Yerimia 11 - Ngudradreadrekadhane Ka Sisiu 魯凱語聖經

Yerimia si sakiketeketane

¹ Ku Tamatama amia kai nakwane,

² “Kilalra pudriadriingai kikai taiyane ki sakiketeketane, ala papia ki swa Yuda si swa Yerusalrime pelaela:

³ Kwaku ka Tamatama ka Twaumase ki swa Iseraylri amiaku kai: Ku aneane ku kai paluludu kai sakiketeketane, aneane kulri kipusu.

⁴ Sa patwaladhaku Izipiti, kudra ki kwadaladalai ka talabwane malra ki cucungulane lini ililuku kainganai yai, kiaketeketaku liniane. Ani pasalaladha tupapalra nakwane amiaku, si paluludu kai drekaseli. Peaelaelaku liniane, kwi lalasu alaiyasi pasalaladha tupapalra nakwane amaninga ku kawkawluli, lai lri a Twaumasaku liniane.

⁵ Lukamiyaiya kai, lri pangimiaku kudra kiketeketeli ki cucungulane lini, lai lri patarumaraku baai liniane kikai taikaiyane lini kai mwalwalwaludru ku mireke si valu ka malrange ka kadaengane.” La tubalreaku, “Unu, Tamatama.”

⁶ La pacungulu, ku Tamatama amiyanga kai nakwane, “Lri katwasesu salraelre dadavace sanaka cekele ki swa Yuda si cekele Yerusalrime, la papia ki laumawmase pelaela kikai sakiketeketane, kwi lalasu lani thingale ku taiyane, si pasalaladha ku takelretane kai ki sakiketeketane.

⁷ Twalai kwidra ki vai sa ililukaku ki cucungulane lini patwalai Izipiti, kainaku watelrai pakipapawlringau liniane ku apasalaladhane nakwane,

⁸ Ai kai lalasu kai kialalralalra, la kai tumanemane, kiaruthukulringa kamani ki kelrathanane ka ngilisianane ki kidremedreme lini. Ani pasalaladha kai sakiketeketane amiaku liniane, ai kwi lalasu kai mwabangalre. Lakamani, lri singikaiyaku kai ki sakiketeketane ku takelretane si pathavungu liniane.”

⁹ Ku Tamatama la iyanga kai nakwane, “Kai swa Yuda si swa Yerusalrime kiabububuli madrekadrekadrekase ku abaebalreane nakwane.

¹⁰ Kai lalasu la pasaalriwnga ku tapasalrivane ki cucungulane lini, kai kialalra pasalaladha ku vagali, matwase sukubu ki drumane ka latwaumase. Kai swa Iseraylri si swa Yuda mabebetethe patuelre ku kiketeketeli ki cucungulane lini.

¹¹ Lakamani, kwaku ka Tamatama paiyaku kai pakipapawlringau liniane: Lri pakamudaku liniane; kwi lalasu kai lri maka ubere. Lu papia nakwane kwi lalasu kitubi, kainaku lri kilalra.

¹² Lukamani kwidra, kai swa Yuda si swa Yerusalrime lri ngibangulu papia ki nasukusukubu lini ka latwaumase, si papia liniane kitubi. Ai kwini latwaumase lutumane kai lri maka dulru palribulu liniane pakidaili kai ki amatikurwane.

¹³ Ku twaumase ki swa Yuda mararaamau ki lacekele lini ku kalrane; kai swa Yerusalrime ku pasikai lini tutapatarumaramarane ki matikiarurubwane ka Baale mararaamau ki kadalranane ki cekele ku kalrane.

¹⁴ Yerimia, madha pasikainga liniane kitubi, madha papianga nakwane inulri. Kwi lalasu lu kipadradresenge ku amatikurwane la papia nakwane kitubi ku akiparalubane, lri mialriaku kai kilalra.”

¹⁵ Ku Tamatama amia kai, “Kai kathalraili ka laumawmase kudra miyaiyanga kai kadrau turamuru ku pasalrivane, yakaiyana ku manemane ku kindri kela kai ki daaneli? Lu kidremedreme kai lalasu sana ngikaketeketane, si patarumara ku waudriwdripi lri dulru madu kilragau ki amatikurwane amia? Lu kidremedreme kai lalasu lu piane kikai lri dulru madu kasulivaliivatenga si kiraragai amia?

¹⁶ Napaswadalepenga naku liniane ka twavasau ka laricingi ka mwalabece turamuru ku madru ka mathariri ka ulrive ka angatu, ai kaiasasanenga lri miaku ki lrikace lama patuelre ku vasauini, si celra ku ricingini.

¹⁷ “Kwaku ka Tamatama ka abebeelengenga ki sanaka kwapingi walredrekaku ki swa Iseraylri si swa Yuda, ai kikai lri arakaiyaku ku amatikurwane kukuludru liniane. Kwi lalasu paiya ku ngialisiane, ngidadawlu kai ki amatikurwane; kwi lalasu papia ki Baale patarumara ku sapatarumarane ku waudriwdripi, pakagirimucunga nakwane.”

Madrekadrekase ku apapacadhane ki Yerimia

¹⁸ Ku Tamatama peaelaela nakwane ku kibububuli ki badha tulisi nakwane.

¹⁹ Miaku ki masulrapele ka lrulai ka kiu ka kiabilibili pwa ki taculuculwane, ka kai wathingathingale ala ka kibububuli lini madrekadrekase. Kwi lalasu amia kai, “Sa ngiesadhaneana kikai angatu, pwa calrigi iniane. Bwala! Tapapacai iniane, lani kai kingulringawnga kai naganeini.”

²⁰ La inulriaku iya kai, “Tamatama ka abebeelengenga ki sanaka kwapingi, amanisu ku aparamaramaraamaunga ka tarasaibaibange; wadrelesu ku takidremedremane ki umawmase. Lri pikaiyaku ki alrimasu kai takitupasalrivananeli; padrelaili ku tapusakaiyanesu nakwane.”

²¹ Ku swa Anatute lri papacai nakwane, wakukuludru nakwane, si pakaicilri nakwane pacungulu pelaela ku vaga ki Tamatama, alaiyasi kainaku kilalra, kwi lalasu lri papacai nakwane.

²² Lakamani ku Tamatama ka abebeelengenga ki sanaka kwapingi amia kai, “Lri pathavungaku liniane! Ku yacengecenge lini lri pacai ikai ki takikaruburuburane, ku lavavalake lini lai lri kiarasilravane pacai ikai kadadalranane cekele.

²³ Wapilringa naku ku vai, lri pakamudaku ki swa Anatute. Lukamaninga kwidra, kadrwa ku umawmase ku lri abalu.”