Wabulru 8 - Ngudradreadrekadhane Ka Sisiu 魯凱語聖經

¹ Kathaane ku ngiathingale ka umawmase ku wathingale ku pacugane sanaka maneemane. Ku lrigilane paledra ki lringauini, la kawlrau ku thekelraneini.

Pasalaladha ki talialalai

² Paluluda ku drekase ki talialalai; madha caapange papia ki Twaumase kiketekete.

³ Ku talialalai lri dulru ngisasingikaai pia ku nau pia iyaini, mathaithaariringa lu kidailisu iniane; madha asusuru ikai ki matiaukuludru ki taetalane.

⁴ Ku vaga ki talialalai yakai ku puku, kadrwa ku umawmase kulri dulru maka kiecebe iniane.

⁵ Sana pasalaladhane ku drekaseini, lri tara kipalaakebe. Ku ngiathingale ka umawmase lu twatumane wathingale ku swadalepe ku zikange si apangimiane.

⁶ Adravane tumane ku la atumanane yakaai ku tamamamwane ki zikange si apangimiane, ai ku tathingalane ki umawmase yakai ku taalikaiyane.

⁷ Kadrwa ku umawmase ku wathingale ku lrika angimiane lukabibilrili, laka kadrwa ku umawmase kulri dulru pelaela iniane.

⁸ Kadrwa ku umawmase ku lri kai pacai, laka kadrwa ku umawmase kulri ngisasingikai ku apacadhaneini; kikai yai kaika adulrwane ki umawmase mubere ka amakakaruburane; adravane ngisasingikaai ngilralraingi paramuru ku ngangane lri kai dulru mubere.

Manganga ka umawmase si mwalecege ka umawmase

⁹ Kiararaaketaku dredredrele ku tangimiane kai kawmasane yai, wadrelenga naku patuelre: Yakai ku laumawmase ku yakai ku puku, ku ladrumane ku umawmase la ikai tailebe liniane kwalrialrialri.

¹⁰ Wadrelaku ki manganga ka umawmase lu pacainga si kidralreke. Kwi lalasu sa italuvaivaiyana wamwamwa ki Alrivilrivi ka taikaikaiyane; kialalraku yakai ku umawmase ku wadrengedrengere liniane ikai ki takangangangane lini, kikai yai mialri ka ungawngau.

¹¹ Kai kawmasane kai umawmase ani kagarangenga pasalriu? Asi lwiyane amani sa kai makakaai kipathavungu kai pasalrivane.

¹² Adravane kai umawmase lu pasalriu kingiidai, kiasupisupilriana kalragi ku niake. Ai wathingalaku, Ku mwasakene mukuludru ki Twaumase ku umawmase masulivalivate sanaka manemane;

¹³ Ku manganga ka umawmase kadrwa ku akaesadhane ku amatikaiyane madu. Ku niake lini mia ki alalingu; kwi lalasu lri pacai, asi lwiyane kwi lalasu kai mwasakene mukuludru ki Twaumase.

¹⁴ Ai, kai kawmasane yakaiyana ku taingeane ka ungawngau: Thaininunga, kudra takipathavungane ki madringelrese ka umawmase ka naika akipathavungane ki manganga ka umawmase; ku manganga ka umawmase ngiabaalrelringa malra ku pakalreva ku naika amalrane ki madringelrese ka umawmase. Amiaku kai, kikai yai mialri ka ungawngau.

¹⁵ Lakamani, lu kidremedremaku kai umawmase nai kirararagai; asi lwiyane ikai tailebe ki vai ku lrika akiraragadhananeini patuelre kai lri lribate ki akaneane, aungulane, si kisupisupilri. Kikai yai ikai ki patarumara ki Twaumase ki umawmase ku edreekane ka niake ka nikwalriane ala malra ka tikiyane ka akisupilrane.

¹⁶ Sa kisilapaku ki lrigilane, kisanu thingathingale kai kawmasane ku tangimiane, wathingalaku, kai umawmase adravane ka takidredredremane ki vaiyane ki maungu,

¹⁷ Kai lri dulru thingale ku takaungane ki Twaumase. Kwi lasu adravane tungitwatumane palalava, kisanu thingathingale ku tangimiane ikai tailebe ki vai, lri kai maka kidringai ku sapatubalreane. Ku ngiathingale ka umawmase wathingalaku amia, ai ku patengatengane kai wathingale.