Yakubu 1 - Ngudradreadrekadhane Ka Sisiu 魯凱語聖經

¹ Kwaku ka Yakubu ka sasiakawlu ki Twaumase si Tamatama ka Yesu Kirisitu; aii amiamiaku numiane ka kawkawlu ki Twaumase ka yakai kidruanga kai kawmasane.

Salrwane si Lrigilane

² Laretesane, lu kipadradresenge numi ku makaelaela ku akikituthiathingalane, naika akiragadhane madu,

³ asi lwiyane wathingaleta kwini salrwane numi ka nikilrialringavanenga si cebe ku sakiadiadili.

⁴ Kunumi kiadila patulrepenge lanu maka dulru daruru ki kiatulrepenge, si kakadrwa ku takapwalane.

⁵ Ikai numiane alaiyasi ikai ku kaina kiatulrepenge ku lrigilane, nai papia numi ki Twaumase kitubi, ku Twaumase lri baai ku lrigilane numiane, asi lwiyane ku Twaumase kiararagai ku apakakalrane ku lrigilane baai ki sanaka umawmase.

⁶ Ai, arakaiya ku salrwane numi kitubi, madha pikaikai ku lrikilrikane ku natikiyanenga; ku malrilriki ku umawmase mararaamau ki bikabiki ki laveke, ka kiavelevele ki valrigi, si mababikabiki.

^7-8 Ku miyaiya kai ku umawmase sadrwadrusa ku kidremedreme, si kai maka kapapedrenge, madha sidramadrama ku apatwaladhane ki Tamatama malra ku manemane.

Matiakukuru si Maesaesaesai

⁹ Kudra matiakukuru ku lasinzia, ngwaladha ku takipabelengane ki Twaumase si kiragai;

¹⁰ ku maesaesaesai ku umawmase mialria kiraragadha ku taparwalebeane muswane ki Twaumase, ku maesaesaesai ku umawmase lri mararamau ki yaubulane ka bengelrai mururu.

¹¹ Sana ngibwale ku vai, la kusasevere ki culwane, ku angatu, ku ubulu, la karudame la kalraici si mururu ku bengelrai, ku matidadalamane patuelre la kawlrawnga. Ku maesaesaesai ku umawmase lu karacacaacange ki la awngane, lrika miyaiya ki kai suludru si kawlrau.

Kiakilrialringau si Kiakituthiathingale

¹² Ku kiakituthiathingale si maka kiaadili patulrepenge ku umawmase lri kaesai; asi lwiyane lu ngilribate ku takikilrialringavane, kwini lasu lri tarumara ku nipalrainganenga ki Twaumase ku civare ki niake.

¹³ Ku umawmase lu ngilribate kai ki miyaiya kai ka kiakituthiathingale, “Twaumase ka kiatuthiathingale nakwane”; madha iyaiya, asi lwiyane ku Twaumase kai lri kikituthiathingale ki ngialisiane, lai kai kituthiathingale ki umawmase.

¹⁴ Lu ikai ku tangea ku kiakituthiathingale, kiabilibili ki gathimi ki kinawmasaneini.

¹⁵ Lukabilrilanenga maru tawbaliringa ku gathimi ki kinawmasane, la tulalake ku pasalrivane, lu kaadraunga ku pasalrivane, la tulalake ku apacadhane.

¹⁶ Kadalameli ka laretesane, madha kilrilrigili!

¹⁷ Patuelre kai mathariri kai lamanemane si makaelaela ka kiatulrepenge ka nibaadhane ka akaesadhane twalai subelebelenge patuelre, ka twalai ki Tama ka yabelenge; amani ka wabekace sanaka leedra. Ku Twaumase kai lri akabalrithi, la kakadrwa ku tangibangulane ngivelevele ka alalingu.

¹⁸ Ku Twaumase singiakai ku takidremedremaneini, la pangukai ki patengane ka sabulrwane ka vaga baai ku niake mitane, ala dulruta ka sabebeelengenga ikai ki bekaceini sanaka maneemane.

Kialalra si Pangiamia

¹⁹ Kadalameli ka laretesane, kunumi ka tangea tara kicacaligira kilalra ku taiyane ki palrapalra, madha kawpungu ku akawrivane, la madha kaduai kalisi.

²⁰ Kai lisiane ki umawmase kai lri maka dulru pangimia ku apiane ki dringelresane ki Twaumase.

²¹ Lakamani, kunumi katwasa kalrabuthu patuelre kai ki kai mathariri ka twalrawnga numi si ngilisiane ka tangivelevelane, arakaiya ku pasalaladhane ku kidremedreme si tarumara ku lredreke ki Twaumase ku sapaivai ka vaga pikai ki kidremedreme numi. Amani kudra wadulru palribulu numiane ka vaga.

²² Ai, kunumi madha ngikadraedraedrangelre, si sana kilalraku ku vaga makakeelrete iya; ngiabaalrelringa kamani, kunumi tara pangimia ki kai vaga.

²³ Kudra kialalra ku vaga si la kai katwase pangimia, mararaamau kudra tangea ka umawmase ku wacucubungu ki kailungane, la drele ki lringauini,

²⁴ sa maka drelenga pudriadringai, la katwase, si makakai karimuru ku tangimiamianeini.

²⁵ Ai, kudra maka pwadriadringai drele kudra ki kiatulrepenge si lri dulru pangilralraingi ki umawmase ka kakudhane si pacuungulu pangimia ku umawmase, kaika kialalra si la karimuru, patengatengane ka pangiamia ki vaga ka umawmase, ku miyaiya kai ku umawmase ikai ki tapiane ini ku awngane lri tara kisubulrubulru ki Twaumase.

²⁶ Aneane ku patengatengane ku takisuswaneli amiamia, la kai maka ruthuku ki lridameini, amani ku ngiakadraedraedrangelre; ku takisamulaneini kisusu kadrwa ku paluludane.

²⁷ Ikai ki tadrelane ki Tama ka Twaumase, kudra alriviilrivi ka kadrwa ku pwalane ku takisuswane ala amani kudra: Siarapale ki yakai ki kwalrialrialri ka lapakulrulrulu si walibakane ka ababai si ngiapapakilibake ku kaika akipangilisiananeini ki kawmasane.