Yakubu 3 - Ngudradreadrekadhane Ka Sisiu 魯凱語聖經

Waruthuku ki lridame ini

¹ Laretesaneli! Nai atarabulrubulru makanaelre madha iyaiya, asi lwiyane wathingale numi kai tarabulrubulru lrika silrialribate kipangicaeme ki drumane ka umawmase ku akisaibanganeini.

² Maduaita mulibake pasalriu; kudra kadrwa ku tapasalrivane ikai ki vaga amani ku kiatulrepenge ka umawmase; kwini lasu lri dulru ngiraruthuku patuelre.

³ Lu malrata ku sacucuane ki rigi si pwa ki ngudwini, ku lrika apasalaladhaneini, lri dulru velevele iniane si mwa ku apapianeta.

⁴ Ani tadrele ki varukuru, kai varukuru adravane ka maadrau, lu kivalrigi ki maadrau ka valrigi, arakai ku tikiyane ka kadrau ki varukuru si velevele ku apapinwane, la dulru singikai ku takidremedremane ki taramarasikaikai ki kadrau ki varukuru, la mailuku ki varukuru papia ku lrika amwane.

⁵ Laka thadaalrane, kai lridame adravane ka tikiane, wadulru kawriva ku maadrau ka vaga. Ala kidremedrema; ku tikiyane ka apwi kaika wadulru lama ki sakawbubulanane?

⁶ Kai lridame mararaamau ki apwi ikai ki kinawmasaneta yai amani ku taikaiyane ki ngialisiane, wadulru kudrulru ki kinawmasane palraelre; pangwakai ki apwi ki swadriadringi si lama patuelre ki kadalranane ki tapanianianiakaneta.

⁷ Kai umawmase wadulru ruthuku ki labulabulai, ki langiapapapalai, ka laadhadhame, lawagulagulai, si layaaciacilai; ku patengatengane, kwini lasu waruthukunga ki sanaka waudriwdripi.

⁸ Ai, kai umawmase kadrwana ku wadulru ruthuku ki lridame; kaika amakaruthuruthukane ka ngialisiane, swaete ku sapapacai ka duku.

⁹ Arakaita ku lridame kiaseasene ki Tamatamata, ki Tamaita ka yabelenge, la arakaita ku lridame pusu kudra ngipapangialrauini ka Twaumase bekace ka umawmase.

¹⁰ Ku sakiaseasenane si sapuswane tara twalai ki vaeva ka ngudui kainganai! Laretesane, kikai kaika pacengecenge!

¹¹ Ku tara twalai ki vaeva ka tacebeane lri maka dulru berai ku malimeeme si mapaalili ku taidrusane ka acilai?

¹² Laretesane, ku icizike ka angatu kai lri dulru pumadru ku ulrive; ku budu kai lri dulru pumadru ku icizike; ku mangadha ku tacebeane ki acilai lai kai maka mwaludru ku malimeeme ku acilai.

Twalai belenge ka lrigilane

¹³ Ikai numiane yakai ku malrigili ku umawmase? Alaiyasi ikai, kwini lasu lri arakai ku ngitatwalebeane si lrigilane ki tharirane ki tangivelevelane paathingalane ka yakai ku tharirane ki tapanianianiakaneini.

¹⁴ Kudra yakai ki kidremedreme numi ku pathalrane, lisiane, si ngipapakaesadhane, kunumi la madha ngitatwadrau, madha draedrangelre si kiecebe ki patengatengane ka sabulrwane.

¹⁵ Kudra lrigilane iya numi kaika twalai belenge kainganai, swa kawmasanane, ka gathimi ki ngwakinawmasane, ka twalai ki Akema.

¹⁶ Sanaka taikaiyane ki pathalrane si ngipapakaesadhane, yakai ku rivwane kalrithavulu si sanaka langialisiyane.

¹⁷ Ai, ku twalai belenge kainganai ku lrigilane yakai ku taathingalanane ukalrivili; ku aswalaalanga yai bulane, ku mwasakadrusa yai rathudane, ngitatwalebeane, sulrapelane, swaete ku thalradhane, wadulru pumadru ku makaalra ku mathariri ka madru, kadrwa ku ngipapakaesadhane, kadrwa ku nikadraedrangelrane.

¹⁸ Ku madru ki dringelresane patuelre twalai ki wasabulu ku rathudane ka umawmase, ku tacebeane twalai ki pasiakai ki rathudane si kisamula sabulu ku sapaivai.