Yerimia 10 - Ngudradreadrekadhane Ka Sisiu 魯凱語聖經

Wasukubu ki samiamiange si twakapatengatengane sukubu

¹ Swa Iseraylri, kunumi yai kilalra ku takawrivane numiane ki Tamatama.

² Amia kikai: Kunumi madha tupapapalra ku kakwakudhane ki maelane ka kuni. Kwi lalasu adravane ka kiavangavange ki tangimiane subelebelenge ku tamatisamaliane, kunumi madha ngialralrau liniane mukuludru.

³ Kwi lalasu ku sukusukubu lini kadrwa ku paluludane patwalai angatungatu ka pulebe lini ka angatu, laka tarathurade ku wapapacase.

⁴ La arakai ku kingi gingi pangiraeragelane, arakai ku sakedrekedre kedrekedre pakakecenge, ku kaika amukadrulane lini.

⁵ Kwi samiamiange lini mia ki sapawkukuludrane ka yakai ki mau taliliwru; kai wadulru kawriva, la kai dulru dadavace, lu kibulri ki umawmase wadadavace. Lakamani kunumi madha mukuludru! Kai lri dulru kabebetethe numiane, lai lri kai dulru paralubu numiane.

⁶ Tamatama, kadrwa ku umawmase ku lri dulru kiramau muswane; tengatenganesu ka matiasamali, ku saniange ka naganesu maadrau ku puku.

⁷ Talialalaisu ki sanaka kuni, aneane ku kai lri musakene mukuludru? Naika kiamusakenesu. Sanaka kuni ku ngiathingale si latalialalai kadrwa ku natangeeanga ku lri lribate muswane.

⁸ Kwi lalasu makulrungu ka kadrwa ku thingale makanaelre; kwi lalasu lri dulru tumane patwalai ki angatu ka samiamiange kibulru ku manemane?

⁹ Ku samiamiange lini ku sacabwane ku gingi patwalai Taresise, ku kingi patwalai Upaze, patuelre pia ki daikusange si taradarepe ki gingi; sialaimai ku salesese, ku thilalatadhane ku laimai, ka pia patuelre ki taradarepe.

¹⁰ Tamatama, kathanesu ka patengane ka Twaumase, ka palralrawthu panianiake ka Twaumase, palralrawthu ka talialalai. Sana kalisisu, kai kadaengane lri lingilingi; ikai ki lisianesu kai lri maka acegecege sanaka kuni.

¹¹ Kunumi ka kawkawluli, papia liniane pelaela, ku samiamiange kai wabekace belenge si lebe ka twaumase, kwini lasamiamiange lri tara kipakamudu, si lri twalai kawmasane kawlrau.

Sa drengedrengerane ki Twaumase ka senai

¹² Ku Tamatama arakai ku madrau ka puku bekace ki kadaengane, arakai ku thingalane cegecege kawmasane, la arakai ku lrigilane paipai subelebelenge.

¹³ Ku Twaumase sana drekase, ku acilai subelebelenge wasiasiange; wamalra ki ememe patwalai lebe putaluvaivai. La paledra ki lrikace pikai ki udale, ku valrigi la kasasevere twalai ki drawsuluini.

¹⁴ Kikai tangimiamiane pangiathathingale ki umawmase ka makulrungu ka kadrwa ku thingale; ku taradarepe ki kingi masulri kwidra ki piaini ku samiamiange, asi lwiyane kudra pia lini ku latwaumase kaika patengatengane, kadrwa ku niake.

¹⁵ Ku samiamiange kadrwa ku paluludane, kai mamamwa ki kakudhane ka matiaulrakai; Ku Tamatama lu kiecebe liniane, lri kamudu patuelre.

¹⁶ Ku Twaumase ki Yakubu kaika miyaiya kai ki lasamiamiange; wabekace sanaka maneemane, la pilri ki swa Iseraylri ngitatu kawkawluini. Ku naganeini yai Tamatama ka abebeelengenga ki sanaka kwapingi!

Paswala pelaela ku aacaicaliane

¹⁷ Kialringulu ka swa Yerusalrime, suragela kwi lawbubulu numi.

¹⁸ Ku Tamatama lri cilri numiane pakatwase kikai ki kadaengane. Lri drepete numiane pakababurau, kadrwa ku natangeeanga ku abalu. Ku Tamatama amianga kikai pelaela.

¹⁹ Ku swa Yerusalrime akwadrau tubi: Kai takadulane nai pakialringau turamuru, ai kikai sakwalrialri yai kai nai lri dulru kai kiadili.

²⁰ Ku balrawbau nai kiakabebetethe, ku saerecane ka calrisi mangetelenga patuelre. Ku lalalake nai matwasenga makanaelre; kadrwanga ku umawmase kulri cegecege ki balrawbau, laka kadrwanga ku umawmase kulri peela kelrai ku make.

²¹ La tubalreaku iya kai: Kwi tarasangililuku naiane makulrungu turamuru makanaelre; kwi lalasu kai kiasilape si kitubi ki Tamatama. Lakamani, ku kaika makatumane lini, ku laumawmase la katwasenga acaicali.

²² Kilalra! Salraelrenga kai nipasaravane kai lavaga! Talikai dradha yakai ku vaeva ka kuni ku malrithavuthavulu, ku kwapingini lri apatawlrakavane ki lacekele ki swa Yuda, si lri ataikaikaiyanenga ki latawpungu ubulane.

²³ Tamatama, wathingalaku kadrwa ku umawmase ku wadulru ngisasingikai ku angimianeini; laka kadrwa ku umawmase ku wadulru ngiraruthuku ku kadalranane ikai ki tapanianianiakaneini.

²⁴ Tamatama, ala paceepa si bulru naiane; madha ikaikai ki lisianesu si pakamudu naiane.

²⁵ Ku lisianesu gugwa pikai ki kai mwasakene mukuludru muswane ki lakuni, pikai ki kinawmasane ki kai paswadalepe muswane. Asi lwiyane kwi lalasu papacai ki kawkawlusu; kwi lalasu wamudu naiane, la atawlrakavanenga ku daane nai.