Wabulru 3 - Ngudradreadrekadhane Ka Sisiu 魯凱語聖經

Sanaka maneemanenga wakelreteenga ku vai ku Twaumase

¹ Kai kawmasane sanaka maneemanenga nikelretaneenga ku vai, yakaainga patuelre ku kelrete ki Twaumase ku zikange.

² Yakai ku akitulalakane, yakai ku apacadhane; yakai ku alredrekane, la ikai ku akucane;

³ yakai ku apapacadhane, la ikai ku apawdringadhane; yakai ku akabebetethane, la ikai ku atudaanane;

⁴ yakai ku atubitubiane, la ikai ku akirararagadhane; yakai ku adiridririvane, la ikai ku adralradralradhane;

⁵ yakai lu atadrusane apece, la ikai lu amauvagadhane apece; yakai lu amakakadadadalamane, la ikai lu akangangengerecane;

⁶ yakai lu asilasilapane, la ikai lu apawcilricilriane; yakai ku pudringadringai madu, la ikai ku sarasarare madu;

⁷ yakai ku athiracane, la ikai ku acakupane; yakai ku aisaselebane, la ikai ku akawrivane;

⁸ yakai ku akadalamane, la ikai ku akalisiane; yakai ku amakaruruburane, la ikai ku akarathudane.

⁹ Alaiyasi ka ngiamia kikai, laka manemane ku paluludane kai kwalrialrialrita patueelre?

¹⁰ Wathingalaku ki Twaumase kai pasiamece mitane ku matelrege.

¹¹ Pasiakai ki sanaka manemanenga kelrete ku amamwamwane ku zikange; la pikai mitane ku palralrawthu ka asikidremedremane, ai kai pathingale mitane patuelre ku la takaunganeini.

¹² Lakamani lu kidremedremaku, kai umawmase maesaesai lu kirararaagai, kisupisupilri ku akaesadhane ku tapanianianiakane.

¹³ Naika wakanekaneta si ungungulu, kisupisupilri ku paluludane ki takwalriane. Kikai yai patarumara ki Twaumase.

¹⁴ Wathingalaku, ku pia ki Twaumase patuelre palralrawthu ikai; kai umawmase kai lri maka drima kivala ku tapiane ki Twaumase patuelre. Lu pia kikai ku Twaumase, pakai ku lrika ausakenane mukuludru ki umawmase iniane.

¹⁵ Kikai awngane kaiasasane si lukabibilrili ku lrika angimiane, yakaiynga kunadruma. Kai Twaumase pangiapelane putaluvaivai ku thadaalrane ka natangimiane.

Kai ka niaparamaramavane ikai kai kawmasane

¹⁶ La ikaaiyana, lu drelaku kikai kawmasane, kudra naika taikaiyane ku aparamaramavane si dringelresane, yakaailringa kamani ku ngialisiane.

¹⁷ La kidremedremaku, “Ku mathariri ka umawmase, ku manganga ka umawmase, ku Twaumase lri saibange patuelre; asi lwiyane sanaka maneemanenga, ku makaelaela ku la kakwakudhane yakaai ku nipawkalrivilane kelrete ku zikange.”

¹⁸ Lu kidremedremaku: Ku Twaumase kialrialrialringau mitane, pakai ku lrika athingalaneta, ka kaita ka malrilrigili ki lawaudriwdripi.

¹⁹ Asi lwiyane, kai umawmase si waudriwdripi mararaamau ku angimiane lini: Lu pacai ku umawmase, lri mialri pacai ku waudriwdripi. Kikai drusa tara yakaai ku niake; kai umawmase kaika makececenge ki waudriwdripi; asi lwiyane sanaka maneemane ungawngau patuelre.

²⁰ Kikai taidrusane lri tara siwlri adae; luka twalai inu kainganai, lri siwlri mwa kwini.

²¹ Aneane kulri maka pasudalepe kalri musubelebelenge ku abake ki umawmase, lai lri muswadriadringi ku abake ki waudriwdripi?

²² Lakamani lu drelaku, kai umawmase mathaithaariringa lu kisupisupilri ku luludane ki kwalrialrini; kikai yai amani ku lrika angimianeini. Aneane kulri maka padrele iniane ku lrika angimiane?