Wabulru 12 - Ngudradreadrekadhane Ka Sisiu 魯凱語聖經

¹ Saka yacengecengeananasu, pulringava ki wabekace muswane ka Tamatama. Sa kaina kela ku apasuludranesu ku caili, sa kaisu iyana kai, “Kadrwa ku pacucugane lu panianianiakane.”

² Sa kaiyana kawlrau ku ledra ki vai, ki dramare, ki latariau, ku tamakaudalane ku ememe sakaiyana kawlrau, pulringava iniane.

³ Lri kelanga kudra vai, kwi alrimasu lri manugiligili, kwini sapukwane ka drapale lri kakadrwa ku puku. Kwi valisisu lrika piapianga ku tedrane, lai pakakucingalre taetalre. Lri rimariminga kwi macasu, si kai cegecegenga drele.

⁴ Kwi calringasu macelenga, kai maka kilalranga ku rariavane ikai kadalranane ki cekele; ku lingau ki la pasialribulribu wasenasenai kaisu maka kialalranga. Ai ku rulungu lu tawsenai, pacunusu.

⁵ Makiwcusu mwa ki abelenge, ku adadavacane la ikai ku matiaukuludru. Kwi isiusu ikawdrasenga, aru suludrunga ku puku, kadruanga ku apitumane ki ababai ki sawvalai, kai lri maka dulrunga siwlriwlriane. Kuta makanaelre papiapiyangata ki bibilrilinga katwatwase; lukamaninga kwidra, ki kadalranane ki cekele lri ikai ku lingau ku watubitubi.

⁶ Lukamaninga kwidra, ku sisilu ka gingi lri kabitakenga, ku kingi ka tapikaikaiyane ki tinaki lri kacwakenga, ku sasurusurusurane ka calrisi ikai ki dralremedreme lri kalritakenga, ku savawvawane ka kankange lrika mamukiringa.

⁷ Kai kinawmasaneta lri siwlri adae; kai niaketa lri siwlri mwa ki patarwamara ku niake ka Twaumase.

⁸ Ku taradindu amia kai, ungawngau, ungawngau, ungawngau patueelre.

Satwalrepenge ka vaga

⁹ Ai, ku taradindu yai ngiathingale; kwi lasu pacungulu bulru ki laumawmase ku thiingaleini. Kwi lasu wakinkiu ku kavagavagane, si kithiathingale luka patengatengane.

¹⁰ Ku taradindu wasilape ku apasapukwanane ki kidremedreme ki umawmase ku vaga, si pangimia pacase ku patengatengane ka vaga.

¹¹ Ku vaga ki ngiathingale yakai ku sakaelaelane bulru, mia ki taraagwagu ki kiu kudra ecengeini ku cecenekane ka ukudru, kudra pacaseini ku kavagavagane la kakeecenge kai ngivelevelevele, mia ki nipakakecengane kedrekedre ka sakedrekedre, ka tara agwagu ki sanaka umawmase ka Twaumase ku patarwamara patueelre.

¹² Lalakeli, yakaiyana kwi vaeva kwi lrika adradrelanesu. Ku atuhungwane kadrwa ku apalikaiyane; lu silrigusu turamuru lri kidulru kwi kinawmasanesu.

¹³ Sanaka vaga kawrivanga patuelre, lu elrelreanenga si aku vavale: Musakena mukuludru ki Twaumase, la paluludu ku drekaseini, asi lwiyane kikai yai atarapiane ki sanaka umawmawmase.

¹⁴ Kai piapiata sanaka manemanenga, ku mathariri ku malisi, adravane kwidra niseketane, ku Twaumase lri saibange patueelre.