Wabulru 9 - Ngudradreadrekadhane Ka Sisiu 魯凱語聖經

¹ Kainaku watelrai kidremedreme kinkiu kikai patuelre, la drelaku ku kakwakudhane ki madringelrese si ngiathingale ka umawmase kiamarasikaikaai ki Twaumase patuelre; ka sakialibake ka lisiane, kadrwa ku umawmase ku wathingale.

² Patuelre yai ungawngau, asi lwiyane sanaka umawmase maramaraamau ku lrika angimiane: Ku madringelrese ka umawmase ku manganga ka umawmase, mathariri ka umawmase malisi ka umawmase, kiasamula ku takisuswane ku kai kiasamula ku takisuswane, patarwamara si kai patarwamara, maramaraamau patuelre. Ku takipadradresengane ki mathariri ka umawmase kiau lu lrika mathaithariri ki pasalrisalriu ka umawmase; ku kiaketekete ku umawmase alau lri kaika mathaithariri ki kai kiaketekete ka umawmase.

³ Kulri ka angimiane sanaka umawmasenga maramaraamau; kikai yai mialri ku tangimiane ikai tailebe ki vai ka kaika niaparamaramavane. Ku tapanianianiakane ki umawmase ku vai, ku kidremedreme swaete ku ngilisianane si ngiakalrilrigu ngikarakacanane, luka bilrilinga la paacainga patuelre.

⁴ Ai kudra panianianiakeana ikai ki panianianiake ki umawmase, yakaiyana ku sasiadradrama; ku vaeva ka panianianiake ka tawpungu mathaithariri ki vaeva ka wapacainga ka raiyungu.

⁵ Ku panianianiake ka umawmase wathingale kalri pacai; ku wapacainga ka umawmase kadrwa ku thingale sanaka manemane. Kwi lalasu kai lri maka malranga ku akipakalrevane; kwi lalasu kiakarimurunga.

⁶ Ku dalamane, lisiane, si pathalrane lini lri makitu tupapalranga liniane kawlrau. Ku tangimiane ikai tailebe ki vai lrika palralrauthunga kai ikainga ku drulru lini.

⁷ Lumwa, kirararagadha katwase kane; la kirararagai katwase ungungulu ku bava; asi lwiyane ku Twaumase tarwamaranga ku takaunganesu.

⁸ Silaimadha ku mabula kademele ku laimai, la padelreme ku sangwalreeme ku lawlau.

⁹ Pakaelrea ikai ki ungawngau ki tapanianianiakanesu, ka amani kudra baai ki Twaumase muswane ikai kai kawmasane ku caili, la tadrusa ki kadalamesu ka taelrelresu kisupisupilri ku akiragadhane ku tapanianiakane, asi lwiyane kikai yai amani ku naika amalraanesu ka drulru ngukai ki takwalrianesu ikai tailebe ki vai.

¹⁰ Adravane tumanesu, kisamula pia; asi lwiyane ka swadriadringi kadrwa ku awngane, kadrwa ku akikakane, kadrwa ku thingalane, kadrwa ku lrigilane, kudra lrika amwanesu, ala amani kikai.

¹¹ La drelenga naku ku taingeane: Ikai kai kawmasane, ku taralailai ka umawmase alau lri kai kipakalreva, ku magagarange ka umawmase alau lri kai maka akaci lu kikaruburu, ku ngiathingale ka umawmase alau lri kai ikai ku akaneane, ku malrilrigili ka umawmase alau lri kai kaesai, ku magagarange twatumane ka umawmase alau lri kai maka abelenge. Kulri ka angimiane amani ku wakelrete patuelre.

¹² Kai umawmase kai wathingale ku lrika angimianeini,. Mararaamau ki kange ka kia puaradhane, ki adhadhame ka mwa amiane, kaita pwalringalringau ala pangitutuluku mulrabukuta ikai ki amulisiane.

Kai lrigilane akaci ki kulrungane

¹³ Wadrelenga naku kai kawmasane ku taingeane ka la patharukai ki lrigilane, lu kidremedremaku maadrau ku pacugane.

¹⁴ Yakai ku taingeane ku tikiyane ka cekele ku yakai kwini ku laumawmase kai tathainu la kikaruburu ki talialalai ka magarange ka kuni; kwi lasu walringulu kwini ki cekele, padulrudulru ku aburukane ki cekele.

¹⁵ Ikai kwini ki cekele yakai ku tangeea ka yakaikai kwini, kwi lasu matiakukuru, ai malrigili, lri dulru palribulu kwini ki cekele. Ai, kadrwa ku wathingale iniane.

¹⁶ Kainaku watelrai iya kai, ku lrigilane akaci ki ara adreme, ai ku lrigilane ki matiakukuru ka umawmase kiasidrekase, kadrwa ku umawmase ku kialalra ku vagaini.

¹⁷ Ku patengatengane, ku kialalra ku niaku tikiyane kawriva ki malrigili ka umawmase, walribate kudra ki kialalra ki amani ka warathudu lu ikai cucubungu ki makulrungu ka laumawmase ku taakwadravane kawriva.

¹⁸ Kai lrigilane madradrau ku tapiane ki niaraadremane; ai ku tangea ka pasalrisalriu ka umawmase wadulru pangilisiane ki makalra ka mathariri ka awngane.