Yakubu 2 - Ngudradreadrekadhane Ka Sisiu 魯凱語聖經

Maelaela ki apakaelaelane

¹ Laretesaneli, kunumi amaninga numi kudra sinzia ki lrigu ki Tamatamata ka Yesu Kirisitu, la madha singikaikai pabelenge ki umawmase, si apakaelaelane pasudalru ki umawmase.

² Alaiyasi ana ikai ku tangea ku sapaiswane ka sitatara ku kingi, silaimaimai ku mathariri ka laimai, si kainganai mwa ki rarubwane numi ka swa Yuda, la mialri ikai ku tangea ku matiakukuru ku silaimaimai ku puripurici si kainganai;

³ Alaiyasi pawkalrivilisu tuinwane kwini ki sialaimai ku mathaariri ku laimai, la iyasu kai iniane, “Bwala mubelenga mutaetalane!” La papiasu kwini ki matiakuru iya kai, “Acegecega ikai thili!” Ku amiasu kai, “Nenea ikai ki thili ki drapadrapaleli.”

⁴ Lu piasu kwini amaningasu ku apakaelaela, ka waranausu apakakaela.

⁵ Kilibakeli ka laretesane, kunumi kilalra; ku Twaumase wapilri ki matiakukuru ikawmasane ku lrika akaesadhane ngulwadhane ikai ki salrwane lini, la pawcungulu liniane ku palraingingaini baai ki madalame iniane ku bavane ka kuni.

⁶ La tusinalrelreemelringa numi ki matiakukuru ka umawmase! Ku patengatengane, ku twasinalreme dredrepete numiane, si malra numiane bilibili pukunkwane, amani kikai lasapaiswane ka laumawmase!

⁷ Ku twalililisi ku tarumaranga numi ku niwsakenane ka nagane, amani kwini lalasu.

⁸ Alaiyasi pasalaladha numi ku tapacasane ki Sisiu iya kai, “Kilibaka ki umawmase mia lu ngikakilibakesu.” Ka kakudhane ki bavane ka cekele, ngiamianga pacengecenge.

⁹ Ai, alaiyasi singikaita ku nipangubabebelengane ki umawmase pasudalru, amani ku pasalriu; ku hulrice lri pasudalepe ka pasalriu numi.

¹⁰ Ku aneanenga ku wabaebalre ki hulrice, ku taingeane wabaebalrenga ki hulrice patuelre.

¹¹ Asi lwiyane kwini wadrekase amia kai, “Madha sudringadringai,” la iya kai, “Madha papacai ki umawmase.” Adravane kaisu pasudringai, la papaacaisu ki umawmase wabaebalrenga ki hulrice.

¹² Kunumi ka lri kisaibange ki amani ku pangialralraingi ka padradrekase, kwini vaga si tangivelevelane numi pamamwa ki nikelretane ka asingikaiyane.

¹³ Asi lwiyane ku Twaumase lu saibaibange, kai lri arakai ku thalradhane si kathalrai kudra ki kai mathaalrai ki umawmase; kai thalradhane yai sabebelenge ki asaibangane.

Salrwane si Tangivelevelane

¹⁴ Laretesaneli! Alaiyasi ikai ku umawmase ku yakai ku salrwaneli amia, la kai maka arakai ku kakwakudhane ini padreelane, manemane ku akaesadhane? Kwini salrwane lri dulru palribulu iniane?

¹⁵ Ikai numiane lu ikai ku laretesane ku kadrwa ku asilaimadhane, kadrwa ku akaneane,

¹⁶ La iyalringa numi kai iniane, “Kasulivalivaata! Kasulivalivaata! Si la kaculu ku tasilaimadhane, si la kabucubucuku!” La kai numi baai ku urikai lini, manemane ku paluludane?

¹⁷ Thadaalrane, ku salrwane luka kadrwa ku tangivelevelane amani ku wapacai.

¹⁸ Ai, lri ikai ku amia kai, “Kai umawmase kai yakai ku salrwane; kavai umawmase yakai ku tangivelevelane.” Lri tubalreaku iya kai, “Ala padreelaili kudra kadrwa ku tangivelevelane ka salrwane, la nau arakai kai tangivelevelane padreele muswane kai salrwaneli.”

¹⁹ Masalrusu ka vaeva ku Twaumase, mathariri! Ai kai aidridringane maiyalri kasalru si ukulukuludru iniane.

²⁰ Kunumi ka lamakulrungu ka umawmase, kunumi lri thingale numi “Ku kadrwa ku tangivelevelane ku salrwane yai ka kadrwa ku paluludane”?

²¹ Ku cucungulaneta ka Aberahame pangiatumane ku tamakakadalrwaneini ki Twaumase? Amani ku tapianeini baai patarumara ki lalakeini ka Isake ikai ki tapatarumaramarane.

²² Lu dreelane, kai salrwane si tangivelevelane mapaparalubu tarudradrusa, ku salrwane ini pangwakai ki tangivelevelane ala padaruru ki kiatulrepenge.

²³ Kai Sisiu amia kai, “Ku Aberahame masalru ki Twaumase, ngwalai ki salrwaneini, ku Twaumase la tumadringelrese iniane.” Kikai vaga ngiamianga; kwi lasu kiatutalraginga ki Twaumase.

²⁴ Lakamani, kai umawmase ku akikadalrwane ki Twaumase pangwakai ki tangivelevelane, kaika pangwakai ki salrwane sikakathane.

²⁵ Ku tangimiane ki pairairange ka Rahabe mararamau. Kwi alisu ku takitumadringelresaneini ngwakai ki tangivelevelane; kwini alisu tarwamara pasudalru ki nisikawlane ka swa Yuda, la paralubu liniane pangukai ki maelane ka kadalranane pawbere.

²⁶ Lakamani, mararaamau ki kinawmasane luka kadrwa ku niake yai wapacai, ku salrwane luka kadrwa ku tangivelevelane mialri ka wapacai.