Wabulru 7 - Ngudradreadrekadhane Ka Sisiu 魯凱語聖經

Ku tamakakaelane ki lrigilane si kulrungane

¹ Ku akilrigwane ku nagane walribate ki tinukucingalrane ka sangwalreme ka acilai; ku tapacadhane ka vai walribate ki takitulalakane ka vai.

² Lu mwane ki daane ki matiathalithi silrialribate ki wamwa ki daane ki wararukurukudrane; asi lwiyane ku panianianiakeana ku umawmase naika takipapawlringavane, ku apacadhane mwakalavalava ki sanaka aneeanenga.

³ Kai kwalriane ki kidremedreme silrialribate ki kiarararagai; adravane angelrece ku lringau, ai kiapapawlringalringau ku takidremedremane.

⁴ Kai makulrungu ka umawmase akiraragadhane ku kidredredreme; ku ngiathingale ka umawmase wathingale ka yakai ku alikaiyane ki niake.

⁵ Ku sakaelaelane ki ngiathingale ka umawmase silrialribate ki sadrengedrengerane ki makulrungu ka umawmase.

⁶ Ku la ulrakai ki makulrungu ka umawmase kadrwa ku tamakakaelane ki cecenekane ka angatu lu ikai ki apwi si tutathatatha kudra lingau. Kikai yai mialri ka ungawngau.

⁷ Kai ngiathingale ka umawmase lu tavuvulrucu ki palrapalra, ku kakwakudhaneini mia ki makulrungu ka umawmase. Ku tarwamara ku pavangalre mabebetethe ki takaumawmasaneini.

⁸ Ku tangimiane ki awngane silrialribate ki tapathagilane. Kai sakiadiadili silrialribate ki ngiakalrilrigu.

⁹ Madha cacapange kalisi; ku piakidremedreme kalisi yai makulrungu.

¹⁰ Madha kivagavaga, “Ku aswalala ku vai ani ka mathaithariri kai ki asasane?” Kikai takivagane yai kaika ngiathingale.

¹¹ Ku yakai ku niake ka umawmase naika malrigili; kikai lrigilane mararaamau ki tacekecekelane ku tharirane.

¹² Ku apalakebane ki lrigilane silrialribate ki abaadhane ki paisu muswane. Ku lrigilane lri pakapapedrenge muswane; amani kai ku takatharirane ki thingalane.

¹³ Dredrela ku takauawngane ki Twaumase. Kudra bekaceini tukikilrungu, aneane kulri dulru alra dringelrese iniane?

¹⁴ Lu kasulivalivate ku awngane, kiraragadha; lu kwalrialri, madha karimurimuru ku akiragadhane si akwalriane twalai ki Twaumase patuelre; ku lrika angimiane lukabibilrili aneane kulri dulru paswala thingale?

¹⁵ Ikai kai ki ungawngau ka tapanianianiakane kawmasane wadredredrelaku sanaka maneemane. Ku mathariri ka umawmase paiya ku mathariri, la sara paacailringa, kai manganga ka umawmase paiya ku ngialisiane, la kalraagilringa ku niake.

¹⁶ Madha palribate pia ku mathariri, la madha ngikalrilrilrigili, asingithanga ngipapakaamudu?

¹⁷ Ai, madha kanganganga ngipaparamuru turamuru, asingithanga sara pacai?

¹⁸ Ubera kwini ki taparamurane ki taidrusa, ai ku tapiane ki mwasakene mukuludru ki Twaumase ku umawmase lri kasulivalivate patuelre.

¹⁹ Ku takiparalubane ki umawmase ki lrigilane silrialribate ku tapasikaiyane ki cekele ki tamangeale ka tabebelenge.

²⁰ Kai kawmasane kadrwa ku umawmase ku tapiapiane ku mathariri si kai pasalrisalriu.

²¹ Ku vaga ki palrapalra madha pikaikai ki kidremedreme patuelre; alau lri kilalrasu lu tusinalreme muswane ku sasiakawlu.

²² Ai, madha karimurimuru mialrisu ka kingikalrale tusinalreme ki palrapalra.

²³ Naarakainga naku ku lrigilane kilrialringau kikai patuelre. La kalrithethenga naku malra ku lrigilane, ai ku lrigilane matwase nakwane adaaili.

²⁴ Aneane kulri dulru palalava lekete ku pacugane ki niake? Mwaadringinga matisamali, makucingalrenga turamuru pulringalringau.

²⁵ Sa vaevaku ku kidremedreme nau tara thiingale iya, si kinkiu, kisilape ki lrigilane, kulri tubalre ki kivagavagali; la drelaku kai ngangane yai kadrwa ku thingale, kai kulrungane yai amamama.

²⁶ Wadrelaku yakai ku ababai ku matiwkukuludru ki apacadhane: Kwi alisu ku dalamaneini mia ki lrubange, mia ki lravathe; kwi alisu lu kebere ki tabalanganesu mia ki vaeva ka kicikici. Ku kiakiragai ki Twaumase ku umawmase lri kalrabuthu mubere ki alrimaini. Ai kwi alisu lri ruthuku ki pasalrisalriu ka umawmase.

²⁷ Ku Taradindu amia kai: Kikai sasilasilapaku ku satubalreane yai, ningutatikiyane kidringai.

²⁸ Kiasanu silapaku ku drumane ku satubalreane, ai kainaku maka kiadringai. Ikai ki takudrulu ka sawvalai, lri dulrwaku kidringai ku tangeea ku matiausakene, ai ikai ki laababai, kadrwa ku natangeeanga.

²⁹ Ku kicawcakwaneli vaeva: Kai Twaumase sabekace ki umawmase namathariri ka maliapapai ku kidremedreme, ai kwi lalasu ngipapakaapucu.