Wabulru 4 - Ngudradreadrekadhane Ka Sisiu 魯凱語聖經

¹ La pelangaku dredrele kai kawmasane patuelre ku kaika niaparamaramavane. Ku kiatusinalremelreme kidredredrepete ku umawmase alralreselrese tubitubi, kadrwa ku umawmase ku paralubu liniane. Kwi lalasu kai maka kiaparalubu, asi lwiyane ku twasinalremelreme dredrepete liniane sapukwane si sanaganane turamuru.

² Pwasamaalraku kudra ki lawapacainga ku umawmase, kwi lalasu musaesai paraamuru ki panianianiake ka umawmase.

³ Ai, kudra kaiyana kiatulalake, kaiyana wadrele kai kawmasane ku tangimiane ku kaika taaparamaramavane, musaesaiyana kai ki taidrusane ka umawmase.

⁴ La peelanga naku drele: Kai umawmase lu kwalrialri kaungu, si silasilape ku akilrigwane ku nagane yai, ngwalai ku tapusamalrane ki lapasiagiagisi. Kikai yai mialri ka ungawngau, ka pwalralra ki saseverane.

⁵ Yakai ku umawmase ku amia kai, “Kai makulrungu ka umawmase kiavavavange ka kadrwa ku piapia, la ngiarakai ki silravane pacai.”

⁶ Ai, ku wamalra ku vaeva ka tikiyane si la kaswalreke ku kidremedreme, walribate turaamuru kudra ki wamalra pasuete ki alrima si la kwalrialrialri ka pwalralra ki saseverane.

⁷ La peelanga naku drele ikai tailebe ki vai kudra la ungawngau ka awngane.

⁸ Yakai ku tangeangeea ka umawmase, kadrwa ku lalake ku sawvalai, laka kadrwa ku labetakane, ai kwalrialrialri awngu ku vai, kai ngwalwalwadhane kudra pikaingaini ku tacekecekelane. Kwi lasu kwalrialrialri, ai kai walreme kisupisupilri, luka pasiakaikai ki aneane? Kikai mialri ka ungawngau, ka matiakuru.

⁹ Ku tadrusa tara ka mathaithaariri ki tangeangeea, asi lwiyane ku tadrusa ka umawmase lu mapaparalubu, mathaithariri ku tangimiane.

¹⁰ Lu ngwadreke ku tangea, ku tangea wadulru drakale iniane. Alaiyasi tangeangeea ngwadreke, kadrwa kulri drakale iniane, kwi lasu lai lri matikuru.

¹¹ Ku tadrusa lu tadrusa apece mapapakaculu, lu tangeangeea apece lri tumane dulru kaculu?

¹² Lu tadrusa mapaparalubu lri dulru kiecebe ki tangeangeea lrumai liniane, lu tangeangeea kai lri makatumane kiecebe. Ku nielrelreane ku tulru ka calrisi makucingalre lritake.

^13-14 Ku tangea ka umawmase alau lri twalai ki matiakukuru si dulru atalialalai, si alau lrika twalai ki takiemengane si nene atalialalai; ai, lu pasuludrunga la kakulrungu, si kai maka kilalra ku takibulrwane, kwi lasu kai lri maka lribate kudra ki tangeea ka matiakukuru si laka ngiathingale ka yacengecenge.

¹⁵ Pwalringavaku kai yakawmasane sanaka umawmase, wathingale ikai liniane yakai ku tangeea ku yacengecenge lri ngidrakale si lri pawbalrithi ku tarathudane ki supilri ka talialalai.

¹⁶ Ku tangea ka talialalai alau lri dulru rathudu ki lamapapangale; ai kwi lasu lu pacainga, kadrwa ku umawmase kulri ngulringau ku natapianeini. Kikai mialri ka ungawngau, ka pwalralra ki saseverane.