengane malra liniane akucu patala baalace; lri patwaladhaku liniane malra palribulu ki swa Yuda.

¹⁵ Ai, lu akucunga naku liniane, lri pelana naku kakalithi liniane, ku lrika asiwlrianeana lini mubalriu.

¹⁶ Kwi lalasu alaiyasi ka patengatengane ku kidremedreme tarumara ku takisuswane ki kawkawluli, si papia ki naganeli ka palralrawthu panianiake ka Tamatama kiketekete, mia ku tapiane lini ki kawkawluli papia ki nagane ki Baale kiketekete, lri dulru taelre ki kawkawluli panianiake, taelre kisupilri ku angiradhekanane.

¹⁷ Alaiyasi kai kilalra pasalaladha nakwane kwi lalasu, lri malraku liniane akucu patala baalace, si pakisaalru amudu liniane. Tamatamaku; ka amia kikai pelaela.”