Wabulru 6 - Ngudradreadrekadhane Ka Sisiu 魯凱語聖經

¹ Wadrelaku kikai kawmasane yakai ku taingeane ka matitutubi ka wadrepete ikai ki umawmase.

² Ku Twaumase wabaai ki tangea ka umawmase ku lrigu, akaesadhane, tacekecekelane, si urikaikaini patuelre, ai kai maka pakiasupilri iniane, amanilringa kudra kai kiathingathingale ka umawmase ku kiasupilri. Kikai yai ungawngau, laka matiatubi turamuru.

³ Ku tangea ku umawmase adravane taidai ku lalalake, si kalragi ku niake ku taikaiyane kawmasane, kwi lasu alaiyasi kai maka kisupilri ku naika amalrane ku akaesadhane, lu pacai la kai kipudriadringai kidralreke, lu mia kwini, adravane kalragi ku tapanianiakane ku caili, manemane ku vai? Lu kidremedremaku, ku kialribate ka daini mathaithariri iniane.

⁴ Kai yabarangane lu kitulalake kadrwa ku akaesadhane; kwi lasu maulrau ikai ki dradrimitane, si kikarimuru.

⁵ Kwi lasu kaiyana wadrele ku ledra ki vai, kadrwa ku tathingalane; ai yakaai ku taisadraneini.

⁶ Kikai walribate turaamuru kudra ki panianiake tara kudrulu ka caili la kai maka kisupilri ku akiragadhane ku tapanianiakane. Ku tangimiane, kai tadrusa kaika wamwa kudra ki thadalrane ka taikaiyane?

⁷ Kai umawmase pasiakai ki barange kwalrialrialri, ai kai maka paswaete ki barange.

⁸ Kai ngiathingale ka umawmase manemane ku takasilrialribataneini ki makulrungu ka umawmase? Wathingale madu kisudalru ki umawmase lu iyane bulru ki matiakukuru ka umawmase manemane ku paluludane?

⁹ Kikai yai mialri ka ungawngau, ka pwalralra ki saseverane. Ku wadulru ngulwadhane ku pakaikaini, walribate turaamuru ki kadrwa ku tapakamiamiane ki ravane.

¹⁰ Kudra la ngiamianga yai nikelretaneenga; wathingaleta kai umawmase kai maka kiaecebe kudra ki magagarange iniane.

¹¹ Lu aru kiecebesu, lu kidremedremesu lri aru kakadrua ku paluludane, ngipapapia laka kadrwa ku akatharirane.

¹² Ikai kai ki edreekane, ungawngau, ka mia ki alalingu ka ngialribate ku tapanianiakane, aneane ku wathingale luka manemane ku makuciacingalrenga papia iniane? Aneane kulri pelaela iniane ku lrika angimiane kai kawmasane lu pacainga?