Yakubu 5 - Ngudradreadrekadhane Ka Sisiu 魯凱語聖經

Pakiapapawlringau ki sapaiswane

¹ Lakamani, kunumi ka sapaiswane, kilalra kai aiyaneli: Lri tubi numi karaleale pasikai kwidra ki lri kelanga ka sapapacai!

² Ku tacekecekelane numi lri kawlrawnga, ku laimai lai lri kikane ki lubalubai.

³ Ku kingi si gingi numi lri kadilangenga; kai dilange lrika sarakaiyane kukusu numiane, lai lri mia ki apwi thamukulu pakamudu ki kinawmasane numi. Ikai kai ki lrika alikaiyane kawmasane, kathane ku arubwane pudringai ku tacekecekelane ku thingale numi.

⁴ Ngwaelre numi lrilrigili malra kwini ki yakai ki umawma kawaungu pasikai numiane, la kivala numi ku takaungane lini ku paisu, kwini lalasu wakukusu numiane! Ku takaralealane ki la kiataletaleke wadarurunga ki calringa ki Tamatama ka abebeelengenga ki sanaka kwapingi.

⁵ Yakai numi kai kawmasane ngulwalwalwadhane ki peravane, la ngilalapulapu numi ngipapakaricuru, la ukalavalava kudra taculuculwane ka vai.

⁶ Kunumi twapasalrivane numi kudra kadrwa ku pasalriu, si papacai liniane; kwini lalasu la kai kiecebe numiane.

Sakiadiadili si inulri

⁷ Lakamani, laretesane, kunumi kiadila, pakela ku akelane ngusela ki Tamatama. Drela, kai tarakawaungu kiaadili turamuru mukalava ku taleke ki umawma, la kiaadili sidrama mukalava ku udale ki kalarigarigane si kalalidrarane.

⁸ Kunumi la mialria tara kiaadili. Kunumi tara pikaiya ku makeecenge ku sasiadradrama, asi lwiyane ku akelane ngusela ki Tamatama lri padaalrunga si kela.

⁹ Laretesane, madha makwiyaiyaiya, amani lu saibange numiane ku Twaumase. Ku amani ka lri saibange ka Tamatama lri padaalrunga si kela, yakainga lrawlrawdru.

¹⁰ Laretesane, ngulringava kudra pangwakai ku nagane ki Tamatama si kawriva ka layuginsia; twalralrava ku takwalriane si takiadilane lini.

¹¹ Asi lwiyane kwi lalasu maka kiaadili patulrepenge, lu kidremedreme nai kai lalasu yakai ku akaesadhane. Kialalranga numi ku takiadilane ki Yubu, la thingale numi sakabilrilanenga ku Tamatama ku tapangimiane sirapale iniane, asi lwiyane ku Tamatama swaete ku kalithane si sakialibake.

¹² Laretesaneli, ku makuciacingalrenga yai; madha kiketekete. Madha papiapia belenge, kai lebe, si sanaka maneemane kiketekete. Sanaka unu, unu iya; sanaka ini, ini iya. Lukamiyaiya kai, lri kai numi kisaibange ki Twaumase.

¹³ Ikai numiane yakai ku kiapadradresedresenge ki akwalriane? Kwini lasu nai inulri; yakai ku kiarararagai ku umawmase? Nai senai drengedrengere;

¹⁴ Ikai numiane yakai ku macaeme? Kwini lasu nai dawlu ki ciwru ki swa kiwkai si inulri iniane, la pangukai ku nagane ki Tamatama si padelreme ku lawlau iniane.

¹⁵ Kikai inulri alaiyasi ka ngwakai ki salrwane, lri dulru pawdringai ki macaeme; ku Tamatama lri dulru pasiwlriwlriane kathariri ku kinawmasaneini; kai macaeme alaiyasi pasalriu, lai lri kipaacepe.

¹⁶ Lakamani, kunumi masubwabwarana ku pasalrivane numi, si mapasikaikai inulri, lanu kipawdringai. Ku inulri ki madringelrese ka umawmase maadrau turamuru ku angimiane ku puku.

¹⁷ Ku Ilria mia mitane ka umawmase, kwi lasu twakapatengatengane inulri, kitubi ki Twaumase ku kaika apaudalane, ala ka patengane taratulru ka caili si apararamau kai udale.

¹⁸ Sapeelanga inulri kwini lasu, ala udale twalai subelebelenge, kai kadaengane ala cebenga ku lataleke.

¹⁹ Laretesaneli, ikai numiane alaiyasi ikai ku amuli si kidaylinga ki patengane ka sabulrwane, la ikai ku waarake iniane pasiwlriwlri,

²⁰ Kunumi yai thingala; kwini pasiaulriwlri ki pasalrisalriu si amulimuli ka umawmase, wamalra palribulu kwini ki abake ki pasalrisalriu ka umawmase patwalai ki wapacai palribulu, ku la makaalra ku pasalrivane lai dulru kipaacepe.