Wabulru 2 - Ngudradreadrekadhane Ka Sisiu 魯凱語聖經

¹ Ngiakakawrivarivaku, “Bwala! Palalava kisupilri kiraragai! Bwala kisupilra ki akaesadhane!” Ai, kikai mialri ka ungawngau.

² Wadrelaku kai mwalralrakai yai wacapange ka kadrwa ku kelele, lu kisupisupilri ku akiragadhane kadrwa ku paluludane.

³ Kiarakaku ki akisilapane ku lrigilane ki kidremedremeli, malrithethaku ku arakaiyane ku bava ngipapakiragai, si kisilape ku akiragadhane. Lu kidremedremaku, kilakikai yai alau amani ku lu ikaiyane kai ki edreekane ka caili mathaithariringa ku tapangimiane sikace ku tapanianiakane.

⁴ Wakaungaku, ngitatudaane, lredreke ku labudu.

⁵ La pudriadringadhaku kalatadrane ki mawivaivai, si lredreke ku makaelaela ku ivai.

⁶ Walrukwaku tu taciladhane, si pwacilai ki angatu.

⁷ Walangadhaku ku laababai si lasawvalai ku duri, la ikai ku kiatulalake ikai tavanane. Yakai ku thathatha ku lwange si kiuli, ku kalrane walribate ki sanaka yakaainga Yerusalrime.

⁸ Ngiapapasikaiyaku rubu ku kingi gingi ki talialalai, ku tacekecekelane ki lakakesiu. Piakaiyaku ku takaalra ku latarasenasenai ku lasawvalai si laababai, takaalra ku lataelrelreli, la ngisasingikaiyaku ku nau tumane iya madu.

⁹ Unu, magarangaku, si pamalebe sanaka yakaainga Yerusalrime ka umawmase; laka taikaiyane kai lrigilaneli.

¹⁰ Nau malra ku manemane lu iyaku, yakaai ku manemane; pakaelreaku kisupisupilri, ka kadrwa ku ukai kiruthuku. Patwaladhaku ki sakiasamwamulali malra ku akiragadhane; amani kai ku sapawlrawlravane nakwane.

¹¹ Ai, lu siwlriwlringa naku drele ku natakaunganeli, si kidremedreme ku takwalrianeli, pwalringawnga naku ala ka ungawngau patuelre, ka pwalralra ki valrigi patuelre; kai kawmasane patuelre kadrwa ku akaesadhane.

¹² Ku talialalai ku adulrwaneini pia, napiapia ki aswalalala ki latalialalai. Ala kirimwaku kidremedreme manemane kai lrigilane, kai ngikagagarangane capange, kulrungane iya.

¹³ Unu, wadrelaku ki lrigilane ka walribate ki kulrungane, mararaamau ki ledra ka walribate ki dradrimitane.

¹⁴ Ku ngiathingale ka umawmase maka wadrele cucubungu ki kadalranane; ai ku makulrungu yakai ki dradrimitane sakerakerape. Ai, wathingalaku, kwi lalasu ku lrika angimiane lini maramaraamau.

¹⁵ Kiadredremaku, “Ku kipadradresenge ki lamakulrungu ka umawmase mialri ka kipadradresengeli. Adravane ka ngitwatwatumanaku kalrigili manemane ku paluludane?” Ku satubalreaneli yai, “Kadrua, ungawngau patueelre!”

¹⁶ Ku lamalrigili ka umawmase si lamakulrungu ka umawmase mararaamau, kadrwa ku umawmase ku maulai ngulringalringau liniane; asi lwiyane ku bibilrili kudra vai, kwi lalasu lri kikarimuru makanaelre. Adravane ka lrigilane ka kulrungane, lri paacai makanaelre.

¹⁷ Ngwalai kikai, kai tapanianianiakane papia nakwane kadrwa ku paluludane; kai tailebe ki vai ku nipiapiane patuelre pakwalri ki awlruli. Ungawngau patuelre, ka pwalralra ki valrigi patuelre.

¹⁸ Itailebe ki vai, ku nimalrane patwalai ki takwalriane patuelre papia nakwane mialri ka kadrwa ku paluludane; asi lwiyane kainaku lri dulru kai suru patuelre baai ki mwabaibalrithi ka umawmase.

¹⁹ Kwini umawmase ku malrigili ku makulrungu, aneane ku wadulru thingale? Ai, kwi lasu lri malra simanemane ku taikaiyaneli kawmasane arakai ku sakwalrialri, ku lrigilane malra patuelre. Kikai mialri ka ungawngau.

²⁰ Ngwalai kai, masulringa naku turamuru ku nataikaiyaneli tailebe ki vai kwalrialrialri.

²¹ Kai umawmase ku arakaini ku lrigilane, thingalane, tasialrimanane si dulru malra, lri tara suru, lai ka palrapalra ku wamalra si kai kwalringa. Kikai mialri ka ungawngau, ka kaika aparamaramau!

²² Kai umawmase lu ikai tailebe ki vai kathekethekelre ku kidremedreme, kwalrialri, kisamulamula, manemane ku akaesadhane?

²³ Lu panianiakane ikai kawmasane makavale, ku piapia madu akwalriane ki kidremedreme, si kai maka kasipelrenge ki mauawawngu. Kikai mialri ka ungawngau.

²⁴ Kai umawmase lu dulru kane ungulu, si kisupisupilri ku takwalrianeini, ngiaesadhanenga turamuru. Ai, lu drelaku kikai mialri ka takidremedremane ki Twaumase.

²⁵ Ana kaika Twaumase, aneane kulri dulru kane ungulu? Aneane kulri dulru kisupisupilri?

²⁶ Ku Twaumase patarwamara ku lrigilane, ku thingalane, si akiragadhane baai kudra ki kadalameini ku umawmase, ka amani kudra kwalrialrialri kaungu ki pasalrisalriu ka umawmase, wamalra kudra ruburubu lini si baai patuelre kudra ki pakiaragai iniane ku umawmase. Kikai mialri ka ungawngau, ka pwalralra ki valrigi.