Yakubu 4 - Ngudradreadrekadhane Ka Sisiu 魯凱語聖經

Madha sitalragilragi ki kawmasane

¹ Kwini maulrulrulrudru numi si karivurivu twalai inu? Twalai adringi numiane kwini makakaruburuburu ka gathimi ki kinawmasane kainganai!

² Lri ruthuku numi lri malra numi, lu kai numi maka malra, la papacai numi; la pathalra numi si karau, lu kai numi maka malra, la rivu numi. Ku kaika maka malra numi ku apimalra numi, amani sa kai numi papia ki Twaumase kitubi.

³ Lu kitubi numi la kai numi maka tarumara, amani sa kai pacengecenge ku tapapiane ki kidremedreme numi; ku kitubi numi apasawlrane ngukai ki peravane lakathane.

⁴ Kunumi ka kai pangiamia kai masalru ka laumawmase! Bekace numi kai thiingale ku twatalragi ki kawmasane ala ka amani ku kiatubadha ki Twaumase? Sanaka twatalragi ki yakawmasane lri kamani ku kiatubadha ki Twaumase!

⁵ Kai Sisiu amia kai, “Ku Twaumase akuli turamuru kudra baaini pikai adringi mitane.” Kwini vaga kadrwa ku pacugane amia numi?

⁶ Ai, ku baai ki Twaumase ku migemi sapupukwane, mararaamau ku taiyane kai ki Sisiu, “Ku Twaumase kiaecebe ki ngiakalrilrigu ka umawmase, la baai ku migemi ki ngiatatualebe ka umawmase.”

⁷ Lakamani, kunumi pasalaladha ki Twaumase. La kiecebe ki Akema, ku Akema lri ubere.

⁸ Kidetha ki Twaumase, ku Twaumase lri kidethe numiane. Kunumi ka yakai ku pasalrivane ka umawmase, bula kwi alrima numi; ngiakathaithariri ka umawmase! Bula ki kidremedreme numi!

⁹ Kunumi adirivana, kiangeange, tubia; malra kwini awlrakadhane pakabalrithi tu atubitubiane, malra kwini akiragadhane paakabalrithi tu adirivanane.

¹⁰ Icucubunga ki Tamatama ngitatualebe, lani parwa belenge numiane.

Madha raeratenge

¹¹ Laretesane, madha matulililisi. Ku twalilisi ki retesane amani ku twalilisi ki hulrice. Alaiyasi tulilisi numi ki hulrice, kai numi ka pasalaladha ki hulrice, amaninga kudra twalilisi iniane.

¹² Kathaane ku Twaumase ka wacegecege ki hulrice, ka tarasaibaibange; kathane ku lri dulru palribulu, lri dulru pakamudu. Aneanesu, ka wathuru raeratenge ki pasiagiagisisu!

Madha ngilralrigulrigu

¹³ Yakai ku umawmase ku amia kai, “Kaikameane lwiya, tamwa kwini cekele, ikai kwini taracaili, si siwbawbai la kipaisu ngukaalra.” Ai, kilalra nau kawriva.

¹⁴ Adravane lwiya kai numi wathingale lu lri panianianiiakeana numi! Kunumi mia numi ki sivaale ka kulrulrungu, padaalru ku taadrelanane si la kawlrau.

¹⁵ Kunumi nai iya numi kai, “Alaiyasi palraingi ku Tamatama, lri dulruta panianiake, si pia kikai, pia kavai awngane.”

¹⁶ Ai, ngikalrilrigwane numi si ngitatwadrau turamuru; ku miyaiya kaika ngiakalrilrigu kaika pacengecenge.

¹⁷ Lakamani, alaiyasi ikai ku umawmase la thingale ku naika apiane ku mathariri ku awngane la kai katwase pia, amani ku pasalriu.