Yerimia 1 - Ngudradreadrekadhane Ka Sisiu 魯凱語聖經

¹ Kikai hungu yai lavaga ki Yerimia. Ku tama ki Yerimia Hilekia ka barakalai ikai cekele Anatute ka swakai ki Biniyamingi.

² Ku talialalai ki swa Yuda ka lalake ki Amune ka Yusia sa tara mangealenga si tulru ku tarathudane ki swa Yuda, ku Tamatama papia ki Yerimia kawriva;

³ sa icengecenge rathudu ki swa Yuda ku Yehuiakime ka lalake ki Yusia, ku Tamatama kawariivanga papia ki Yerimia. Twalainga kwini ku Tamatama kai watelrai papia iniane kawriva, pakeela ku tatara mangealane si vaeva ka caili si lrima ka dramare ku taatalialaladhane si rathudu ki swa Yuda ku Zidikia ka maelane ka lalake ki Yusia, sakamani kwidra ku yakai Yerusalrime ku laumawmase kiaravase pwa kavai Babilunia.

Ku Yerimia kiapilri si kidawlu

⁴ Ku Tamatama amia kai nakwane,

⁵ “Sa kainaku badhana ku niake muswane, wapilringa naaku muswane; sa kaisu kitulalakeana, pakamaningaaku muswane ku ayuginsiane ki sanaka kuni.”

⁶ La tubalreaku, “Abebeelengenga ka Tamatama! Vavalakeanaku turamuru; la kaengelraku.”

⁷ Ai ku Tamatama amia kai nakwane, “Madha ngitatu vavalake, mwa sikakathane kudra tasikawlaneli pamwa muswane kudra ki laumawmase, si pelaela liniane kudra drekaseli muswane patuelre kudra vaga.

⁸ Madha kakiwcu liniane; asi lwiyane tapalraku muswane, lri palakebaku muswane. Tamatamaku; ka amianga kikai pelaela!”

⁹ Ku Tamatama ala sege ku alrima si sulrape ki ngudwili, si iya kai nakwane, “Drela! Wabaainga naku muswane ku lrika aiyanesu ku vaga.

¹⁰ Lri baadhaku ku puku muswane kaikameane; lri papiasu ki sanaka kuni sanaka umawmase pia ku awngane ku akucane, ku aburukane, ku akabebetethane, ku abalreane, ku atupelane tudaane, si apacegecegane.”

Drusa ka maburusi

¹¹ Ku Tamatama kiavaga nakwane, “Yerimia, wadrelesu ku manemane?” La tubalreaku, “Vaeva ka ricingi ki alumundu ka angatu.”

¹² Ku Tamatama la iya kai, “Patengane! Takipapawlringaavanaku, ku lrika angimiane kai vagali.”

¹³ Ku Tamatama la kivaaganga nakwane, “Manemaneana ku drelesu?” La tubalreaku, “Wadrelaku ikai tali dradha yakai ku vaeva ku palungu, ku ngiaburaburai, si papiapia talikai kai kainganai.”

¹⁴ La iya kai nakwane, “Lri ikai ku amatikurwane kulri twalai tali dradha kainganai, lri lrenepe kai ki yakai kaika laumawmase.

¹⁵ Asi lwiyane lri sarubwaku ki swa tali dradha sanaka kuni; ku talialalai lini lri ngithalringulu ikai taelelebane ki cekele si kepale Yerusalrime, si swa Yuda sanaka ceekele pacegecege ku puku ki sihu lini.

¹⁶ Lri pathavungaku ki kawkawluli ku tapasalrivane lini patuelre; kwi lalasu matwase si cilringa nakwane, la patarumaramara baai ki drumane ka twaumase, la sukubu ku arakai lini ku alrima lini tusamiamiange.

¹⁷ Yerimia, ngipapadulrua, la pelaela liniane patuelre ku drekaseli muswane. Madha kakiwcu liniane; amani lu pakakiwcaku muswane ikai cucubungu liniane.

^18-19 Yerimia, kicacaligira kilalra! Kai swa Yuda palraelre si talialalai, ku tabebelenge, ku barakalai, si mapapangale lri kikaruburu muswane makanaelre. Ai kaikameane lri patarumaraku baai muswane ku puku ku akiecebanesu liniane; lri miasu ki raedre ki cekele ka kepale, ki adreme ka ulrudru, ki lriwlu ka balingibingi ku kecenganane. Kwi lalasu kai lri dulru pamalebe muswane; asi lwiyane yakaiyaku tapalra muswane, lri palakebaku muswane. Tamatamaku; ka amianga kikai pelaela.”