Wabulru 5 - Ngudradreadrekadhane Ka Sisiu 魯凱語聖經

Madha caapange kiketekete

¹ Lu mwasu ki daane ki Twaumase, wadradrele madu. Lu isaseleebanesu kicawcakwane, walribate kwidra ki la kai wathingale ku talimanemanemane ka makulrungu ka umawmase la katwase patarumara ku sapatarumarane.

² Lu kaisu kawrivana paswalana kidremedreme, madha tuduai papia ki Twaumase kiketekete. Ku Twaumase yakai subelebelenge, la ikaaisu kai lebe, lakamani kaika akawrivarivarivanesu kai isadrasadra.

³ Lu kakalra ku thekelrane ku kidremedreme, makaalra ku malisi ku sipi; lu kakalra ku vaga, maduai utaluvaivai ku kulrungane.

⁴ Lu papiasu ki Twaumase kiketekete, kiararirimu madu pangimia. Ku Twaumase kai madalame ki makulrungu ka umawmase. Lu kiketeketesu pangiamia madu.

⁵ Ku kiaketekete la kai pangimia, maesaesai lu kai kiketekete.

⁶ Madha ngwalalai ki vagasu si papasalriu muswane, la papia ki barakalai ki Twaumase pelaela ku tapamamanesu kawriva. Asingithanga dawlu ku akalisiane ki Twaumase? Asingithanga pakabebetethe iniane ki awnganesu?

⁷ Adravane ka thainininu ku tasipianesu, la pia ku thainininu ku ungawngau ka awngane, kawriva ku thaininu ku vaga, lrika thadaalraneanasu ka lri tara musakene mukuludru ki Twaumase.

Ungawngau ku tapanianianiakane ikai kawmasane

⁸ Lu drelesu ki sihu lu tusinalreme dredrepete ki lamatiakukuru ka umawmase, kai arakai ku aparamaramavane marasikai liniane, kai tukucingalre ku kindri lini, madha kasamalimali. Sanaka yakunkunkwane ka kumuingi yakaai ku abebelenge iniane ku palribulu iniane, kwini lalasu la kipalribulu ki abeebelenge ka kumuingi.

⁹ Adravane ka talialalai mialri satalu ku akibaadhane ku twalai umawma ku taleke.

¹⁰ Ku marau ki paisu tacekecekelane ku umawmase kadrwa ku tatukelrekelretane; ku pwasamalra ki tacekecekelane ku umawmase kai maka wamalramalra ku nau malra iyaiyaini patuelre. Kikai yai mialri ka ungawngau.

¹¹ Luka masatacekecekecekelanesu, ku satalutalu muswane kane ku aga ku umawmase takaakalra. Ku malramalrasu ngiathathingalesu ka samanemananesu lakakathane.

¹² Kai tarakawaungu adravane ka mabucuku ka kai mabucuku, tara waereke lu apece. Ku tacekecekelane ki yakai ku paisu ka umawmase kai maka pakasipelrenge iniane.

¹³ Ikai kai kawmasane wadrelaku ku taingeane ka matitutubi: Yakai ku umawmase ku warubu ku tacekecekelane, la ngikakabebetethelringa kamani.

¹⁴ Sana kai pakathariri ku tasiwbadhane pakakadrua patuelre, laka kadruanga ku apawcungulane ki lagagane.

¹⁵ Kwi lasu kadrwa ku ecengeini kela kai kawmasane, lai lri mialri ka kadrwa ku ilukuini katwase. Adravane ka ngitwatumane ku takwalrianeini ikai kai kawmasane, kwi lasu kai lri maka dulru iluku ku manemane katwase.

¹⁶ Kikai yai matiatubi turamuru. Ku tangimianeini kela, lu katwase lrika ngimiyaiya. Ku takathekelrane kwalrialri katwase pwalralra ki saseverane, maneemanelringa ku malraini ku akaesadhane?

¹⁷ Inilringa, kwi lasu lukavaivai panianianiake ikai ki dradrimitane, atubiane, thekelrane, caemane, si lisiane.

¹⁸ Ku tadrelaneli yai: Ku mathariri ku tapanianianiakane amani kudra yakai ki patarumara ki Twaumase kudra edreekane ku tapanianiakane si kanekane ungungulu, kisupisupilri ku nikwalriane ikai tailebe ki vai; kikai yai amani ku angimiane ki umawmase.

¹⁹ Ku Twaumase alaiyasi patarumara ki umawmase ku tacekecekelane, pakisupilri iniane, kwi lasu nai tarumara si kisupisupilri ku twalai ki kwalrini. Kikai yai patarumara ki Twaumase.

²⁰ Ku amani ku Twaumase ka pakiaragai iniane, kwi lasu kai lri ngwalai ku takaedrekanane ku tapanianiakaneini ikai kawmasane si kathekelre.